പതിവിലും നേരത്തെ തന്നെ കുതിച്ചെത്തി മണ്‍സൂണ്‍. അതോടെ പലയിടത്തും വെള്ളവും കയറിത്തുടങ്ങി. ഇനി പാമ്പുകളുടെ വരവും തുടങ്ങും. എല്ലാവരും മുന്‍കരുതലുകള്‍ എടുത്തില്ലെങ്കില്‍ പണികിട്ടും. ഇത് വിദേശത്താണ് സംഭവം. കൊളറാഡോയില്‍ നിന്നുള്ള വിഡിയോയാണ്. കൊളറാഡോയിലെ ബോള്‍ഡര്‍ സിറ്റിയുടെ പ്രാന്തപ്രദേശത്താണ് സംഭവം. തന്റെ ഓഫിസ് മേശയ്ക്കു ചുവട്ടില്‍ അസാധാരണമായി കണ്ട കാഴ്ച സമൂഹമാധ്യമങ്ങളില്‍ പങ്കുവയ്ക്കുകയായിരുന്നു ഇയാള്‍. 

' ഓ ദൈവമേ ഈ പാമ്പിനെ ഒന്നു നോക്കൂ...' എന്നുപറഞ്ഞാണ് വിഡിയോ തുടങ്ങിയിരിക്കുന്നത്. എന്നിട്ട് തന്റെ മേശയ്ക്കും ചുമരിനുമിടയില്‍ ചുരുണ്ടുകൂടി കിടക്കുന്ന പാമ്പിനെയാണ് കാണിക്കുന്നത്. താന്‍ ഓഫിസിലെത്തി തന്റെ കസേര വലിച്ചിട്ട് ഇരിക്കാന്‍ ശ്രമിക്കുമ്പോഴായിരുന്നു ഓഫിസ് മേശയ്ക്കടിയില്‍ നിന്ന് പെട്ടെന്നൊരു ചീറ്റല്‍ കേട്ടത്. നോക്കിയപ്പോ കണ്ടത് എട്ട് അടി നീളത്തില്‍ കൂറ്റനൊരു പാമ്പ്.

ഒറ്റനോട്ടത്തില്‍ ഭയപ്പെടുത്തുന്ന തരത്തിലുള്ള വലിയൊരു പാമ്പ്. ഞെട്ടലോടെയാണ് അതിനെ കണ്ടത്. അണലിയാണെന്നു തോന്നിപ്പോവും പെട്ടെന്നു കാണുമ്പോള്‍. എന്നാല്‍ തല ചെറുതാണ്. പിന്നീട് പാമ്പ് പുറത്തേക്ക് ഇഴഞ്ഞു പോവുമ്പോഴാണ് അതിന്റെ തല ചെറുതാണെന്നു കണ്ടെത്തിയത്. അപ്പോഴാണ് വിഷമുള്ള ഇനമല്ലെന്നു മനസിലായതും. അത് വിഷമില്ലാത്ത തരം ബുള്‍ സ്‌നേക്കാണ്. വിഡിയോ പെട്ടെന്നു തന്നെ വൈറലായി. സുന്ദരനായ ബുള്‍സ്‌നേക്ക് നിങ്ങളെ ഉപദ്രവിക്കില്ലെന്നും അത് നിങ്ങള്‍ക്കു ഭാഗ്യം കൊണ്ടു തരുമെന്നും അവയെ ഉപദ്രവിക്കരുതെന്നും ഉപദ്രവിക്കാതെ വിട്ടതിന് നന്ദിയെന്നുമടക്കം നിരവധിപേരാണ് കമന്റുകള്‍ എഴുതിയിരിക്കുന്നത്.