ജയ്പൂർ: ഐപിഎല്ലിൽ പഞ്ചാബ് കിങ്സിനെതിരായ മത്സരത്തിൽ രാജസ്ഥാൻ റോയൽസ് 10 റൺസിന്‌ പരാജയപ്പെട്ടു.  മത്സരത്തിൽ ആദ്യം ബാറ്റ് ചെയ്ത പഞ്ചാബ് 20 ഓവറിൽ അഞ്ച് വിക്കറ്റ് നഷ്ടത്തിലാണ് 219 റൺസ് ആണ് നേടിയത്. വിജയലക്ഷ്യം പിന്തുടർന്നിറങ്ങിയ രാജസ്ഥാൻ ഇന്നിംഗ്സ് ഏഴ് വിക്കറ്റ് നഷ്ടത്തിൽ 209 റൺസിൽ അവസാനിക്കുകയായിരുന്നു. മത്സരശേഷം ഈ തോൽവിയെക്കുറിച്ച് രാജസ്ഥാൻ നായകൻ സഞ്ജു സാംസൺ സംസാരിച്ചു. വളരെ വേഗത്തിൽ ടീം സ്കോർ ചെയ്തുവെന്നും എന്നാൽ പിന്നീട് സ്കോറിങ്ങിന്റെ വേഗത പിന്നീട് നഷ്ടപ്പെട്ടുവെന്നുമാണ് സഞ്ജു പറഞ്ഞത്. 

''ഞങ്ങൾ വളരെ നന്നായിട്ടാണ് ഇന്നിംഗ്സ് തുടങ്ങിയത്. എന്നാൽ അതേ വേഗതയിൽ കളിക്കാൻ ഞങ്ങൾക്ക് സാധിച്ചില്ല. ഇന്നത്തെ വിക്കറ്റും ഔട്ട് ഫീൽഡും കണക്കിലെടുക്കുമ്പോൾ ഒരു മികച്ച സ്കോറായിരുന്നു അത്. എന്നാൽ നമ്മൾ അവസാനം റൺസ് നേടി മത്സരം ഫിനിഷ് ചെയ്യണമായിരുന്നു. ടീമിൽ അടുത്ത സീസണിൽ ഒരുപാട് മാറ്റങ്ങൾ വരുത്തണം'' സഞ്ജു സാംസൺ പറഞ്ഞു.

മത്സരത്തിൽ രാജസ്ഥാന് വേണ്ടി യശ്വസി ജെയ്സ്വാൾ, ധ്രുവ് ജുറൽ എന്നിവർ അർദ്ധ സെഞ്ച്വറി നേടി മികച്ച പ്രകടനമാണ് നടത്തിയത്. ജുറൽ 31 പന്തിൽ മൂന്ന് ഫോറുകളും നാല് സിക്സുകളും ഉൾപ്പടെ 53 റൺസാണ് നേടിയത്. ജെയ്‌സ്വാൾ 25 പന്തിൽ 50 റൺസും നേടി. ഒമ്പത് ഫോറുകളും ഒരു സിക്സുമാണ്‌ താരം നേടിയത്. വൈഭവ് സൂര്യവംശി 15 പന്തിൽ നാല് വീതം ഫോറുകളും സിക്സുകളും അടക്കം 40 റൺസും നേടി.

പഞ്ചാബ് ബൗളിങ്ങിൽ ഹർപ്രീത് ബ്രാർ മൂന്ന് വിക്കറ്റുകളും മാർക്കോ ജാൻസൺ, അസ്മത്തുള്ള ഒമർസായ് എന്നിവർ രണ്ട് വിക്കറ്റ് വീതവും നേടി മിന്നും പ്രകടനം നടത്തിയപ്പോൾ രാജസ്ഥാൻ തോൽവി സമ്മതിക്കുകയായിരുന്നു. 

നെഹാൽ വധേര,  ശശാങ്ക് സിംഗ് എന്നിവരുടെ അർദ്ധ സെഞ്ച്വറി കരുത്തിലാണ് പഞ്ചാബ് മികച്ച സ്കോർ നേടിയത്. 37 പന്തിൽ അഞ്ചു വീതം ഫോറുകളും സിക്സുകളും ഉൾപ്പെടെ 70 റൺസാണ് വധേര സ്വന്തമാക്കിയത്. ശശാങ്ക് സിംഗ് 30 പന്തിൽ പുറത്താവാതെ 59 റൺസും നേടി. അഞ്ച് ഫോറുകളും മൂന്ന് സിക്സുകളും അടങ്ങുന്നതായിരുന്നു താരത്തിന്റെ ഇന്നിംഗ്സ്.

നിലവിൽ പോയിന്റ് പട്ടികയിൽ 17 പോയിന്റുമായി രണ്ടാം സ്ഥാനത്താണ് പഞ്ചാബ്. മറുഭാഗത്ത് ആറ് പോയിൻ്റോടെ ഒമ്പതാം സ്ഥാനത്താണ് സഞ്ജുവും സംഘവും. സീസണിലെ അവസാന മത്സരത്തിൽ ചെന്നൈ സൂപ്പർ കിങ്സിനെയാണ് രാജസ്ഥാൻ നേരിടുക. മെയ് 20നാണ് മത്സരം നടക്കുന്നത്.

sanju samson talks about the reason why Rajasthan royals loss against punjab kings