പാരീസ്: സുപ്രീം കൗണ്‍സില്‍ അംഗവും ഷാര്‍ജ ഭരണാധികാരിയുമായ ഷെയ്ഖ് ഡോ. സുല്‍ത്താന്‍ ബിന്‍ മുഹമ്മദ് അല്‍ ഖാസിമിയെ ആദരിച്ച് യുനെസ്‌കോ. അറബി ഭാഷയുടെ ചരിത്ര നിഘണ്ടു നിര്‍മ്മാണം പൂര്‍ത്തിയാക്കിയതി്‌നാണ് യുനെസ്‌കോ സുല്‍ത്താന്‍ അല്‍ ഖാസിമിയെ ആദരിച്ചത്. പാരീസിലെ യുനെസ്‌കോയുടെ ആസ്ഥാനത്ത് വെച്ച് നടന്ന ചടങ്ങില്‍ വെച്ചായിരുന്നു ആദരം. ചടങ്ങില്‍, ഷാര്‍ജ ഭരണാധികാരിയുടെ പത്‌നിയും സുപ്രീം കൗണ്‍സില്‍ ഫോര്‍ ഫാമിലി അഫയേഴ്സ് (SCFA) ചെയര്‍പേഴ്സണുമായ ഷെയ്ഖ ജവഹര്‍ ബിന്‍ത് മുഹമ്മദ് അല്‍ ഖാസിമി, ഷാര്‍ജ ബുക്ക് അതോറിറ്റി (SBA) ചെയര്‍പേഴ്സണ്‍ ഷെയ്ഖ ബൊദൂര്‍ ബിന്‍ത് സുല്‍ത്താന്‍ അല്‍ ഖാസിമി എന്നിവരും പങ്കെടുത്തു

യുനെസ്‌കോ ആസ്ഥാനത്ത് എത്തിയ അദ്ദേഹത്തെ യുനെസ്‌കോ ഡയറക്ടര്‍ ജനറല്‍ ഓഡ്രി അസോലെ, ഫ്രാന്‍സിലെ യുഎഇ അംബാസഡര്‍ ഫഹദ് സയീദ് അല്‍ റഖ്ബാനി, ഷാര്‍ജ സാംസ്‌കാരിക വകുപ്പ് ചെയര്‍മാന്‍ അബ്ദുല്ല ബിന്‍ മുഹമ്മദ് അല്‍ ഒവൈസ്, അല്‍ ഖാസിമിയ സര്‍വകലാശാല പ്രസിഡന്റ് ജമാല്‍ അല്‍-തുറൈഫി, ഷാര്‍ജ ബുക്ക് അതോറിറ്റി സിഇഒ അഹമ്മദ് ബിന്‍ റക്കാദ് അല്‍ അമേരി, യുനെസ്‌കോയിലെ സ്ഥിരം യുഎഇ പ്രതിനിധി അലി അല്‍-ഹാജ് അല്‍ അലി, ഷാര്‍ജ ബ്രോഡ്കാസ്റ്റിംഗ് അതോറിറ്റി ഡയറക്ടര്‍ ജനറല്‍ മുഹമ്മദ് ഹസ്സന്‍ ഖലഫ് എന്നിവര്‍ ചേര്‍ന്ന് സ്വീകരിച്ചു.

എല്ലാ ഭാഷകള്‍ക്കും നിലനില്‍ക്കാനും പരിണമിക്കാനും തുല്യ അവകാശമുണ്ടെന്ന് ഷാര്‍ജ ഭരണാധികാരി പറഞ്ഞു. അറബി ഭാഷയുടെ ചരിത്ര നിഘണ്ടുവിന് അംഗീകാരം നല്‍കിയതിനും ഷാര്‍ജയും സംഘടനയും തമ്മിലുള്ള സഹകരണ സാംസ്‌കാരിക സംരംഭങ്ങള്‍ക്കും അദ്ദേഹം യുനെസ്‌കോയ്ക്ക് നന്ദി അറിയിച്ചു.

ഷാര്‍ജ പ്രതിനിധി സംഘത്തിന്റെ പാരീസ് സന്ദര്‍ശനത്തില്‍ യുനെസ്‌കോ അധികൃതര്‍ സന്തോഷം പ്രകടിപ്പിച്ചു. ഷാര്‍ജയെ സംസ്‌കാരത്തിന്റെയും അറിവിന്റെയും കാര്യത്തില്‍ മുന്‍നിരയില്‍ എത്തിച്ച ഷെയ്ഖ് ഡോ. സുല്‍ത്താന്‍ ബിന്‍ മുഹമ്മദ് അല്‍ ഖാസിമിയുടെ ദീര്‍ഘവീക്ഷണത്തെ യുനെസ്‌കോ തലവന്‍ അസോലെ പ്രശംസിച്ചു.

ഷാര്‍ജ ഭരണാധികാരിയുടെ നേതൃത്വത്തില്‍ തയ്യാറാക്കിയ അറബി ഭാഷയുടെ ചരിത്ര നിഘണ്ടു വിജയകരമായി പൂര്‍ത്തിയാക്കിയതിന് അസോലെ നന്ദി അറിയിച്ചു. അറബ് ലോകത്തെ 20 ഭാഷാ സ്ഥാപനങ്ങളില്‍ നിന്നുള്ള നിരവധി ഗവേഷകരും എഡിറ്റര്‍മാരും ചേര്‍ന്ന് നിര്‍മ്മിച്ച നിഘണ്ടു ഏറ്റവും വലിയ ചരിത്ര നിഘണ്ടുവായി ഗിന്നസ് വേള്‍ഡ് റെക്കോര്‍ഡും നേടിയിട്ടുണ്ട്.

UNESCO recognizes the Ruler of Sharjah for his pivotal role in completing the Arabic Language Historical Dictionary, a milestone in linguistic preservation.