നിലമ്പൂര്‍: എം. സ്വരാജ് എംഎല്‍എയുടെ പ്രസ്താവനക്കെതിരേ പോത്തുകല്ലില്‍ എ.ഐ.വൈ.എഫ് മണ്ഡലം കമ്മറ്റി സംഘടിപ്പിച്ച പൊതുസമ്മേളനം കഴിഞ്ഞു മടങ്ങുകയായിരുന്ന മണ്ഡലം ഭാരവാഹികളെ മര്‍ദ്ദിക്കുകയും സി.പി.ഐ കോഴിക്കോട് ജില്ലാ അസി. സെക്രട്ടറി ശശിയെ അക്രമിക്കാന്‍ ശ്രമിക്കുകയും ചെയ്ത ഡി.വൈ.എഫ്.ഐയുടെ നിലപാടില്‍ പ്രതിഷേധിച്ചു സി.പി.ഐ നിലമ്പൂര്‍ മണ്ഡലം കമ്മറ്റിയുടെ നേതൃത്വത്തില്‍ ടൗണില്‍ പ്രകടനം നടത്തി. എം സ്വരാജ് എംഎല്‍എക്കും ഡിവൈ.എഫ്.ഐക്കുമെതിരേ ശക്തമായ മുദ്രാവാക്യങ്ങളാണു പ്രകടനത്തില്‍ മുഴങ്ങിയത്.
മണ്ഡലം സെക്രട്ടറി ആര്‍.പാര്‍ഥസാരഥി ഉദ്ഘാടനം ചെയ്തു. സ്വരാജിന്റെ മണ്ഡലമായ തൃപ്പൂണിത്തുറയില്‍ നിന്നും സി.പി.എം പുറത്താക്കിയവര്‍ സി.പി.ഐയില്‍ ചേര്‍ത്തതാണു സ്വരാജിനെ ചൊടിപ്പിച്ചത്. സി.പി.ഐക്കെതിരേ വിമര്‍ശനം നടത്തിയ സ്വരാജിനെതിരെയുള്ള പ്രതിഷേധം വരും ദിവസങ്ങളില്‍ ശക്തമാകുമെന്ന് സി.പി.ഐ നേതാക്കള്‍ അറിയിച്ചു.
സ്വരാജ് പ്രീഡിഗ്രിക്ക് പഠിച്ചപ്പോള്‍ ജില്ല കണ്ട മുതിര്‍ന്ന നേതാക്കളില്‍ ഒരാളായ ദേവദാസ് പൊറ്റേക്കാട് പ്രവര്‍ത്തിച്ചിരുന്ന പാര്‍ട്ടി ഏതാണെന്ന് ഓര്‍ക്കുന്നത് നന്നായിരിക്കുമെന്നും നേതാക്കള്‍ പറഞ്ഞു. സ്വന്തം നേതാവിനെ പട്ടിക്കൂട്ടില്‍ അടക്കാന്‍ പറഞ്ഞ സ്വരാജിന്റെ ധിക്കാര രാഷ്ട്രീയം സി.പി.ഐയോടു വേണ്ടെന്നും നേതാക്കള്‍ പറഞ്ഞു.
ജില്ലാ കമ്മറ്റി അംഗം കെ. മനോജ്, നിലമ്പൂര്‍ ലോക്കല്‍ സെക്രട്ടറി പി.എം ബഷീര്‍, എ.ഐ.വൈ.എഫ് ജില്ലാ സെക്രട്ടറി ഷറഫുദ്ദീന്‍ എന്നിവര്‍ പ്രസംഗിച്ചു.  നിലമ്പൂര്‍ ടി.ബിയില്‍ നിന്നും ആരംഭിച്ച പ്രകടനം ബൈപ്പാസ് റോഡ് വഴി ടൗണില്‍ സമാപിച്ചു.