ന്യൂഡല്‍ഹി: മുല്ലപ്പെരിയാര്‍ അണക്കെട്ടില്‍ അറ്റകുറ്റപ്പണി നടത്താന്‍ തമിഴ്‌നാടിന് സുപ്രീംകോടതി അനുമതി നല്‍കി. ബേബി ഡാം ശക്തിപ്പെടുത്തുന്നതിന്റെ ഭാഗമായി മരം മുറിയും ഗ്രൗട്ടിങ്ങുമടക്കമുള്ള പ്രവൃത്തികള്‍ നടത്താമെന്ന് സുപ്രീംകോടതി നിര്‍ദേശം. കേരളത്തിലെ ഉദ്യോഗസ്ഥന്റെ സാന്നിധ്യത്തിലാകണം അറ്റകുറ്റപ്പണികള്‍ നടത്തേണ്ടതെന്നും സുപ്രീംകോടതി വ്യക്തമാക്കി. 

മുല്ലപ്പെരിയാര്‍ അണക്കെട്ടില്‍ അറ്റകുറ്റ പണികള്‍ നടത്തണമെന്ന അപേക്ഷ തമിഴ്‌നാട് നേരത്തെ തന്നെ നല്‍കിയിരുന്നു.മുല്ലപ്പെരിയാര്‍ അണകെട്ട് സുരക്ഷിതമാണെന്നും, അണക്കെട്ടിലെ അറ്റകുറ്റ പണികള്‍ നടത്തിയാല്‍ ജല നിരപ്പ് 152 അടി വരെയായി ഉയര്‍ത്താമെന്നും ചൂണ്ടിക്കാട്ടി തമിഴ്‌നാട് ഇന്നലെ സത്യവാങ്മൂലം സമര്‍പ്പിച്ചിരുന്നു. 

കഴിഞ്ഞ തവണ കേസ് പരിഗണിച്ച സുപ്രീംകോടതി, മുല്ലപ്പെരിയാര്‍ അണക്കെട്ടുമായി ബന്ധപ്പെട്ട ഉന്നതാധികാരസമിതിയുടെ യോഗത്തിന്റെ മിനിട്‌സിലെ ശിപാര്‍ശകള്‍ നടപ്പാക്കാന്‍ കേരളത്തോടും തമിഴ്‌നാടിനോടും നിര്‍ദേശം നല്‍കിയെങ്കിലും അത് നടപ്പാക്കിയിരുന്നില്ല.