ന്യൂഡല്‍ഹി: ഓപ്പറേഷൻ സിന്ദൂറിന്റെ വിജയത്തിനുശേഷം കേണല്‍ സോഫിയ ഖുറേഷിയെ ലക്ഷ്യംവച്ച് മധ്യപ്രദേശ് മന്ത്രി കന്‍വര്‍ വിജയ് ഷാ നടത്തിയ വിദ്വേഷ പരാമര്‍ശം കടുത്ത പ്രതിഷേധങ്ങൾക്ക് വഴിവെച്ചു. കേസ് സുപ്രീംകോടതിയിലെത്തിയതോടെ കോടതി കടുത്ത നിലപാട് സ്വീകരിച്ചു. കേസിൽ പ്രത്യേക അന്വേഷണ സംഘം (SIT) രൂപീകരിക്കാൻ മധ്യപ്രദേശ് പൊലീസ് മേധാവിക്ക് കോടതി നിര്‍ദേശം നല്‍കി.

എസ്.ഐ.ടിയില്‍ വനിതാ ഉദ്യോഗസ്ഥയെ ഉൾപ്പെടെ മൂന്ന് ഐ.പി.എസ് ഉദ്യോഗസ്ഥർ ഉണ്ടായിരിക്കണം. ഇവരാരും മധ്യപ്രദേശ് സ്വദേശികളായിരിക്കരുതെന്നും, ഒരു ഐജി റാങ്കിലുള്ള ഉദ്യോഗസ്ഥന്‍റെ നേതൃത്വത്തിലായിരിക്കണം അന്വേഷണമെന്നും സുപ്രീംകോടതി വ്യക്തമാക്കി. മെയ് 28-നകം അന്വേഷണത്തിന്റെ തൽസ്ഥിതി റിപ്പോർട്ട് സമർപ്പിക്കാനും നിർദേശം നൽകി.

അറസ്റ്റ് താൽക്കാലികമായി തടഞ്ഞെങ്കിലും വിജയ് ഷാ അന്വേഷണത്തിൽ പൂർണ്ണ സഹകരണം നൽകണം എന്ന നിർദ്ദേശവും കോടതി പുറത്തിറക്കി. കേസിന്‍റെ അടുത്ത പരിഗണന മേയ് 28ന് നടക്കും.

മാപ്പ് പറയുന്നതിലൂടെ നിയമ നടപടികൾ ഒഴിവാക്കാമെന്ന ഉദ്ദേശത്തോടെയാണോ ഖേദപ്രകടനം നടത്തിയതെന്ന ചോദ്യം ഉന്നയിച്ച കോടതി, ക്ഷമാപണത്തിനു അടിസ്ഥാനമില്ലെന്നും പരാമർശങ്ങൾ ലജ്ജാകരമാണെന്നും കർശനമായി വിമർശിച്ചു. പൊതുപ്രവര്‍ത്തകനായ മന്ത്രി ഇത്തരം നിലപാട് സ്വീകരിക്കുന്നത് ഭരണഘടനാ മൂല്യങ്ങൾക്ക് വെല്ലുവിളിയാണെന്നും, നിയമം നിയമത്തിന്‍റെ വഴിയിലൂടെയേ പോകുമെന്നും സുപ്രീംകോടതി വ്യക്തമാക്കി.

പരാമർശം നടത്തിയതിലൂടെ വ്യക്തിപരമായും രാഷ്ട്രീയപരമായും വലിയ പ്രതികരണങ്ങൾക്കും വിവാദങ്ങൾക്കും ഇടയായ മന്ത്രി വിജയ് ഷായുടെ രാജിയാവശ്യപ്പെട്ട് രംഗത്തെത്തിയവരും ശക്തമായ പ്രതിഷേധം രേഖപ്പെടുത്തി. ബിജെപി അദ്ദേഹത്തെ സംരക്ഷിച്ചതിലും വിമർശനം ഉയർന്നിട്ടുണ്ട്.

The Supreme Court has ordered a Special Investigation Team (SIT) probe into hate remarks made by Madhya Pradesh Minister Kunwar Vijay Shah against Colonel Sophia Qureshi following the success of Operation Sindoori. The SIT will include three IPS officers, including a woman, none of whom should be from Madhya Pradesh. The court criticized the minister’s comments as “disgraceful and below dignity,” rejecting his apology and warning against politicizing the issue. The court also stayed Shah’s arrest temporarily but instructed full cooperation with the probe. A status report is due by May 28.