ക്രോയേഷ്യൻ ഇതിഹാസ താരം ലൂക്ക മോഡ്രിച്ച് റയൽ മാഡ്രിഡ് വിടുന്നുവെന്ന വാർത്ത കഴിഞ്ഞ ദിവസമാണ് ഫുട്ബോൾ ലോകത്തെ അറിയിച്ചത്. തന്റെ സോഷ്യൽ മീഡിയ അക്കൗണ്ടിലൂടെയാണ് മോഡ്രിച്ച് ഇക്കാര്യം പുറത്തുവിട്ടത്. മോഡ്രിച്ചിന്റെ വിരമിക്കൽ പ്രഖ്യാപനത്തിന് പിന്നാലെ റയലിന്റെ എക്കാലത്തെയും മികച്ച ഇതിഹാസ താരമായ ക്രിസ്റ്റ്യാനോ റൊണാൾഡോ പ്രതികരിക്കുകയും ചെയ്തു. കളിക്കളത്തിൽ മോഡ്രിച്ചുമായി മികച്ച നിമിഷങ്ങൾ പങ്കിടാൻ സാധിച്ചത് ഒരു വലിയ ബഹുമതിയായി കാണുന്നുവെന്നാണ് റൊണാൾഡോ തന്റെ സോഷ്യൽ മീഡിയ അക്കൗണ്ടിൽ കുറിച്ചത്. 

''എല്ലാത്തിനും നന്ദി, ലൂക്ക! ക്ലബ്ബിൽ നിങ്ങളുമായി നിരവധി നിമിഷങ്ങൾ പങ്കിടാൻ കഴിഞ്ഞത് ഒരു ബഹുമതിയായി കാണുന്നു. ഇനി വരാനിരിക്കുന്ന കാര്യങ്ങളിൽ നിങ്ങൾക്ക് ഞാൻ വിജയം ആശംസിക്കുന്നു'' റൊണാൾഡോ സോഷ്യൽ മീഡിയയിൽ കുറിച്ചു 

റൊണാൾഡോയും മോഡ്രിച്ചും റയൽ മാഡ്രിഡിനായി 222 മത്സരങ്ങളിൽ ഒരുമിച്ച് ബൂട്ട് കിട്ടിയിട്ടുള്ളത്. ഇരുവരും ചേർന്ന് 16 സംയുക്ത ഗോളുകളും നേടിയിട്ടുണ്ട്. 

2012ൽ സ്പാനിഷ് ക്ലബിന് വേണ്ടി അരങ്ങേറ്റം കുറിച്ച മോഡ്രിച്ച് ഐതിഹാസികമായ ഫുട്ബോൾ കരിയറാണ് കെട്ടിപ്പടുത്തുയർത്തിയത്. ആറ് ചാമ്പ്യൻസ് ലീഗുകളും നാല് ലാലിഗ കിരീടങ്ങളും ഉൾപ്പെടെ 28 ട്രോഫികളാണ് താരം റയലിനൊപ്പം നേടിയത്. റയലിനായി 590 മത്സരങ്ങളിൽ നിന്ന് 43 ഗോളുകളും 95 അസിസ്റ്റുകളും ആണ് മോഡ്രിച്ച് നേടിയിട്ടുള്ളത്. 

2012ൽ ബാഴ്‌സലോണയ്‌ക്കെതിരായ മത്സരത്തിലാണ് ലൂക്ക റയലിനായി അരങ്ങേറ്റം കുറിച്ചത്. പിന്നീട് ലൂക്ക മോഡ്രിച്ച് റയൽ മാഡ്രിഡിന്റെ മധ്യനിരയിലെ ഏറ്റവും മികച്ച താരമായി സ്വയം അടയാളപ്പെടുത്തുകയായിരുന്നു. മോഡ്രിച്ചിനെ പോലുള്ള ഒരു മികച്ച താരത്തിന്റെ അഭാവം വരും സീസണിൽ റയലിന്റെ മധ്യനിരയിൽ വലിയൊരു വിടവ് തന്നെയായിരിക്കും സൃഷ്ടിക്കുക.

ഈ സീസണിലും റയലിനായി മികച്ച പ്രകടനമാണ് താരം പുറത്തെടുത്തത്. ഈ സീസണിൽ 55 മത്സരങ്ങളിൽ നിന്നും നാല് ഗോളുകളും ഒമ്പത് അസിസ്റ്റുകളും ആണ് താരം നേടിയത്. എന്നാൽ തന്റെ അവസാന സീസണിൽ ടീമിനൊപ്പം ചാമ്പ്യൻസ് ലീഗ്, ലാ ലിഗ എന്നീ കിരീടങ്ങൾ സ്വന്തമാക്കാൻ മോഡ്രിച്ചിന് സാധിക്കാതെ പോയി. 

Cristiano Ronaldo reacts to Luka Modrics decision to leave Real Madrid