റിയാദ്: സഊദി അറേബ്യയും അമേരിക്കയും തമ്മിൽ സൈനിക സാമ്പത്തിക സഹകരണ കരാറുകൾ ഉൾപ്പെടെ സുപ്രധാന കരാറുകളിൽ ഒപ്പ് വെച്ചു. അമേരിക്കൻ പ്രസിഡന്റ് ഡോണൾഡ് ട്രംപിന്റെ സഊദി സന്ദർശനത്തിനിടെയാണ് വിവിധ കരാറുകളിൽ ഇരു രാജ്യങ്ങളും ഒപ്പ് വെച്ചത്. റിയാദിലെ അൽ യമാമ രാജ കൊട്ടാരത്തിൽ നടന്ന കൂടിക്കാഴ്ചകൾക്ക് ശേഷം സഊദി കിരീടാവകാശിയും പ്രധാനമന്ത്രിയുമായ മുഹമ്മദ് ബിന്‍ സല്‍മാന്‍ രാജകുമാരനും അമേരിക്കന്‍ പ്രസിഡന്റ് ഡൊണാള്‍ഡ് ട്രംപും തമ്മിലാണ് സുപ്രധാന മൾട്ടി ബില്യൻ കരാറുകളിൽ ഒപ്പ് വെച്ചത്. 

സഊദിയിൽ 600 ബില്യൺ ഡോളറിന്റെ നിക്ഷേപ കരാറുകളിൽ ഒപ്പ് വെച്ചതായി വൈറ്റ് ഹൗസ് പ്രഖ്യാപിച്ചു. മുഹമ്മദ് ബിന്‍ സല്‍മാന്‍ രാജകുമാരന്റെയും അമേരിക്കന്‍ പ്രസിഡന്റിന്റെയും സാന്നിധ്യത്തില്‍ സഊദി അറേബ്യയും യുഎസും ഊർജ്ജം, പ്രതിരോധം, ബഹിരാകാശം, ധാതു വിഭവങ്ങൾ എന്നീ മേഖലകളിലെ സഹകരണത്തിനുള്ള കരാറുകളിലും നീതിന്യായ വകുപ്പുമായുള്ള സഹകരണം, പകർച്ചവ്യാധികളെ നേരിടൽ, സാങ്കേതികവിദ്യ എന്നിവയിലെ സഹകരണം എന്നിവയ്ക്കുള്ള ധാരണാപത്രത്തിലും ഒപ്പുവച്ചു. കരാറുകളെ ചരിത്രപരവും പരിവർത്തനാത്മകവുമാണെന്ന് വൈറ്റ് ഹൗസ് വിശേഷിപ്പിച്ചു, കൂടാതെ "യുണൈറ്റഡ് സ്റ്റേറ്റ്സും സഊദി അറേബ്യയും തമ്മിലുള്ള പങ്കാളിത്തത്തിന്റെ ഒരു പുതിയ സുവർണ്ണ കാലഘട്ടത്തെ പ്രതിനിധീകരിക്കുന്നു" എന്നും വൈറ്റ് ഹൗസ് പറഞ്ഞു. 

