കൽപറ്റ: മൊബൈൽ ഫോൺ ഉപയോഗിച്ചുവെന്നാരോപിച്ച് യുവാവിനെ ബലം പ്രയോഗിച്ച് കസ്റ്റഡിയിൽ എടുത്തതിന്റെ പേരിൽ കൽപ്പറ്റ ട്രാഫിക് എസ്‌ഐക്ക് സ്ഥലംമാറ്റം. ട്രാഫിക് എസ്‌ഐ വി പി ആൻ്റണിയെയാണ് നടപടിയുടെ ഭാഗമായി സ്ഥലം മാറ്റിയത്. മലപ്പുറം സ്വദേശിയായ ഷംനൂൻ എന്ന യുവാവിനോട് "മലപ്പുറത്തെ അഭ്യാസം ഇവിടെ വേണ്ടെന്ന് പറയുന്ന എസ്‌ഐയുടെ വീഡിയോ പുറത്തുവന്നതോടെയാണ് സംഭവം വിവാദമായത്.

വാഹനം ഓടിക്കുന്നതിനിടെ മൊബൈൽ ഫോൺ ഉപയോഗിച്ചുവെന്ന് പൊലീസ് ആരോപിച്ചെങ്കിലും താൻ ബ്ലൂടൂത്ത് വഴിയാണ് സംസാരിച്ചതെന്നാണ് ഷംനൂന്റെ വിശദീകരണം. ഇതിനെ തുടർന്ന് ഫൈൻ അടക്കണമെന്ന പൊലീസ് ആവശ്യം തർക്കമായി മാറുകയും, പിന്നീട് എസ്‌ഐ യുവാവിനെ ബലംപ്രയോഗിച്ച് കസ്റ്റഡിയിൽ എടുത്തുവെന്നും കാറും പിടിച്ചെടുത്തുവെന്നും റിപ്പോർട്ടുകളുണ്ട്.

അതുമാത്രമല്ല, യുവാവിനെ കസ്റ്റഡിയിൽ കൊണ്ടുപോകുന്നതിനിടെ പൊലീസ് വാഹനം ഒരു ഓട്ടോറിക്ഷയിൽ തട്ടിയതും തർക്കം ശക്തമാകാൻ കാരണമായതായി ആരോപണം ഉണ്ട്. ഇയാളെ കസ്റ്റഡിയിൽ എടുത്തെങ്കിലും പിന്നീട് അറസ്റ്റ് രേഖപ്പെടുത്തി ജാമ്യത്തിൽ വിട്ടയച്ചു.

സമൂഹമാധ്യമങ്ങളിൽ വീഡിയോ വൈറലായതോടെയാണ് സംഭവം പൊതു ശ്രദ്ധ പിടിച്ചുപറ്റിയത്. നടപടികളോട് സഹകരിച്ചില്ലന്നായിരുന്നു എസ്‌ഐ ആൻറണിയുടെ വിശദീകരണം. എന്നിരുന്നാലും, അധികാരപദവി ദുരുപയോഗം ചെയ്തുവെന്നാരോപിച്ചാണ് സ്ഥലംമാറ്റിയത്.