ന്യൂഡൽഹി: കേരളത്തിലെ സ്വാശ്രയ മെഡിക്കൽ കോളജുകളിൽ പഠിക്കുന്ന ബി.പി.എൽ (ദാരിദ്ര്യ രേഖയ്ക്കു താഴെയുള്ള വിഭാഗം) വിഭാഗത്തിലെ വിദ്യാർഥികളിൽനിന്ന് അധിക ഫീസ് ഈടാക്കരുതെന്ന് സുപ്രിംകോടതി. 
മെഡിക്കൽ വിദ്യാഭ്യാസ മേഖലയിലെ ഫീസ് നിർണയ സമിതി നിശ്ചയിച്ച സബ്സിഡി നിരക്കിലുള്ള ഫീസ് മാത്രമേ ബി.പി.എൽ വിഭാഗത്തിലെ കുട്ടികളിൽനിന്ന് ഈടാക്കാവൂ എന്ന് ജസ്റ്റിസ് സൂര്യകാന്ത് അധ്യക്ഷനായ സുപ്രിംകോടതി ബെഞ്ച് ഉത്തരവിട്ടു. നിലവിൽ മെഡിക്കൽ കോളജുകളിൽ പഠിക്കുന്ന വിദ്യാർഥികളിൽനിന്ന് അധിക ഫീസ് ഈടാക്കിയിട്ടുണ്ടെങ്കിൽ മൂന്നു മാസത്തിനുള്ളിൽ അതു വിദ്യാർഥികൾക്ക് തിരികെ നൽകണമെന്നും കോടതി ഉത്തരവിൽ വ്യക്തമാക്കി. 

അതേസമയം, എൻ.ആർ.ഐ ക്വാട്ടയിൽ പ്രവേശനം നേടിയ വിദ്യാർഥികളിൽനിന്ന് അധിക ഫീസ് ഈടാക്കാമെന്ന് കോടതി വ്യക്തമാക്കി. ബി.പി.എൽ വിഭാഗത്തിലെ വിദ്യാർഥികളുടെ ഫീസിനായി എൻ.ആർ.ഐ വിഭാഗത്തിലെ വിദ്യാർഥികളിൽനിന്ന് അഞ്ച് ലക്ഷം രൂപ അധികം  ഈടാക്കാനുള്ള സംസ്ഥാന സർക്കാർ സർക്കുലറിനെ ചോദ്യം ചെയ്ത് സമർപ്പിച്ച ഹരജിയിലാണ് കോടതി ഉത്തരവ്.  ഫീസ് നിർണയ സമിതി ശുപാർശയുടെ അടിസ്ഥാനത്തിലാണ് സർക്കാർ സർക്കുലർ പുറത്തിറക്കിയത്. ഇതു ചോദ്യംചെയ്ത് സ്വാശ്രയ മെഡിക്കൽ കോളജ് മാനേജ്മെന്റുകളും എൻ.ആർ.ഐ ക്വാട്ടയിൽ പ്രവേശനം നേടിയ ചില വിദ്യാർഥികളുമാണ് സുപ്രിംകോടതിയെ സമീപിച്ചത്. 

ഫീസ് സംബന്ധിച്ച വ്യവസ്ഥ നിയമനിർമാണത്തിലൂടെയാണ് കൊണ്ടുവരേണ്ടതെന്ന് കോടതി വ്യക്തമാക്കി. എൻ.ആർ.ഐ വിദ്യാർഥികളിൽനിന്ന് അധികമായി സമാഹരിച്ച തുക സർക്കാർ അടിയന്തരമായി ബി.പി.എൽ വിദ്യാർഥികളുടെ പഠനാവശ്യങ്ങൾക്ക് ഉപയോഗിക്കണമെന്നും ഇക്കാര്യം സംസ്ഥാന സർക്കാർ ഉറപ്പാക്കണമെന്നും കോടതി ഉത്തരവിൽ പറയുന്നു.

Self-financing medical colleges should not charge additional fees from BPL students Supreme Court orders