കൊച്ചി: ജൂനിയര്‍ അഭിഭാഷകയെ മര്‍ദ്ദിച്ച കേസില്‍ സീനിയര്‍ അഭിഭാഷകന്‍ ബെയ്‌റിമാന്‍ലിന്‍ ദാസിന് ജാമ്യം. റമാന്‍ഡിലായ നാലാം ദിനമാണ് ഇയാള്‍ക്ക് ജാമ്യം അനുവദിക്കുന്നത്. ബെയ്ലിന്‍ ദാസിനെ 27 വരെയാണ് റിമാന്‍ഡില്‍ വിട്ടിരുന്നത്.

ജൂനിയര്‍ അഭിഭാഷക ശ്യാമിലി ജസ്റ്റിനെ മര്‍ദിച്ച കേസില്‍ സ്റ്റേഷന്‍ കടവില്‍ നിന്നാണ് ദാസിനെ കസ്റ്റഡിയിലെടുത്തത്. കയ്യേറ്റം, സ്ത്രീത്വത്തെ അപമാനിക്കല്‍ തുടങ്ങിയ കുറ്റങ്ങള്‍ ചുമത്തിയാണ് വഞ്ചിയൂര്‍ പൊലിസ് കേസെടുത്തത്. 

വഞ്ചിയൂര്‍ മഹാറാണി ബില്‍ഡിംഗിലെ ബെയ്‌ലിന്റെ ഓഫിസില്‍ ചൊവ്വാഴ്ച ഉച്ചയ്ക്ക് 12:30-നാണ് മര്‍ദനം നടന്നത്. ശ്യാമിലിയും ബെയ്‌ലിനും തമ്മില്‍ രാവിലെ തര്‍ക്കമുണ്ടായിരുന്നു. ജൂനിയര്‍ അഭിഭാഷകയെ മാറ്റണമെന്ന ബെയ്‌ലിന്റെ ആവശ്യത്തെ തുടര്‍ന്നുണ്ടായ വാഗ്വാദം ആക്രമണത്തില്‍ കലാശിച്ചു. മുഖത്ത് ചതവേറ്റ ശ്യാമിലി ജനറല്‍ ആശുപത്രിയില്‍ പിന്നീട് ചികിത്സ തേടുകയാണുണ്ടായത്.

തിരുവനന്തപുരം സെഷന്‍സ് കോടതിയില്‍ മുന്‍കൂര്‍ ജാമ്യാപേക്ഷ നല്‍കിയ ബെയ്‌ലിന്‍, തനിക്കെതിരെ ചുമത്തിയ വകുപ്പുകള്‍ നിലനില്‍ക്കില്ലെന്നും ബോധപൂര്‍വം സ്ത്രീത്വത്തെ അപമാനിച്ചിട്ടില്ലെന്നും വാദിച്ചു. എന്നാല്‍, ശ്യാമിലി ബാര്‍ കൗണ്‍സിലിന് നല്‍കിയ പരാതിയില്‍, ബെയ്‌ലിന്‍ തന്നെ മര്‍ദിക്കുകയും അപമാനിക്കുകയും ചെയ്തതായി ആരോപിച്ചു. ബെയ്‌ലിന്റെ ഭാര്യക്ക് വഞ്ചിയൂര്‍ പൊലിസ് നോട്ടിസ് നല്‍കി, ചോദ്യം ചെയ്യലിനായി സ്റ്റേഷനില്‍ ഹാജരാകാന്‍ ആവശ്യപ്പെട്ടു. 

സംഭവത്തിന് പിന്നാലെ ബാര്‍ കൗണ്‍സിലും ബാര്‍ അസോസിയേഷനും ബെയ്‌ലിനെ താത്കാലികമായി സസ്പെന്‍ഡ് ചെയ്തിരുന്നു. വിശദമായ അന്വേഷണം നടത്തി കുറ്റക്കാരനെന്ന് കണ്ടെത്തിയാല്‍ കര്‍ശന നടപടി സ്വീകരിക്കുമെന്നും ബാര്‍ കൗണ്‍സില്‍ വ്യക്തമാക്കി. ബെയ്‌ലിന്റെ അഭിഭാഷക അംഗത്വം റദ്ദാക്കണമെന്ന് ബാര്‍ അസോസിയേഷന്‍ ബാര്‍ കൗണ്‍സിലിന് ശുപാര്‍ശ നല്‍കിയിട്ടുണ്ട്.