ഇനി ട്രെയിന്‍ വ്‌ളോഗുകള്‍ വേണ്ടെന്ന് റെയില്‍വേ. സ്‌റ്റേഷനുകളുടെയോ, ട്രെയിനുകളുടെയോ ഫോട്ടോകളോ, വീഡിയകളോ എടുക്കുന്നത് ഒഴിവാക്കണമെന്ന് ആവശ്യപ്പെട്ട് രംഗത്തെത്തിയിരിക്കുകയാണ് ഈസ്റ്റേണ്‍ റെയില്‍വേ ഡിപ്പാര്‍ട്ട്‌മെന്റ്. യൂട്യൂബര്‍മാരും, ബ്ലോഗര്‍മാരും റെയില്‍വേ സ്‌റ്റേഷനുകളുടെ വിശദമായ വീഡിയോ കവര്‍ ചെയ്യുന്നത് നിര്‍ത്താനാണ് നിര്‍ദേശം. രാജ്യസുരക്ഷ മുന്‍നിര്‍ത്തിയാണ് പുതിയ നീക്കം. 

പാകിസ്താന് വേണ്ടി ചാരപ്രവര്‍ത്തിക്കേസില്‍ ഹരിയാനയിലെ യൂട്യൂബറായ ജ്യോതി മല്‍ഹോത്ര അറസ്റ്റിലായതിന് പിന്നാലെയാണ് ഈസ്റ്റേണ്‍ റെയില്‍വേയുടെ നടപടി. 

ഈസ്റ്റേണ്‍ റെയില്‍വേക്ക് കീഴിലുള്ള സ്റ്റേഷനുകളില്‍ ഇനി മുതല്‍ ഉദ്യോഗസ്ഥര്‍ നിരീക്ഷണം കര്‍ശനമാക്കും. പ്രധാനപ്പെട്ട സ്റ്റേഷനുകളുടെ ഫോട്ടോകളോ, വീഡിയോകളോ എടുക്കുന്നില്ലെന്ന് ഉറപ്പാക്കണം. രാജ്യത്തുടനീളം ഉയര്‍ന്നുവരുന്ന സാഹചര്യവും, മുന്നറിയിപ്പുകളും കണക്കിലെടുത്ത് നിരീക്ഷണം വര്‍ധിപ്പിക്കാന്‍ തീരുമാനിച്ചതായും ഈസ്റ്റേണ്‍ റെയില്‍വേ അധികൃതര്‍ പറഞ്ഞു. 

ALSO READ: ഐസ്ആര്‍ഒയില്‍ അരലക്ഷം തുടക്ക ശമ്പളത്തില്‍ ജോലി; ഇതാണവസരം; 320 ഒഴിവുകള്‍ Read more 

സാധാരണ പൗരന്‍മാര്‍ക്ക് സ്റ്റേഷനുകളുടെ ദൃശ്യങ്ങള്‍ ചിത്രീകരിക്കുന്നതിന് ഇതിനോടകം തന്നെ വിലക്ക് നിലവിലുണ്ട്. ഇതിന് പുറമെയാണ് യൂട്യൂബ് ക്രിയേറ്റര്‍മാര്‍ക്കും നിയന്ത്രണം ഏര്‍പ്പെടുത്തി ഉത്തരവിട്ടിരിക്കുന്നത്. പലരും ഇത് പാലിക്കുന്നില്ലെന്നതാണ് വസ്തുത. 

അതേസമയം മാധ്യമങ്ങള്‍ക്ക് വാര്‍ത്ത റിപ്പോര്‍ട്ട് ചെയ്യുന്നതിന് പ്രത്യേക അനുമതി നല്‍കുമെന്ന് റെയില്‍വേ അധികൃതര്‍ വ്യക്തമാക്കി. രാജ്യത്തുടനീളം കഴിഞ്ഞ കുറച്ച് നാളുകളായി നടത്തുന്ന സുരക്ഷ ക്രമീകരണങ്ങളുടെ ഭാഗമാണ് പുതിയ തീരുമാനം.

The Eastern Railway Department has requested people to avoid taking photos or videos of stations and trains.