ദുബൈ: ഒരു ടണ്‍ മയക്കുമരുന്ന് യുഎഇയിലേക്ക് കടത്താനുള്ള ശ്രമം പരാജയപ്പെടുത്തി ദുബായ് കസ്റ്റംസ്. 40 വീപ്പകളിലായി ഒളിപ്പിച്ചുവച്ച മാരക മയക്കുമരുന്ന് എയര്‍ കാര്‍ഗോ വഴി കടത്തുന്നതിനിടെയാണ് കസ്റ്റംസ് പിടികൂടിയത്. പ്രെഗബാലിന്‍ എന്നറിയപ്പെടുന്ന മരുന്ന് ദുബൈയിലേക്ക് വരികയായിരുന്ന എയര്‍ കാര്‍ഗോ ഷിപ്പ്‌മെന്റുകളില്‍ 40 ബാരലുകളില്‍ ഒളിപ്പിച്ചുവച്ചിരിക്കുകയായിരുന്നു.

ദുബായ് കസ്റ്റംസിന്റെ നൂതന സംവിധാനങ്ങള്‍ ഉപയോഗിച്ച് നടത്തിയ പരിശോധനയില്‍ കാര്‍ഗോയില്‍ സംശയാസ്പദമായ വസ്തുക്കള്‍ ഉണ്ടെന്ന് കണ്ടെത്തി. തുടര്‍ന്ന് നടത്തിയ സമഗ്രമായ അന്വേഷണത്തിലാണ് ഇവ പിടിച്ചെടുത്തത്. പിടിച്ചെടുത്ത വസ്തു വിശകലനം ചെയ്ത ശേഷം നിരോധിത മയക്കുമരുന്ന് ആണെന്ന് ബോധ്യപ്പെട്ടതോടെ അധികാരികള്‍ നടപടികളിലേക്ക് നീങ്ങുകയായിരുന്നു. പ്രതികള്‍ക്കെതിരെ നിയമനടപടികള്‍ പുരോഗമിക്കുകയാണെന്ന് അറിയിച്ച ദുബൈ കസ്റ്റംസ്, എന്നാല്‍ അവരുടെ പേര് വിവരങ്ങള്‍ വെളിപ്പെടുത്തിയില്ല.

വ്യാപാരം സുഗമമാക്കുന്നതിനും കള്ളക്കടത്തിന്റെ അപകടങ്ങളില്‍ നിന്ന് സമൂഹത്തെ സംരക്ഷിക്കുന്നതിനും ഇടയില്‍ സന്തുലിതാവസ്ഥ കൈവരിക്കാന്‍ ദുബായ് കസ്റ്റംസ് ശ്രമിക്കുന്നുണ്ടെന്ന് ദുബായ് കസ്റ്റംസ് ഡയറക്ടര്‍ ജനറല്‍ ഡോ. അബ്ദുല്ല മുഹമ്മദ് ബുസെനാദ് സ്ഥിരീകരിച്ചു.

അപസ്മാരം, നാഡി വേദന, ഉത്കണ്ഠ എന്നിവ ചികിത്സിക്കാന്‍ ഉപയോഗിക്കുന്ന മരുന്നാണ് പ്രീഗബാലിന്‍. ഗാബപെന്റിനോയിഡുകള്‍ എന്നറിയപ്പെടുന്ന മരുന്നുകളുടെ വിഭാഗത്തില്‍പ്പെട്ടതാണിത്. ഇവ പലപ്പോഴും ഒപിയോയിഡുകള്‍ക്ക് പകരമായി നിര്‍ദ്ദേശിക്കപ്പെടുന്നു. മരണസംഖ്യ വര്‍ദ്ധിച്ചുവരുന്നതിനാല്‍, പ്രീഗബാലിന്‍ നിര്‍ദ്ദേശിക്കുന്നതിനുള്ള നിയന്ത്രണങ്ങള്‍ ബ്രിട്ടീഷ് സര്‍ക്കാര്‍ കര്‍ശനമാക്കിയിട്ടുണ്ട്. യുഎഇയില്‍ ഇത് നിയന്ത്രിത മരുന്നുകളുടെ പട്ടികയിലാണ്.

Dubai Customs foil attempt to smuggle one tonne of drug into UAE