കോട്ടയം: കാലവർഷം ശക്തമായതിന്റെ പശ്ചാത്തലത്തിൽ കോട്ടയത്ത് വള്ളം മറിഞ്ഞ് രണ്ട് മത്സ്യത്തൊഴിലാളികൾ മരിച്ചു. കൊല്ലാട് സ്വദേശികളായ വി.ജെ. ജോബി (36), പോളച്ചിറയിൽ അരുൺ സാം (37) എന്നിവരാണ് മരിച്ചത്. കൊല്ലാട് പാറക്കടവിൽ മീൻ പിടിക്കാൻ പോയ വള്ളം ഉച്ചയ്ക്ക് രണ്ട് മണിയോടെ മറിഞ്ഞാണ് അപകടം ഉണ്ടായത്. മൂന്ന് പേർ വള്ളത്തിലുണ്ടായിരുന്നെങ്കിലും ഒരാൾ രക്ഷപ്പെട്ടു. മൃതദേഹങ്ങൾ പുതുപ്പള്ളിയിലെ സ്വകാര്യ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.

കാലവർഷം കനക്കുന്നു; റെഡ്, ഓറഞ്ച് അലർട്ടുകൾ
സംസ്ഥാനത്ത് കാലവർഷം ശക്തിപ്പെട്ടതോടെ മഴക്കെടുതികൾ രൂക്ഷമായി. കേന്ദ്ര കാലാവസ്ഥ വകുപ്പിന്റെ മുന്നറിയിപ്പ് പ്രകാരം, വരും ദിവസങ്ങളിൽ കനത്ത മഴ തുടരും. പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂർ, കണ്ണൂർ, കാസർകോട് ജില്ലകളിൽ റെഡ് അലർട്ടും, തിരുവനന്തപുരം, കൊല്ലം, പാലക്കാട്, മലപ്പുറം, കോഴിക്കോട്, വയനാട് ജില്ലകളിൽ ഓറഞ്ച് അലർട്ടും പ്രഖ്യാപിച്ചു.

മത്സ്യബന്ധനത്തിന് വിലക്ക്, ജാഗ്രതാ നിർദേശം

കേരള-കർണാടക തീരങ്ങളിൽ മെയ് 30 മുതൽ ജൂൺ 1 വരെയും, ലക്ഷദ്വീപ് തീരത്ത് മെയ് 30 മുതൽ ജൂൺ 3 വരെയും മത്സ്യബന്ധനത്തിന് വിലക്ക് ഏർപ്പെടുത്തി. മണിക്കൂറിൽ 35 മുതൽ 45 കിലോമീറ്റർ വേഗതയിൽ, ചിലപ്പോൾ 55 കിലോമീറ്റർ വരെ എത്തുന്ന ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ട്. കടൽക്ഷോഭം രൂക്ഷമാകാനുള്ള സാധ്യത കണക്കിലെടുത്ത് മത്സ്യത്തൊഴിലാളികളും തീരദേശവാസികളും അതീവ ജാഗ്രത പാലിക്കണമെന്ന് അധികൃതർ നിർദേശിച്ചു.

ചെറുവള്ളങ്ങളും ബോട്ടുകളും കടലിലേക്ക് ഇറക്കുന്നത് ഒഴിവാക്കണം. കള്ളക്കടൽ പ്രതിഭാസവും ഉയർന്ന തിരമാലകളും ഉണ്ടാകാനിടയുള്ളതിനാൽ, കടലിലേക്ക് യാനങ്ങൾ ഇറക്കുന്നതും കരയ്ക്ക് അടുപ്പിക്കുന്നതും അപകടകരമാണ്. തീരപ്രദേശങ്ങളിൽ അധികൃതരുടെ നിർദേശങ്ങൾ അനുസരിച്ച് സുരക്ഷിത സ്ഥലങ്ങളിലേക്ക് മാറിത്താമസിക്കണമെന്നും മുന്നറിയിപ്പിൽ പറയുന്നു.