കൊച്ചി: എറണാകുളം നെടുമ്പാശ്ശേരിയില്‍ യുവാവിനെ കാറിടിപ്പിച്ച് കൊലപ്പെടുത്തിയ കേസിലെ പ്രതികളില്‍ ഒരാളെ കൊലപാതകത്തിന് ശേഷം രക്ഷപ്പെടാന്‍ സഹായിച്ചത് സി.ഐ.എസ്.എഫിലെ മുതിര്‍ന്ന ഉദ്യോഗസ്ഥനെന്ന് റിപ്പോര്‍ട്ട്. തൊട്ടടുത്ത ദിവസം പ്രതികളിലൊരാളായ കോണ്‍സ്റ്റബിള്‍ മോഹന് ഡ്യൂട്ടിയില്‍ കയറാനും ഇയാള്‍ അനുമതി നല്‍കിയെന്നും റിപ്പോര്‍ട്ട് വ്യക്തമാക്കുന്നു. ആരോപണ വിധേയനായ സി.ഐ.എസ്.എഫ് ഉദ്യോഗസ്ഥന്റെ മൊഴി പൊലിസ് രേഖപ്പെടുത്തുമെന്നും ഇയാള്‍ക്കെതിരെ വകുപ്പുതല നടപടി സ്വീകരിക്കുമെന്നും സൂചനയുണ്ട്.

ALSO READ: സിഐഎസ്എഫുകാർ കാർ ഇടിച്ചു യുവാവിനെ കൊലപ്പെടുത്തിയ സംഭവം; അന്വേഷണം ആരംഭിച്ച് പൊലിസ്

കേസിലെ രണ്ട് സി.ഐ.എസ്.എഫ് ഉദ്യോഗസ്ഥരെ കസ്റ്റഡിയില്‍ വിട്ടു കിട്ടാനുള്ള പൊലിസിന്റെ അപേക്ഷ കോടതി നാളെയാണ് പരിഗണിക്കുക്. ഈ മാസം 29 വരെയാണ് എസ്.ഐ വിനയ് കുമാര്‍ ദാസ്, കോണ്‍സ്റ്റബിള്‍ മോഹന്‍ കുമാര്‍ എന്നിവരെ അങ്കമാലി ജുഡീഷ്യല്‍ മജിസ്‌ട്രേറ്റ് കോടതി റിമാന്‍ഡ് ചെയ്തത്.

കൂടാതെ സംഭവത്തില്‍ സി.ഐ.എസ്.എഫിന്റെ ആഭ്യന്തര അന്വേഷണവും പുരോഗമിക്കുകയാണ്. റിപ്പോര്‍ട്ട് പരിശോധിച്ച ശേഷമായിരിക്കും പ്രതികളെ സര്‍വിസില്‍ നിന്നും പിരിച്ചു വിടണമോയെന്ന കാര്യത്തില്‍ അന്തിമ തീരുമാനം കൈക്കൊള്ളുകയെന്നാണ് വിവരം.