മുംബൈ: 2025 ഐപിഎൽ അവസാനഘട്ടത്തിലേക്ക് കടന്നിരിക്കുകയാണ്. ഇതിനോടകം തന്നെ മൂന്ന് ടീമുകൾ പ്ലേ ഓഫ് ഉറപ്പിച്ചു കഴിഞ്ഞു. പഞ്ചാബ് കിങ്‌സ്, റോയൽ ചലഞ്ചേഴ്‌സ് ബെംഗളൂരു, ഗുജറാത്ത് ടൈറ്റൻസ് എന്നീ ടീമുകളാണ് പ്ലേ ഓഫ് യോഗ്യത ഉറപ്പിച്ചത്. നാലാമതായി പ്ലേ ഓഫിൽ ഇടം നേടാൻ മുംബൈ ഇന്ത്യൻസും ഡൽഹി ക്യാപ്പിറ്റൽസുമാണ് ഇനി ശക്തമായ പോരാട്ടം നടക്കുന്നത്, നാളെയാണ് ഡൽഹിയും മുംബൈയും തമ്മിലുള്ള പോരാട്ടം നടക്കുന്നത്. ഇപ്പോൾ ഈ നിർണായകമായ മത്സരത്തിന് മുന്നോടിയായി മുംബൈ ടീം പുതിയ മൂന്ന് താരങ്ങളെ ടീമിൽ എത്തിച്ചിരിക്കുകയാണ്.

വിൽ ജാക്‌സിന് പകരക്കാരനായി ജോണി ബെയർസ്‌റ്റോയും റിക്കെൽട്ടണിന് പകരക്കാരനായി ഗ്ലീസനും ബോഷിന് പകരക്കാരനായി അസലങ്കയുമാണ് മുംബൈ ടീമിൽ എത്തിയിരിക്കുന്നത്. മുംബൈ പ്ലേ ഓഫിൽ എത്തിയാൽ മാത്രമേ ഈ മൂന്ന് താരങ്ങൾക്കും മുംബൈക്കായി കളിക്കാൻ സാധിക്കൂ. 

അതേസമയം മെയ് 29ന് ആരംഭിക്കുന്ന വെസ്റ്റ് ഇൻഡീസിനെതിരായ ഏകദിന, ടി-20 പരമ്പരക്കുള്ള ഇംഗ്ലണ്ട് ടീമിൽ ഇടം നേടിയതിനാലാണ് വിൽ ജാക്സ് നാട്ടിലേക്ക് മടങ്ങുന്നത്. ഈ സാഹചര്യത്തിലാണ് ജോണി ബെയർസ്‌റ്റോയെ ടീമിലെത്തിക്കാൻ മുംബൈ തീരുമാനിച്ചത്. 

2024 ജൂൺ മുതൽ ബെയർസ്‌റ്റോ ഇംഗ്ലണ്ടിനായി കളിച്ചിട്ടില്ല. ഐപിഎല്ലിൽ കളിച്ച മികച്ച പരിചയസമ്പത്തുള്ള താരം കൂടിയാണ് ജോണി ബെയർസ്‌റ്റോ. ഐപിഎല്ലിൽ 50 മത്സരങ്ങളിൽ നിന്നും 1589 റൺസ് ആണ് ബെയർസ്‌റ്റോ നേടിയിട്ടുള്ളത്. 34.54 ആവറേജിലും 144.46 സ്ട്രൈക്ക് റേറ്റിലും ആണ് താരം ബാറ്റ് വീശിയിട്ടുള്ളത്. വിൽ ജാക്സ് ഈ സീസണിൽ ഒമ്പത് ഇന്നിംഗ്‌സുകളിൽ നിന്നുമായി 195 റൺസാണ് നേടിയിട്ടുള്ളത്. 

നിലവിൽ ഐപിഎൽ പോയിന്റ് പട്ടികയിൽ നാലാം സ്ഥാനത്താണ് മുംബൈ ഇന്ത്യൻസ്. 12 മത്സരങ്ങളിൽ നിന്നും ഏഴ് വിജയവും അഞ്ചു തോൽവിയും അടക്കം 14 പോയിന്റാണ് മുംബൈക്കുള്ളത്. നാളെ ഡെൽഹിക്കെതിരായ മത്സരത്തിന് ശേഷം ഗ്രൂപ്പ് ഘട്ടത്തിലെ അവസാന മത്സരത്തിൽ  മെയ് 26ന് പഞ്ചാബ് കിങ്സിനെയും മുംബൈ നേരിടും. 

 Mumbai Indians sign Three Star Players for play off In IPL 2025