റിയാദ്: മക്ക റൂട്ട് ഇനിഷ്യേറ്റീവ് ആരംഭിച്ചതിനുശേഷം, പത്ത് ലക്ഷത്തിലധികം തീര്‍ത്ഥാടകരുടെ യാത്ര സുഗമമാക്കിയതായി സഊദി ആഭ്യന്തര മന്ത്രാലയം അറിയിച്ചു.

ഏഴാം വര്‍ഷത്തിലേക്ക് കടക്കുന്ന ഈ സംരംഭം വിദേശകാര്യ മന്ത്രാലയങ്ങള്‍, ആരോഗ്യം, ഹജ്ജ്, ഉംറ, മാധ്യമ മന്ത്രാലയങ്ങള്‍, സൗദി ഡാറ്റ ആന്‍ഡ് എഐ അതോറിറ്റി (എസ്ഡിഎഐഎ), സകാത്ത്, നികുതി, കസ്റ്റംസ് അതോറിറ്റി, ജനറല്‍ അതോറിറ്റി ഫോര്‍ ഔഖാഫ്, പില്‍ഗ്രിം എക്‌സ്പീരിയന്‍സ് പ്രോഗ്രാം, ജനറല്‍ ഡയറക്ടറേറ്റ് ഓഫ് പാസ്‌പോര്‍ട്ട്‌സ് എന്നിവയുള്‍പ്പെടെ പ്രധാന സര്‍ക്കാര്‍ സ്ഥാപനങ്ങളുടെ ഏകോപിത ശ്രമത്തിലൂടെയാണ് പ്രവര്‍ത്തിക്കുന്നത്

സഊദി വിഷന്‍ 2030ന് അനുസൃതമായി, മലേഷ്യ, ഇന്തോനേഷ്യ, പാകിസ്ഥാന്‍, ബംഗ്ലാദേശ്, മൊറോക്കോ, തുര്‍ക്കി, കോട്ട് ഡി ഐവയര്‍ എന്നീ ഏഴ് രാജ്യങ്ങളിലെ 11 വിമാനത്താവളങ്ങളിലെ പ്രീട്രാവല്‍ പ്രക്രിയകള്‍ പദ്ധതി കാര്യക്ഷമമായും സുഗമമായും കൈകാര്യം ചെയ്യുന്നു. 

തീര്‍ത്ഥാടകരുടെ മാതൃരാജ്യങ്ങളില്‍ ആരംഭിച്ച് പദ്ധതിയിലൂടെ ബയോമെട്രിക് ഡാറ്റ ശേഖരിക്കുകയും, ഇലക്ട്രോണിക് ഹജ്ജ് വിസകള്‍ നല്‍കുകയും, ആരോഗ്യ പ്രോട്ടോക്കോളുകള്‍ പാലിക്കുന്നുണ്ടെന്ന് ഉറപ്പാക്കുകയും ചെയ്യുന്നു.

ഗതാഗത, താമസ ക്രമീകരണങ്ങള്‍ക്കനുസൃതമായി ലഗേജുകള്‍ ശ്രദ്ധാപൂര്‍വ്വം ടാഗ് ചെയ്ത് ക്രമീകരിക്കുന്നു, മക്കയിലും മദീനയിലും എത്തുമ്പോള്‍ തീര്‍ഥാടകരെ നേരിട്ട് അവരുടെ വസതികളിലേക്ക് കൊണ്ടുപോകുന്നു, തുടങ്ങിയ വലിയ സേവനങ്ങളാണ് പദ്ധതിയിലൂടെ നടപ്പാക്കുന്നത്.

ബഹുഭാഷ കൈകാര്യം ചെയ്യാന്‍ കഴിയുന്ന യുവാക്കളുടെയും മറ്റും നേതൃത്വത്തില്‍, അത്യാധുനിക സാങ്കേതികവിദ്യയുടെ പിന്തുണയോടെ, പുണ്യ തീര്‍ത്ഥാടനം നടത്തുന്ന ദശലക്ഷക്കണക്കിന് ആളുകള്‍ക്ക് തടസ്സമില്ലാത്തതും ആത്മീയമായി സമ്പന്നവുമായ ഒരു യാത്ര പ്രദാനം ചെയ്യുക എന്നതാണ് മക്ക റൂട്ട് ഇനിഷ്യേറ്റീവ് കൊണ്ട് സഊദി സര്‍ക്കാര്‍ ലക്ഷ്യമിടുന്നത്.

2019ല്‍ ആരംഭിച്ച മക്ക റൂട്ട് പദ്ധതി സഊദി വിഷന്‍ 2030 പരിഷ്‌കരണ പദ്ധതിയുടെ ഭാഗമാണ്. തീര്‍ഥാടകരുടെ കസ്റ്റംസ് നടപടിക്രമങ്ങള്‍ ലളിതമാക്കുന്നതിനും സഊദിയിലേക്കുള്ള അവരുടെ തീര്‍ത്ഥാടന യാത്ര സുഗമമാക്കുവാനുമാണ് ഇത് രൂപകല്‍പ്പന ചെയ്തിരിക്കുന്നത്.

Over one million pilgrims have benefited from Saudi Arabia's Mecca Route Initiative, streamlining Hajj travel and enhancing pilgrim experience, says Interior Ministry.