കൊച്ചി: ചികിത്സിക്കുമ്പോൾ ഗുരുതരമായ വീഴ്ചയോ മനഃപൂർവമല്ലാത്ത ഉദാസീനതയോ മൂലം രോഗി മരിച്ചാൽ ഡോക്ടർക്കെതിരെ ക്രിമിനൽ കുറ്റം ചുമത്താനാവില്ലെന്ന് കേരള ഹൈക്കോടതി. ചികിത്സയിൽ ഉണ്ടാകുന്ന എല്ലാ മരണങ്ങൾക്കും ഡോക്ടർമാരെ കുറ്റപ്പെടുത്താനാവില്ലെന്നും ജസ്റ്റിസ് ജി. ഗിരീഷ് വ്യക്തമാക്കി. എറണാകുളത്തെ സ്വകാര്യ ആശുപത്രിയിലെ ഗ്യാസ്ട്രോ എന്ററോളജി സ്പെഷലിസ്റ്റ് ഡോ. ജോസഫ് ജോണിനെതിരെ, രോഗി മരിച്ചതുമായി ബന്ധപ്പെട്ട കേസിൽ എറണാകുളം അഡീഷനൽ ചീഫ് ജുഡീഷ്യൽ മജിസ്ട്രേറ്റ് കോടതിയിലെ നടപടികൾ റദ്ദാക്കിയാണ് കോടതി ഈ വിധി പുറപ്പെടുവിച്ചത്. രോഗിയുടെ ജീവൻ രക്ഷിക്കാൻ കഠിനമായി പരിശ്രമിച്ച ഒരു ഡോക്ടറെ, നിരാശരായവരുടെ മനോഭാവത്തിന്റെ പേര് പറഞ്ഞ് കുറ്റപ്പെടുത്താൻ ശ്രമിക്കുന്നത് ഒഴിവാക്കണം. ചികിത്സയിലെ ഓരോ മരണത്തിനും ഡോക്ടർമാരെ ശിക്ഷിക്കാനാവില്ല,” ജസ്റ്റിസ് ജി. ഗിരീഷ് പറഞ്ഞു.

വൃക്ക മാറ്റിവയ്ക്കൽ ശസ്ത്രക്രിയ കഴിഞ്ഞ് 10 മാസത്തിന് ശേഷം വയറുവേദനയും ഛർദിയും മൂലം ആശുപത്രിയിൽ പ്രവേശിപ്പിച്ച 29-കാരൻ മരിച്ച സംഭവത്തിലാണ് ഡോ. ജോസഫ് ജോണിനെതിരെ കേസെടുത്തത്. രാത്രി വൈകി രോഗിയുടെ സങ്കീർണതകൾ അറിഞ്ഞ ഡോക്ടർ, ഡ്യൂട്ടി നഴ്സിന് ഫോണിലൂടെ മരുന്നുകളും ഡയഗ്നോസ്റ്റിക് പരിശോധനകളും നിർദേശിച്ചിരുന്നു. എന്നാൽ, വൃക്കസംബന്ധമായ തകരാറുകൾ മൂലം 34 മണിക്കൂറിനുള്ളിൽ രോഗി മരിച്ചു. രോഗിയുടെ പിതാവ് മെഡിക്കൽ അനാസ്ഥ ആരോപിച്ച് പരാതി നൽകി. എന്നാൽ, വിദഗ്ധ പാനലുകൾ ഡോക്ടർ ശരിയായ ചികിത്സ നൽകിയെന്ന് റിപ്പോർട്ട് ചെയ്തിരുന്നു.

സംസ്ഥാനതല പരമോന്നത സമിതി, നേരിട്ടുള്ള മെഡിക്കൽ വിലയിരുത്തലിന് പകരം ഫോണിലൂടെ ചികിത്സ നൽകിയതിന് ഡോക്ടർക്ക് പിഴവ് കണ്ടെത്തി. ഇതിന്റെ അടിസ്ഥാനത്തിൽ ഇന്ത്യൻ ശിക്ഷാ നിയമത്തിലെ സെക്ഷൻ 304 എ പ്രകാരം അശ്രദ്ധമൂലം മരണത്തിന് കാരണമായ കുറ്റത്തിന് ഡോ. ജോണിനെതിരെ ക്രിമിനൽ കേസ് ആരംഭിച്ചു. ഇത് റദ്ദാക്കണമെന്ന് ആവശ്യപ്പെട്ടാണ് ഡോ. ജോൺ ഹൈക്കോടതിയെ സമീപിച്ചത്.

ഗുരുതരമായ അനാസ്ഥയോ വിവേകശൂന്യമായ അശ്രദ്ധയോ ഉണ്ടായിട്ടില്ലെങ്കിൽ ഡോക്ടർമാരെ ക്രിമിനൽ കുറ്റം ചുമത്തുന്നത് നിയമപ്രക്രിയയുടെ ദുരുപയോഗമാണെന്ന് കോടതി നിരീക്ഷിച്ചു. ഡോ. ജോൺ സാധാരണ മെഡിക്കൽ രീതികൾക്കുള്ളിൽ പ്രവർത്തിച്ചതായും ഗുരുതര വീഴ്ച ഉണ്ടായിട്ടില്ലെന്നും കോടതി വ്യക്തമാക്കി. സുപ്രീം കോടതി വിധികൾ ഉദ്ധരിച്ച്, ഗുരുതരമായ തെളിവുകളില്ലാതെ ഡോക്ടർമാരെ കുറ്റപ്പെടുത്തുന്നത് സമൂഹത്തോടുള്ള അനീതിയാണെന്നും കോടതി ചൂണ്ടിക്കാട്ടി.

ഡോ. ജോണിന് വേണ്ടി അഭിഭാഷകരായ സി.ആർ. ശ്യാംകുമാർ, പി.എ. മുഹമ്മദ് ഷാ, സൂരജ് ടി. ഇലഞ്ഞിക്കൽ, കെ. അർജുൻ വേണുഗോപാൽ, വി.എ. ഹരിത, സിദ്ധാർത്ഥ് ബി. പ്രസാദ്, ആർ. നന്ദഗോപാൽ, ഗായത്രി മുരളീധരൻ എന്നിവർ ഹാജരായി. സംസ്ഥാനത്തിന് വേണ്ടി പബ്ലിക് പ്രോസിക്യൂട്ടർ സംഗീതരാജ് എൻ.ആർ. ഹാജരായി.