മുംബൈ: ഇന്ത്യയിലെ പ്രമുഖ വ്യവസായിയും റിലയൻസ് ഇൻഡസ്ട്രീസ് ചെയർമാനുമായ മുകേഷ് അംബാനിയും ഭാര്യ നിത അംബാനിയും ടൈം മാഗസിന്റെ ആദ്യത്തെ ‘ ടൈം 100 ഫിലാൻട്രോപ്പി ലിസ്റ്റ് 2025’-ൽ അംഗങ്ങളായി തിരഞ്ഞെടുക്കപ്പെട്ടു. സമ്പത്തിനൊപ്പം സാമൂഹിക ഉത്തരവാദിത്തത്തിലും ഇരുവരും മികച്ച പങ്കാളികളാണെന്ന് ഈ അംഗീകാരം തെളിയിക്കുന്നു.

2024-ൽ മാത്രം 407 കോടി രൂപ സാമൂഹിക മേഖലകളിലേക്കായി സംഭാവന ചെയ്ത ദമ്പതികൾ, ഇന്ത്യയിലെ മുൻനിര ഫിലാന്ത്രോപ്പിസ്റ്റുകളായാണ് പട്ടികയിൽ ഉൾപ്പെടുത്തപ്പെട്ടത്. ഈ സംഭാവനകൾ പ്രധാനമായും റിലയൻസ് ഫൗണ്ടേഷൻ മുഖേനയാണ് നടത്തുന്നത്. ആരോഗ്യപരിരക്ഷ, വിദ്യാഭ്യാസം, ഗ്രാമവികസനം, സ്ത്രീശാക്തീകരണം, കായികം എന്നിവയാണ് പ്രധാന പദ്ധതികൾ.

ടൈം മാഗസിൻ ഇത്തരത്തിലുള്ള സാമൂഹിക പ്രതിബദ്ധതകൾക്ക് പ്രാധാന്യം നൽകി കൊണ്ട് ഇക്കൊല്ലത്തെ പട്ടികയിൽ ഇടം നൽകി. കുടുംബത്തിന്റെ നേതൃത്വം കൊണ്ട് ദശലക്ഷക്കണക്കിന് ആളുകളുടെ ജീവിതത്തിൽ മാറ്റം വന്നതായും സാമൂഹിക നന്മയ്ക്കായുള്ള അതിന്റെ വ്യാപനം റിലയൻസ് ബിസിനസ്സ് സാമ്രാജ്യത്തിന്റെ വ്യാപ്തിയെ അനുസ്മരിപ്പിക്കുന്നതായും ടൈം വിലയിരുത്തുന്നു.

നിത അംബാനി റിലയൻസ് ഫൗണ്ടേഷൻ സ്പോർട്സ് സംരംഭങ്ങൾക്കും മുംബൈ ഇന്ത്യൻസ് ഐപിഎൽ ടീമിന്റെ സഹ ഉടമയായിട്ടും കായികരംഗത്തെ വികസന പ്രവർത്തനങ്ങൾക്കും നേതൃത്വം നൽകുന്നു. യുവതികളുടെയും ദാരിദ്ര്യരേഖയ്ക്കടിയിലുള്ളവരുടെയും ഉന്നമനമാണ് ഇവരുടെ പ്രധാന ലക്ഷ്യം.

ടൈം 100 ഫിലാൻട്രോപ്പി ലിസ്റ്റി-ൽ അസിം പ്രേംജിയെ ‘ടൈറ്റൻ’ വിഭാഗത്തിലും, സെറോദ സഹസ്ഥാപകനായ നിഖിൽ കാമത്തിനെ ‘ട്രെയിൽബ്ലേസേഴ്സ്’ വിഭാഗത്തിലും ഉൾപ്പെടുത്തിയിട്ടുണ്ട്.