ദുബൈ: യുഎഇയിലെ ഉന്നത വിദ്യാഭ്യാസ സ്ഥാപനങ്ങളിലെ 2024-25 അധ്യയന വര്‍ഷത്തിലെ വിദ്യാര്‍ത്ഥി പ്രവേശനത്തില്‍ 20 ശതമാനം വര്‍ധനവ് രേഖപ്പെടുത്തി. ദുബൈയിലെ 41 സ്വകാര്യ കോളേജുകള്‍, സര്‍വകലാശാലകള്‍, മറ്റ് ഉന്നത വിദ്യാഭ്യാസ സ്ഥാപനങ്ങള്‍ എന്നിവയിലായി ആകെ 42,026 വിദ്യാര്‍ത്ഥികളാണ് പ്രവേശനം നേടിയത്. ഇതുവരെയുള്ളതില്‍ വച്ച് ഏറ്റവും ഉയര്‍ന്ന സംഖ്യയാണിത്.

ഈ അധ്യയന വര്‍ഷത്തില്‍ സ്വകാര്യ ഉന്നത വിദ്യാഭ്യാസ മേഖലയില്‍ പ്രവേശനം നേടിയ  ഇമാറാത്തി വിദ്യാര്‍ത്ഥികളുടെ എണ്ണത്തില്‍ 22 ശതമാനം വര്‍ധനവ് രേഖപ്പെടുത്തി.

ദുബൈയില്‍ പഠനത്തിനായി പ്രത്യേകമായി എത്തിയ അന്താരാഷ്ട്ര വിദ്യാര്‍ത്ഥികളുടെ എണ്ണവും വര്‍ധിച്ചുകൊണ്ടിരിക്കുകയാണ്. മുന്‍ വര്‍ഷത്തെ അപേക്ഷിച്ച് അന്താരാഷ്ട്ര വിദ്യാര്‍ത്ഥികളുടെ പ്രവേശനത്തില്‍ 29 ശതമാനം വര്‍ധനവുണ്ടായി. ദുബൈയിലെ സ്വകാര്യ ഉന്നത വിദ്യാഭ്യാസ സ്ഥാപനങ്ങളിലെ മൊത്തം വിദ്യാര്‍ത്ഥികളുടെ 35 ശതമാനവും ഇപ്പോള്‍ അന്താരാഷ്ട്ര വിദ്യാര്‍ത്ഥികളാണ്.

ഇ33 സ്ട്രാറ്റജിയുടെ 'സിറ്റി ഓഫ് സ്റ്റുഡന്റ്‌സ് 'ഗെയിം ചേഞ്ചര്‍' പദ്ധതി പ്രകാരം, 2033 ആകുമ്പോഴേക്കും മൊത്തം വിദ്യാര്‍ത്ഥികളുടെ 50 ശതമാനം അന്താരാഷ്ട്ര വിദ്യാര്‍ത്ഥികളാക്കുക എന്നതാണ് ദുബൈയുടെ ലക്ഷ്യം. ഉന്നത വിദ്യാഭ്യാസത്തിന്റെ ആഗോള കേന്ദ്രമായി മാറാനുള്ള ദുബൈയുടെ നിരന്തരമായ ശ്രമങ്ങളുടെ ഫലമായാണ് വിദ്യഭ്യാസ മേഖലയിലെ ഈ പുതിയ നേട്ടം കൈവരിക്കാന്‍ അധികൃതര്‍ക്കായത്.

Dubai universities report a 20% increase in total student enrolment, with a significant surge in international students, reflecting the city’s growing education appeal.