അബുദാബി: യുഎഇയിലെ ആദ്യത്തെ പറക്കും ടാക്‌സിയുടെ (UAE Flying Taxi) പരീക്ഷണ ഓട്ടം ജൂലൈയില്‍ തുടങ്ങും. ഈ വര്‍ഷം അവസാനത്തോടെ പൂര്‍ണ്ണ സര്‍വീസ് ആരംഭിക്കുന്നതിന് മുന്നോടിയായാണ് അല്‍ ഐനില്‍ ട്രയല്‍ റണ്‍ നടത്തുന്നത്. ഹെലികോപ്റ്ററുകളുടെയും eVTOL (Electric vertical take-off and landing aircraft) കളുടെയും പ്രവര്‍ത്തനങ്ങള്‍ക്കായി അബുദാബി ക്രൂയിസ് ടെര്‍മിനല്‍ ഹെലിപാഡിനെ ഹൈബ്രിഡ് ഹെലിപോര്‍ട്ടാക്കി മാറ്റുന്നതിനുള്ള രൂപകല്‍പ്പനയ്ക്ക് ജിസിഎഎ അംഗീകാരം നല്‍കിയിട്ടുണ്ട്. പുതിയ സംവിധാനം ദുബായിക്കും അബുദാബിക്കും ഇടയിലുള്ള രണ്ട് മൂന്ന് മണിക്കൂര്‍ യാത്രാ സമയം വെറും 15നും 20 നും ഇടയില്‍ മിനിറ്റ് സമയമായി കുറയ്ക്കും.

 

 

പറക്കും ടാക്‌സി ഇറക്കാനായി വര്‍ഷങ്ങളായി യുഎഇയുടെ ജനറല്‍ സിവില്‍ ഏവിയേഷന്‍ അതോറിറ്റിയുമായി (ജിസിഎഎ) ഞങ്ങള്‍ സഹകരിച്ച് വരികയാണെന്നും പദ്ധതിയുടെ ചുമതലയുള്ള ആര്‍ച്ചര്‍ ഏവിയേഷന്റെ സിഇഒ ആദം ഗോള്‍ഡ്‌സ്‌റ്റൈന്‍ പറഞ്ഞു. അംഗീകാരത്തിന്റെ അവസാന ഘട്ടത്തിലാണ് ഞങ്ങള്‍. അബുദാബിയില്‍ കൊണ്ടുവരുന്നതിനുമുമ്പ് അല്‍ ഐനില്‍ പറക്കല്‍ ആരംഭിക്കാന്‍ പോകുകയാണ്. ഈ വര്‍ഷം അവസാനത്തോടെ അബുദാബിയില്‍ (പറക്കും ടാക്‌സി) ആരംഭിക്കുക എന്നതാണ് ഞങ്ങളുടെ ലക്ഷ്യം. ലോകത്ത് ആദ്യമായി ഇത് ഇവിടെ ആരംഭിക്കുന്നതില്‍ സന്തോഷമുണ്ട്. താരതമ്യേന ചെറുതായി ആരംഭിച്ച് പ്രവര്‍ത്തനങ്ങള്‍ എങ്ങനെ പ്രവര്‍ത്തിക്കുമെന്ന് ഞങ്ങള്‍ കാണും. കമ്മ്യൂണിറ്റികളെ ഉള്‍പ്പെടുത്തി വിമാനം എത്ര സുരക്ഷിതവും നിശബ്ദവുമാണെന്ന് ഞങ്ങള്‍ കാണിക്കും. തുടര്‍ന്ന് കാലക്രമേണ അത് വ്യാപിപ്പിക്കുകയാണ് ലക്ഷ്യം - അദ്ദേഹം പറഞ്ഞു.

 

 

ആര്‍ച്ചറിന്റെ ആപ്പ് അല്ലെങ്കില്‍ അബുദാബി സര്‍ക്കാര്‍ നല്‍കുന്ന ആപ്പ് വഴി ടാക്‌സി ബുക്ക് ചെയ്യാന്‍ കഴിയും. കാറില്‍ ഒന്നര മണിക്കൂര്‍ എടുക്കുന്ന യാത്രയ്ക്ക് ഫ്‌ലൈയിങ് ടാക്‌സിയില്‍ 10 മുതല്‍ 20 മിനിറ്റ് മതി. നഗരത്തിനുള്ളിലെ സേവനത്തിന് കുറഞ്ഞത് 300 ദിര്‍ഹമായിരിക്കും നിരക്കെന്നാണ് സൂചന. എന്നാല്‍ ഇത് അന്തിമമാക്കിയിട്ടില്ല. ഭൂമിയില്‍നിന്നും 500 മുതല്‍ 3000 മീറ്റര്‍ വരെ ഉയരത്തിലാകും ഇത് പറക്കുക. ഇതിനായി ജനറല്‍ സിവില്‍ ഏവിയേഷന്‍ അതോറിറ്റി (ജിസിഎഎ) പ്രത്യേക വ്യോമപാത ഒരുക്കിയിട്ടുണ്ട്. 

Trials of the UAE’s first flying taxi will begin in Al Ain in a few months ahead of the roll-out of the full service at the end of this year, a senior official said