റിയാദ്: ഇസ്‌റാഈലുമായുള്ള സംഘര്‍ഷത്തില്‍ കുടുംബാംഗങ്ങളെ നഷ്ടപ്പെട്ട ആയിരം പലസ്തീനികളെ ഹജ്ജ് കര്‍മം ചെയ്യാന്‍ ക്ഷണിച്ച് സഊദി അറേബ്യ. ഇവരുടെ എല്ലാ ചെലവുകളും സഊദി രാജാവ് സല്‍മാന്‍ ബിന്‍ അബ്ദുല്‍ അസീസ് വഹിക്കുമെന്നാണ് പുറത്തുവരുന്ന വിവരം.

ഇസ്‌റാഈലിന്റെ ആക്രമണങ്ങളില്‍ തടവിലാക്കപ്പെട്ടവരോ പരുക്കേറ്റവരോ ആയ ഫലസ്തീനികളുടെ ബന്ധുക്കളെയും വിശുദ്ധ ഹജ്ജ് കര്‍മം നിര്‍വഹിക്കാനായി ക്ഷണിച്ചിട്ടുണ്ട്.

ഹജ്ജ് സീസണ്‍ അറഫാദിനത്തില്‍ അവസാനിക്കും. മാസപ്പിറവിയെ അടിസ്ഥാനമാക്കി ഈ വര്‍ഷം ജൂണ്‍ 5 നോ 6 നോ ആയിരിക്കും അറഫാദിനം.

ഫലസ്തീന്‍ തീര്‍ത്ഥാടകര്‍ക്ക് അവരുടെ ജന്മദേശം വിടുന്ന നിമിഷം മുതല്‍ രാജ്യത്ത് എത്തിച്ചേരുന്നതുവരെ ആവശ്യമായ എല്ലാ സേവനങ്ങളും സൗകര്യങ്ങളും നല്‍കുന്നതിനായി ഒരു സമഗ്ര എക്‌സിക്യൂട്ടീവ് പ്ലാന്‍ നടപ്പിലാക്കിയതായി സഊദി വാര്‍ത്താ ഏജന്‍സി തിങ്കളാഴ്ച അറിയിച്ചു. സഊദി ഇസ്‌ലാമിക കാര്യ, ദഅ്വ, ഗൈഡന്‍സ് മന്ത്രാലയമാകും ഇത് നടപ്പിലാക്കുക.

വര്‍ഷങ്ങളായി തുടരുന്ന ഗസ്സയിലെ ഇസ്‌റാഈല്‍ ആക്രമണം പ്രദേശത്തെ തകര്‍ത്തിരുന്നു. ഏകദേശം 20 ലക്ഷം ഗസ്സക്കാര്‍ക്കാണ് അവരുടെ കിടപ്പാടം നഷ്ടമായത്. 

കഴിഞ്ഞ ഒന്നര വര്‍ഷത്തിനിടെ മാത്രം 53,000 ത്തിലധികം ആളുകളെയാണ് ഇസ്‌റാഈല്‍ കൊന്നൊടുക്കിയത്. ഇവരില്‍ ഭൂരിഭാഗവും സാധാരണക്കാരാണെന്ന് ഗസ്സ ആരോഗ്യ അധികൃതര്‍ വ്യക്തമാക്കിയിരുന്നു. മാര്‍ച്ച് ആദ്യം മുതല്‍ ഗസ്സയിലേക്കുള്ള മെഡിക്കല്‍, ഭക്ഷ്യ, ഇന്ധന വിതരണങ്ങള്‍ ഇസ്‌റാഈല്‍ തടഞ്ഞുവച്ചിരിക്കുകയാണ്. 

Saudi Arabia has announced free Hajj for 1,000 Palestinian pilgrims as part of its humanitarian initiative for Hajj 2025.