ന്യൂയോർക്ക്: ബ്രൂക്ലിൻ പാലത്തിൽ മെക്സിക്കൻ നാവികസേനയുടെ പരിശീലന കപ്പൽ ഇടിച്ചുകയറി രണ്ട് പേർ മരിച്ചു, 19 പേർക്ക് പരിക്കേറ്റു. മൂന്ന് പേരുടെ നില ഗുരുതരമാണെന്ന് അധികൃതർ അറിയിച്ചു. ശനിയാഴ്ച വൈകുന്നേരം നടന്ന അപകടത്തിൽ കപ്പലിന്റെ കൊടിമരങ്ങൾ പാലത്തിൽ ഇടിച്ച് തകർന്നു.

കുവാഹെമോക്ക് എന്ന കപ്പൽ പ്രശസ്തമായ ബ്രൂക്ലിൻ പാലത്തിനടിയിലൂടെ കടക്കവേ, കൊടിമരങ്ങളുടെ മുകൾഭാഗം പാലത്തിൽ ഉരസുകയായിരുന്നു. തകർന്ന കൊടിമരഭാഗങ്ങൾ ഡെക്കിൽ വീണതാണ് പരിക്കേറ്റതിന് പ്രധാന കാരണമെന്ന് അധികൃതർ വ്യക്തമാക്കി. അപകടസമയത്ത് ചില ജീവനക്കാർ കൊടിമരത്തിൽ ജോലി ചെയ്യുകയായിരുന്നു. ന്യൂയോർക്ക് പൊലീസ് ഡിപ്പാർട്ട്മെന്റ് ഓപ്പറേഷൻസ് മേധാവി പറഞ്ഞതനുസരിച്ച്, മെക്കാനിക്കൽ പ്രശ്നങ്ങളും വൈദ്യുതി മുടക്കവുമാണ് കപ്പൽ പാലത്തിന്റെ തൂണിൽ ഇടിക്കാൻ കാരണം. അപകടം നേരിൽ കണ്ട ജനക്കൂട്ടം, കൊടിമരങ്ങൾ പാലത്തിൽ ഇടിക്കുന്നതോടെ ഓടി രക്ഷപ്പെട്ടു.  

സൗഹൃദ സന്ദർശനത്തിനായി എത്തിയ കപ്പലിൽ 200-ലധികം ജീവനക്കാർ ഉണ്ടായിരുന്നു. അപകടത്തിന് തൊട്ടുമുമ്പ് കപ്പലിന്റെ വൈദ്യുതി നഷ്ടപ്പെട്ടതായി പ്രാദേശിക മാധ്യമങ്ങൾ റിപ്പോർട്ട് ചെയ്തു. ന്യൂയോർക്ക് മേയർ എറിക് ആഡംസ് നടത്തിയ വാർത്താസമ്മേളനത്തിൽ, ആരും വെള്ളത്തിൽ വീണിട്ടില്ലെന്നും പാലത്തിന് കാര്യമായ കേടുപാടുകൾ സംഭവിച്ചിട്ടില്ലെന്നും അറിയിച്ചു.

ന്യൂയോർക്ക് കോസ്റ്റ് ഗാർഡിന്റെ പ്രസ്താവനയിൽ, കപ്പലിന്റെ രണ്ട് കൊടിമരങ്ങളുടെ മുകൾഭാഗം നഷ്ടപ്പെട്ടതായും എല്ലാ ജീവനക്കാരെയും രക്ഷപ്പെടുത്തിയതായും വ്യക്തമാക്കി. പരിക്കേറ്റവരെ ആശുപത്രിയിലേക്ക് മാറ്റി. മെക്സിക്കൻ നാവികസേനയും കപ്പലിന് കേടുപാടുകൾ സംഭവിച്ചതായി സ്ഥിരീകരിച്ചു. സംഭവത്തെക്കുറിച്ച് അന്വേഷണം ആരംഭിച്ചിട്ടുണ്ട്.

297 അടി നീളവും 40 അടി വീതിയുമുള്ള ഈ കപ്പൽ 1982-ൽ സർവീസ് ആരംഭിച്ചതാണ്. എല്ലാ വർഷവും നാവിക സൈനിക സ്കൂളിലെ പരിശീലനം പൂർത്തിയാക്കുന്ന കേഡറ്റുകൾക്കായി കപ്പൽ യാത്ര നടത്താറുണ്ട്. ഈ വർഷം ഏപ്രിൽ 6-ന് 277 പേരുമായി മെക്സിക്കൻ തുറമുഖമായ അകാപുൾകോയിൽ നിന്ന് യാത്ര ആരംഭിച്ച കപ്പലിന്റെ അവസാന ലക്ഷ്യസ്ഥാനം ഐസ്‌ലാൻഡായിരുന്നു.