ആലപ്പുഴ: സംസ്ഥാന സർക്കാരിന്റെ നാലാം വാർഷികത്തിന്റെ ഭാഗമായി സംഘടിപ്പിച്ച എന്റെ കേരളം പ്രദർശനവിപണനമേളയിൽ മികച്ച കവറേജിനുള്ള  പുരസ്‌കാരം  സുപ്രഭാതത്തിന്. അച്ചടി മാധ്യമങ്ങളിൽ മൂന്നാം സ്ഥാനമാണ് ലഭിച്ചത്. എന്റെ കേരളം പ്രദർശനവിപണനമേളയുടെ സമാപന സമ്മേളനത്തിൽ പി.പി ചിത്തരഞ്ജൻ എം.എൽ.എയിൽ നിന്ന്   ആലപ്പുഴ ബ്യൂറോ ചീഫ് തമീം സലാം കാക്കാഴം അവാർഡ് ഏറ്റു വാങ്ങി.

ഈ സർക്കാർ  ഒമ്പത് വർഷക്കാലയളവിൽ കേരളത്തിൽ ഉണ്ടാക്കിയ അതിശയിപ്പിക്കുന്ന മാറ്റങ്ങൾ  മേളയിലൂടെ പ്രതിഫലിച്ചുവെന്ന്  പി.പി ചിത്തരഞ്ജൻ എം.എൽ.എ പറഞ്ഞു. ചടങ്ങിൽ എച്ച് സലാം എം. എൽ. എ  അധ്യക്ഷനായി. മറ്റൊരു കാലത്തിനോടും സാമ്യപ്പെടുത്താൻ പറ്റാത്തത്ര വലിയ വികസന മുന്നേറ്റമാണ് കഴിഞ്ഞ കുറച്ച് കാലയളവായി ആലപ്പുഴയിൽ ഉണ്ടായിരിക്കുന്നതെന്ന് എം. എൽ. എ പറഞ്ഞു. 

ജില്ല പഞ്ചായത്ത് പ്രസിഡന്റ് കെ.ജി രാജേശ്വരി, നഗരസഭ ചെയർപേഴ്സൺ കെ.കെ ജയമ്മ , ചേർത്തല നഗരസഭ ചെയർപേഴ്‌സൺ ഷേർളി ഭാഗവൻ, ജില്ലാ കലക്ടറും ജില്ലാതല സംഘാടക സമിതി ജനറൽ കൺവീനറുമായ അലക്‌സ് വർഗീസ്, നഗരസഭാ സ്റ്റാൻഡിങ് കമ്മിറ്റി ചെയർപേഴ്‌സൺ  എ.എസ് കവിത, നഗരസഭ  കൗൺസിലർ പ്രഭ ശശികുമാർ, എ.ഡി.എം ആശാ സി എബ്രഹാം, ജില്ല ഇൻഫർമേഷൻ ഓഫീസർ കെ.എസ് സുമേഷ് തുടങ്ങിയവർ സംസാരിച്ചു.  ജില്ല വ്യവസായ കേന്ദ്രം മാനേജർ ബി സുജാത റിപ്പോർട്ട് അവതരിപ്പിച്ചു.

ആലപ്പുഴ ബീച്ചിൽ മെയ് ആറു മുതൽ  സംഘടിപ്പിച്ച എന്റെ കേരളം പ്രദർശന വിപണനമേളയിൽ  12 തിങ്കളാഴ്ച വരെ 36,38,675 രൂപയുടെ വിറ്റുവരവാണ് നേടിയത്. ഏഴ് ദിവസങ്ങളിൽ മേളയുടെ ഭാഗമായി ഒരുക്കിയ ഫുഡ് കോർട്ടിലൂടെ 11.43 ലക്ഷം രൂപയുടെ വരുമാനമാണ് കുടുംബശ്രീ നേടിയത്. സൗജന്യ സേവനങ്ങളൊരുക്കി വിവിധ സർക്കാർ വകുപ്പുകളും മേളയിലെ സജീവ സാന്നിധ്യമായിരുന്നു. സർക്കാർ വകുപ്പുകൾ ഒരുക്കിയ 153 സ്റ്റാളുകളും 47 കൊമേർഷ്യൽ സ്റ്റാളുകളുമുൾപ്പെടെ 200 സ്റ്റാളുകളാണ് ഉണ്ടായിരുന്നത്. ഇത്തവണ സർക്കാർ സേവനങ്ങൾക്കും സർക്കാരിന്റെ പ്രവർത്തനങ്ങൾ കൂടുതൽ വ്യക്തമാക്കുന്ന തീം സ്റ്റാളുകൾക്കുമാണ് പ്രാമുഖ്യം ഉണ്ടായത്. 

കുടുംബശ്രീയുടെ ഒൻപത് സ്റ്റാളുകളിൽ നിന്ന് മാത്രം 5.15 ലക്ഷം രൂപയാണ് വരുമാനമായി ലഭിച്ചത്. കൊമേർഷ്യൽ സ്റ്റാളുകളിലൂടെ 11,35,991 രൂപയുടെ വരുമാനം നേടാനായി. വിവിധ സർക്കാർ വകുപ്പുകളുടെ സ്റ്റാളുകളിൽ നിന്ന് 8,44,684 രൂപയും വരുമാനമായി ലഭിച്ചു. ഏഴു ദിവസം നീണ്ടുനിന്ന മേളയിലൂടെ നിരവധിയാളുകളാണ് വിവിധ സേവനങ്ങൾ പ്രയോജനപ്പെടുത്തിയത്. മോട്ടാർ വാഹന വകുപ്പിന്റെ സ്റ്റാളുകളിൽ മാത്രം ആയിരത്തോളം അന്വേഷണങ്ങൾ എത്തി. മേള അവസാനിക്കുമ്പോഴും വലിയ തിരക്കാണ് സ്റ്റാളുകളിൽ ഉണ്ടായിരുന്നത്.

ente keralam expo alappuzha special award for suprabhaatahm news