ഡല്‍ഹി: സംഭല്‍ ഷാഹി മസ്ജിദിലെ സര്‍വേ ഉത്തരവ് അലഹബാദ് ഹൈക്കോടതി ശരിവച്ചു. വിചാരണ കോടതി ഉത്തരവില്‍ ഒരു പ്രശ്‌നവുമില്ലെന്ന് ചൂണ്ടിക്കാട്ടിയ അലഹബാദ് കോടതി സര്‍വേ ചോദ്യം ചെയ്ത് മസ്ജിദ് കമ്മിറ്റി നല്‍കിയ ഹരജി തള്ളി. 

നവംബര്‍ അവസാനം ഷാഹി മസ്ജിദില്‍ സര്‍വേക്കെത്തിയ സംഘത്തിന് നേര്‍ക്ക് പ്രതിഷേധിച്ചവര്‍ക്കെതിരേ പൊലിസ് നടത്തിയ വെടിവയ്പ്പില്‍ അഞ്ചുപേരാണ് കൊല്ലപ്പെട്ടത്. പൊലിസിന് നേരെ കല്ലെറിഞ്ഞുവെന്നാരോപിച്ചായിരുന്നു വെടിവയ്പ്പ്. സംഘര്‍ഷവുമായി ബന്ധപ്പെട്ട് നൂറുകണക്കിന് പേര്‍ക്കെതിരെയാണ് കേസെടുത്തത്.

പുരാതന ഹിന്ദു ക്ഷേത്രമായ ഹരിഹര്‍മന്ദിര്‍ തകര്‍ത്താണ് മുഗള്‍ കാലഘട്ടത്തില്‍ പള്ളി നിര്‍മിച്ചതെന്ന അവകാശവാദവുമായി ഹിന്ദുത്വ സംഘടനകള്‍ രംഗത്തെച്ചിയതിന് പിന്നാലെയാണ് തര്‍ക്കം ആരംഭിക്കുന്നത്. പിന്നീട് സംഭല്‍ കോടതി സര്‍വേയ്ക്ക് ഉത്തരവിട്ടു. കോടതിവിധി വന്ന് മണിക്കൂറുകള്‍ക്കകം തന്നെ മസ്ജിദില്‍ പ്രാഥമിക സര്‍വേ നടത്തി. സര്‍വേയുടെ തുടക്കം മുതല്‍ ഉദ്യോഗസ്ഥ സംഘം പ്രകോപനങ്ങള്‍ സൃഷ്ടിച്ചിരുന്നു. സര്‍വേയ്ക്കായി ഉദ്യോഗസ്ഥരും അഭിഭാഷകരും ജയ് ശ്രീറാം വിളികളോടെയാണെത്തിയത്. മസ്ജിദിനകത്തുണ്ടായിരുന്ന എല്ലാവരേയും പുറത്താക്കി. ദീര്‍ഘ നേരത്തെ അഭ്യര്‍ഥനയ്‌ക്കൊടുവിലാണ് ഇമാമിനെ പള്ളിയില്‍ തന്നെ തുടരാന്‍ അനുവദിച്ചത്. 

പള്ളിക്കു പുറത്ത് ധാരാളം വിശ്വാസികള്‍ തടിച്ചുകൂടിയിരുന്നു. ഇതിനിടെ, ഒരു കൂട്ടം ഹിന്ദുത്വവാദികള്‍ പ്രകോപനപരമായ രൂപത്തില്‍ ജയ്ശ്രീറാം വിളിച്ചുവന്ന് പ്രശ്‌നങ്ങള്‍ സൃഷ്ടിക്കുകയായിരുന്നു. പൊലിസ് പൊടുന്നനെ ലാത്തിവീശി. ടിയര്‍ ഗ്യാസ് പ്രയോഗിച്ചു. തൊട്ടുപിന്നാലെ ജനക്കൂട്ടത്തിനു നേരെ നിറയൊഴിക്കുകയും ചെയ്തു. പൊലിസ് വെടിവെപ്പില്‍ അഞ്ച് മുസ്ലിം ചെറുപ്പക്കാര്‍ പേര്‍ കൊല്ലപ്പെടുകയും നിരവധി പേര്‍ക്ക് പരുക്കേല്‍ക്കുകയും ചെയ്തിരുന്നു.