കോഴിക്കോട്: കോഴിക്കോട് പുതിയ ബസ് സ്റ്റാൻഡിൽ തീപിടുത്തം ഉണ്ടായ ടെക്സ്റ്റയിൽസിന്‌ എൻഒസി ഇല്ലെന്ന് ജില്ല ഫയർ ഓഫീസർ കെഎം അഷ്‌റഫ് അലി. തകർ ഷീറ്റുകൾ കൊണ്ട് അടച്ചതാണ് രക്ഷാപ്രവർത്തനം ദുഷ്കരമാക്കിയതെന്നും ഇടനാഴികളിൽ സാധനങ്ങൾ നിറച്ചിരുന്നുവെന്നും ജില്ല ഫയർ ഓഫീസർ വ്യക്തമാക്കി. തീപിടുത്തം ഉണ്ടാവാനുള്ള കാരണം ഫോറൻസിക്കിന്റെ പരിശോധനക്ക് ശേഷം മാത്രമേ വ്യക്തമാവുകയുള്ളുവെന്നും അഗ്നിരക്ഷാ വിഭാഗത്തിന് വീഴ്ച സംഭവിച്ചിട്ടില്ലെന്നും പരിശോധന റിപ്പോർട്ട് ജില്ല കളക്ടർക്ക് നൽകുമെന്നും കെഎം അഷ്‌റഫ് അലി പറഞ്ഞു. 

തീപിടുത്തം ഉണ്ടായ സ്ഥലങ്ങളിൽ ഫയർ ഫോഴ്സ്, ഫോറൻസിക്, പൊലിസ്, ഇലക്ട്രിക്കൽ കമ്മീഷണറേറ്റ് എന്നിവർ പരിശോധന നടത്തി. ഷോർട്ട് സർക്യൂട്ട് കാരണമാണ് അപകടം ഉണ്ടായതെന്നാണ് നിഗമനം. സംഭവത്തിൽ മറ്റ് ദുരൂഹതഹകൾ ഒന്നും ഇല്ലെന്നാണ് പൊലിസിന്റെ രഹസ്യാന്വേഷണ വിഭാഗം റിപ്പോർട്ട് നൽകിയത്. 

ഇന്നലെയാണ് കോഴിക്കോട് പുതിയ ബസ് സ്റ്റാൻഡിൽ തീപിടുത്തം ഉണ്ടായത്. കാലിക്കറ്റ് ടെക്സ്റ്റയിൽസ് എന്ന സ്ഥാപനത്തിനാണ് തീപിടിച്ചത്. സമീപത്തുള്ള കടകളിലും തീപിടുത്തം ഉണ്ടായി. വൈകുന്നേരം അഞ്ചു മണിയോടെയായിരുന്നു സംഭവം നടന്നത്. 

No NOC for textiles that caught fire in Kozhikode District Fire Officer Ashraf Ali