ലണ്ടൻ: യൂറോപ്പാ ലീഗ് ചാംപ്യൻമാരായി ടോട്ടൻഹാം യുനൈറ്റഡ്. ഫൈനലിൽ മാഞ്ചസ്റ്റർ യുനൈറ്റഡിനെ പരാജയപ്പെടുത്തി. സ്‌പെയിനിലെ ബിൽബാവോയിലെ സാൻ മാമെസ് സ്‌റ്റേഡിയത്തിൽ നടന്ന മത്സരത്തിൽ ഏകപക്ഷീയമായ ഒരു ​ഗോളിനായിരുന്നു ടോട്ടൻ ഹാമിന്റെ വിജയം. മത്സരത്തിന്റെ 42ാം മിനിറ്റിൽ ബ്രണ്ണൻ ജോൺസണായിരുന്നു ടോടൻഹാമിന്റെ വിജയ ​ഗോൾ നേടിയത്. മത്സരത്തിന്റെ 74 ശതമാനവും പന്ത് കൈവശം വെച്ച യുനൈറ്റഡ് ആറ് ഷോട്ടുകളാണ് ടാർ​ഗറ്റിലേക്ക് ഉതിർത്തത്. എന്നാൽ മികച്ച സേവുകളുമായി കളം നിറഞ്ഞ ​ഗോൾകീപ്പർ വികാരിയോയുടെ പ്രകടനം ടോട്ടൻഹാമിന് കിരീടം നേടിക്കൊടുക്കുന്നതിൽ ഏറെ നിർണായകമായി. 

ഇതോടെ ടോടൻഹാമിന്റെ 17 വർഷത്തെ കിരീടവരൾ‌ച്ചക്കാണ് അവസനമാകുന്നത്. 2008ൽ ഇം​ഗ്ലീഷ് ഫുട്ബോൾ ലീ​ഗ് കിരീടമാണ് ടോട്ടനം അവസാനമായി നേടിയ ചാംപ്യൻഷിപ്പ്. അതേസമയം, 41 വർഷത്തിന് ശേഷമാണ് ഒരു യൂറോപ്പ്യൻ ഫുട്ബോൾ കിരീടം എന്ന ടോടൻഹാമിന്റെ സ്വപ്നവും ഇതോടെ സഫലമായി. 1984ലെ യുവേഫ കപ്പ് കിരീടമായിരുന്നു ടോട്ടൻഹാം അവസാനമായി നേടിയത്.

ഈ കിരീടം സ്വന്തമാക്കിയതോടെ സ്പർസിന്റെ അർജന്റൈൻ ഡിഫൻഡർ ക്രിസ്റ്റ്യാൻ റൊമേറോ തന്റെ കരിയറിൽ സമീപകാലങ്ങളിൽ നേടിയ കിരീടങ്ങളുടെ എണ്ണം അഞ്ചാക്കി ഉയർത്തിയിരിക്കുകയാണ്. കളിച്ച അഞ്ചു ഫൈനലിലും താരം ചാമ്പ്യനായിട്ടുണ്ട് എന്നതാണ് ഏറെ ശ്രദ്ധേയം. 2021, 2024 കോപ്പ അമേരിക്ക, 2022 ലോകകപ്പ്, 2022 ഫൈനൽ സീമ എന്നീ കിരീടങ്ങൾ അർജന്റീനക്കൊപ്പം താരം നേടിയിട്ടുണ്ട്. ഇപ്പോൾ ടോട്ടൻഹാമിനൊപ്പം മറ്റൊരു ഫൈനലിൽ കൂടി താരം കിരീടവേട്ട തുടർന്നിരിക്കുകയാണ്. 

ഇരു ടീമുകളും പ്രീമിയർ ലീഗിൽ ഇത്തവണ മോശം ഫോമിൽ ആണെങ്കിലും യൂറോപ്പാ ലീഗിൽ ഫൈനൽവരെ എത്തിയിരുന്നു. സീസണിൽ 37 മത്സരം പൂർത്തിയാക്കിയ മാഞ്ചസ്റ്റർ യുനൈറ്റഡ് 39 പോയിന്റുമായി പട്ടികയിൽ പതിനാറാം സ്ഥാനത്താണ്. 10 വിജയം, ഒൻപത് സമനില, 18 തോൽവി എന്നിവയാണ് യുനൈറ്റഡ് നേടിയത്.

37 മത്സരം പൂർത്തിയാക്കിയ ടോട്ടനം യുനൈറ്റഡ് തൊട്ടുതാഴെ 17ാം സ്ഥാനത്താണുള്ളത്. 38 പോയിന്റ് നേടിയ ടോട്ടനം 11 മത്സരത്തിൽ ജയിച്ചപ്പോൾ 21 മത്സരത്തിൽ തോൽവി വഴങ്ങുകയും ചെയ്തു. അഞ്ച് മത്സരത്തിൽ സമനില വഴങ്ങി. പ്രീമിയർ ലീഗിൽ മോശം ഫോം തുടർന്നപ്പോഴും ഇരു ടീമുകളും യൂറോപ്പാ ലീഗിൽ മികച്ച പ്രകടനമായിരുന്നു പുറത്തെടുത്തത്. 

ഈ സീസണിൽ ഇരു ടീമുകളും നേർക്കുനേർ വന്ന മൂന്ന് മത്സരത്തിലും ജയം ടോട്ടനത്തിനൊപ്പമായിരുന്നു. ഒരു മത്സരം ലീഗ് കപ്പിൽ ജയിച്ചപ്പോൾ പ്രീമിയർ ലീഗിൽ രണ്ട് തവണയും ജയം ടോട്ടനത്തിനൊപ്പമായിരുന്നു. ഓൾഡ് ട്രാഫോർഡിൽ നടന്ന മത്സരത്തിൽ എതിരില്ലാത്ത മൂന്ന് ഗോളിന് യുനൈറ്റഡിനെ തോൽപ്പിച്ച ടോട്ടനം സ്വന്തം തട്ടകത്തിൽ നടന്ന പോരാട്ടത്തിൽ എതിരില്ലാത്ത ഒരു ഗോളിനായിരുന്നു ജയം. 

cristian romero Record Title wins in recent years in football