ദുബൈ: പൊതുജന സുരക്ഷ ഉറപ്പാക്കുന്നതിന്റെ ഭാഗമായി അല്‍ സുബാറ ബീച്ചിലെ നീന്തല്‍ താല്‍ക്കാലികമായി നിര്‍ത്തിവച്ചതായി ഷാര്‍ജയിലെ ഖോര്‍ഫക്കാന്‍ മുനിസിപ്പാലിറ്റി  അറിയിച്ചു.

കടല്‍വെള്ളത്തില്‍ എണ്ണയുടെ അംശം കണ്ടെത്തിയതിനെ തുടര്‍ന്നാണ് മുനിസിപ്പാലിറ്റിയുടെ തീരുമാനം. പ്രശസ്തമായ ബീച്ച് സന്ദര്‍ശിക്കുന്ന സന്ദര്‍ശകരുടെ ആരോഗ്യവും മറ്റും കണക്കിലെടുത്താണ് മുനിസിപ്പാലിറ്റി അടിയന്തിര നടപടി കൈകൊണ്ടിരിക്കുന്നത്.

നീന്തല്‍ സൗകര്യം നിര്‍ത്തിവച്ചിരിക്കുന്നത് താല്‍ക്കാലികമാണെന്നും താമസക്കാര്‍ക്കും സന്ദര്‍ശകര്‍ക്കും ഒരുപോലെ ശുദ്ധവും സുരക്ഷിതവുമായ അന്തരീക്ഷം നിലനിര്‍ത്തുന്നതിനുള്ള നിരന്തരമായ പ്രതിബദ്ധതയുടെ ഭാഗമാണെന്നും അധികൃതര്‍ പറഞ്ഞു.

'നിങ്ങളുടെ സുരക്ഷയാണ് ഞങ്ങളുടെ മുന്‍ഗണന,' മുനിസിപ്പാലിറ്റി പറഞ്ഞു, സ്ഥിതിഗതികള്‍ നിരീക്ഷിക്കുന്നതിനും പ്രശ്‌നം എത്രയും വേഗം പരിഹരിക്കുന്നതിനും ബന്ധപ്പെട്ടവര്‍ ഉത്സാഹത്തോടെ പ്രവര്‍ത്തിക്കുന്നുണ്ടെന്നും മുനിസിപ്പാലിറ്റി കൂട്ടിച്ചേര്‍ത്തു.

ഇതുമൂലം ഉണ്ടായേക്കാവുന്ന ഏതൊരു അസൗകര്യത്തിനും മുനിസിപ്പാലിറ്റി പൊതുജനങ്ങളോട് ക്ഷമ ചോദിക്കുകയും ഈ സമയത്ത് പൊതുജനങ്ങള്‍ കാണിച്ച സഹകരണത്തിന് നന്ദി അറിയിക്കുകയും ചെയ്തു.

Authorities have temporarily suspended swimming at Al Subaiah Beach in Khorfakkan due to an oil spill, with cleanup operations currently underway.