ഹൈദരാബാദ്: ലഖ്‌നൗ സൂപ്പർ ജയന്റ്സിനെതിരെയുള്ള മത്സരത്തിന് മുന്നോടിയായി സൺറൈസേഴ്‌സ് ഹൈദരാബാദിന് കനത്ത തിരിച്ചടി. ടീമിന്റെ ഓസ്‌ട്രേലിയൻ ഓപ്പണർ ട്രാവിസ് ഹെഡ് വരും മത്സരങ്ങളിൽ കളിച്ചേക്കില്ല. കോവിഡ് 19 ബാധിച്ചതാണ് ഹെഡിന് തിരിച്ചടിയായത്. കോവിഡ് പിടിപ്പെട്ടതിനെ തുടർന്ന് താരത്തിന് ഇന്ത്യയിലേക്ക് തിരിച്ചെത്താൻ സാധിച്ചിട്ടില്ല. ഹൈദരാബാദിന്റെ മുഖ്യ പരിശീലകൻ ഡാനിയേൽ വെട്ടോറിയാണ് ഇക്കാര്യം സ്ഥിരീകരിച്ചത്. 

ഈ സീസണിൽ ഹൈദരാബാദ് നിലനിർത്തിയ പ്രധാന താരങ്ങളിൽ ഒരാളായിരുന്നു ഹെഡ്. ഹെഡിനെ 14 കോടി തുകക്കായിരുന്നു ഓറഞ്ച് ആർമി നിലനിർത്തിയിരുന്നത്. ഈ സീസണിൽ 10 ഇന്നിംഗ്‌സുകളിൽ നിന്ന് 281 റൺസ് മാത്രമേ ഹെഡിന് നേടാൻ സാധിച്ചിട്ടുള്ളൂ. ഹെഡിന്റെ അഭാവം ഹൈദരാബാദിന് വലിയ തിരിച്ചടിയായിരിക്കും നൽകുക. 

ഈ സീസണിൽ അത്ര മികച്ച പ്രകടനങ്ങൾ പുറത്തെടുക്കാൻ ഹൈദരാബാദിന് സാധിച്ചിട്ടില്ല. 11 മത്സരങ്ങളിൽ നിന്നും മൂന്ന് ജയം മാത്രമാണ് പാറ്റ് കമ്മിൻസിനും സംഘത്തിനും നേടാൻ സാധിച്ചിട്ടുള്ളത്. ഏഴ് മത്സരങ്ങൾ പരാജയപ്പെട്ടപ്പോൾ ഒരു മത്സരം മഴ മൂലം ഉപേക്ഷിക്കുകയും ചെയ്തു. നിലവിൽ ഏഴ് പോയിന്റുമായി എട്ടാം സ്ഥാനത്താണ് ഹൈദരാബാദ്. നാളെയാണ് ലഖ്‌നൗവിനെതിരെയുള്ള ഹൈദരാബാദിന്റെ മത്സരം നടക്കുന്നത്. 

എൽഎസ്ജി 11 മത്സരങ്ങളിൽ നിന്നും അഞ്ചു വിജയുമായി 10 പോയിന്റോടെ ഏഴാം സ്ഥാനത്തുമാണ് ഉള്ളത്. പ്ലേ ഓഫിലേക്ക് യോഗ്യത നേടണമെങ്കിൽ ലഖ്‌നൗവിനു ഇനിയുള്ള എല്ലാ മത്സരങ്ങളും വിജയിക്കുകയും മറ്റ് ടീമുകളുടെ മത്സരങ്ങളുടെ ഫലങ്ങൾ അനുകൂലമാവുകയും വേണം. 

Sunrisers Hyderabad player Travis Head will miss IPL Matches due to covid 19