പ്രതിരോധ മേഖലയിൽ, യുഎസും സഊദി അറേബ്യയും "ചരിത്രത്തിലെ ഏറ്റവും വലിയ ആയുധ വിൽപ്പന കരാറിലാണ് ഒപ്പുവച്ചത്. സഊദി അറേബ്യയ്ക്ക് ഒരു ഡസനിലധികം യുഎസ് പ്രതിരോധ സ്ഥാപനങ്ങളിൽ നിന്നുള്ള അത്യാധുനിക യുദ്ധ ഉപകരണങ്ങളും സേവനങ്ങളും നൽകുന്നതിനായിഏകദേശം 142 ബില്യൺ ഡോളർ കരാർ ആണ് ഇതിൽ സുപ്രധാനം. നാഷണല്‍ ഗാര്‍ഡിന്റെ കര, വ്യോമ സംവിധാനങ്ങളും വെടിമരുന്ന്, പരിശീലനം, പിന്തുണാ സേവനങ്ങള്‍, സ്‌പെയര്‍ പാര്‍ട്‌സ് എന്നിവയുമായി ബന്ധപ്പെട്ട കരാര്‍, സഊദിയിൽ ആരോഗ്യ മേഖലാ ശേഷികളുടെ വികസനത്തിന് സഊദി പ്രതിരോധ മന്ത്രാലയവും യു.എസ് പ്രതിരോധ മന്ത്രാലയവും തമ്മിലുള്ള ധാരണാപത്രം, സഊദി, അമേരിക്കന്‍ നീതിന്യായ മന്ത്രാലയങ്ങള്‍ തമ്മില്‍ ധാരണാപത്രം, ബഹിരാകാശ കാലാവസ്ഥ നിരീക്ഷിക്കാനുള്ള ക്യു-സാറ്റ് പദ്ധതിയില്‍ സഹകരിക്കുന്നതിന് സഊദി സ്‌പേസ് ഏജന്‍സിയും അമേരിക്കയിലെ നാഷണല്‍ എയറോനോട്ടിക്‌സ് ആന്റ് സ്പേസ് അഡ്മിനിസ്‌ട്രേഷനും (നാസ) തമ്മിലുള്ള എക്സിക്യൂട്ടീവ് കരാര്‍, കസ്റ്റംസ് മേഖലാ സഹകരണ കരാര്‍, ഇരു രാജ്യങ്ങള്‍ക്കുമിടയിലെ വ്യോമഗതാഗത കരാര്‍ ഭേദഗതി ചെയ്യാനുള്ള പ്രോട്ടോക്കോള്‍ എന്നിവയും ഒപ്പുവെച്ചു. 

എട്ട് മുൻ യുഎസ് പ്രസിഡന്റുമാർ സഊദി അറേബ്യയെ വിശ്വസനീയമായ തന്ത്രപരമായ പങ്കാളിയായും പ്രാദേശിക, അന്തർദേശീയ വിഷയങ്ങൾ ചർച്ച ചെയ്യുന്നതിനുള്ള ഒരു പ്രധാന കേന്ദ്രമായും കണക്കാക്കിയിട്ടുണ്ട്. നിക്സൺ, ജിമ്മി കാർട്ടർ, ജോർജ്ജ് എച്ച്ഡബ്ല്യു ബുഷ്, ക്ലിന്റൺ, ജോർജ്ജ് ഡബ്ല്യു. ബുഷ്, ബരാക് ഒബാമ, ട്രംപ് (രണ്ട് തവണകളിൽ), ബൈഡൻ. എന്നിവരെല്ലാം സഊദി അറേബ്യ സന്ദർശിക്കുകയും, സന്ദർശനങ്ങൾ വെറും നയതന്ത്ര പ്രോട്ടോക്കോൾക്ക് പുറമെ, റിയാദുമായുള്ള സഹകരണം വർദ്ധിപ്പിക്കുന്നതിനും ആഗോള വേദിയിൽ രാജ്യത്തിന്റെ പ്രധാന പങ്ക് സ്ഥിരീകരിക്കുന്നതിനുമുള്ള അവസരങ്ങളായി മാറ്റുകയും ചെയ്തിരുന്നു

സഊദി അറേബ്യയിലെ നേരിട്ടുള്ള യു എസ് നിക്ഷേപം 2024 ൽ ഏകദേശം 15.3 ബില്യൺ ഡോളറിലെത്തിയിരുന്നു. സഊദി നിക്ഷേപകരുടെ പങ്കാളിത്തത്തോടെ അമേരിക്കൻ നിക്ഷേപകരുടെ ഉടമസ്ഥതയിലുള്ള 28 ഫാക്ടറികൾ സഊദി അതോറിറ്റി ഫോർ ഇൻഡസ്ട്രിയൽ സിറ്റിസ് ആൻഡ് ടെക്നോളജി സോണുകളിൽ പ്രവർത്തിക്കുന്നുണ്ട്.