തിരുവനന്തപുരം: തിരുവനന്തപുരത്ത് ജൂനിയർ അഭിഭാഷകയെ സീനിയർ അഭിഭാഷകൻ മർദിച്ചെന്ന കേസിൽ ബാർ കൗൺസിൽ അച്ചടക്കസമിതി അന്വേഷണം ആരംഭിച്ചു. കൊച്ചിയിൽ ചേർന്ന സിറ്റിങ്ങിൽ പരാതിക്കാരെയും പ്രതിയും കമ്മിറ്റിക്ക് മുൻപാകെ ഹാജരായി മൊഴി നൽകി. സംഭവത്തിൽ ഒരു മാസത്തിനുള്ളിൽ കേസിന്റെ അന്തിമ തീരുമാനം ഉണ്ടാകും. 

തിരുവനന്തപുരം സ്വദേശിയായ അഡ്വക്കേറ്റ് ബെയ്‌ലിൻ ദാസിൽ നിന്നാണ് ജൂനിയറായ അഡ്വക്കേറ്റ് ശ്യാമിലിക്ക് മർദ്ദനം നേരിട്ടത്. സിറ്റിങ്ങിൽ അഡ്വക്കേറ്റ് ശ്യാമിലി നേരിട്ട് ഹാജരായപ്പോൾ ബെയ്ലിൻ ദാസ് ഓൺലൈൻ ആയിട്ടാണ് ഹാജരായത്. അന്വേഷണത്തിൽ വിശ്വാസമുണ്ടെന്നാണ് ശ്യാമിലി പറഞ്ഞത്.

രണ്ട് തവണ ബെയ്ലിൻ ദാസ് ശ്യാമിലിയെ മർദിക്കുകയും കവിളത്തേറ്റ അടിയുടെ ശക്തിയിൽ ശ്യാമിലി നിലത്തു വീണെന്നും എഴുന്നേറ്റപ്പോൾ വീണ്ടും അടിച്ചുവെന്നാണ് എഫ്ഐആറിൽ പറയുന്നത്. ജോലിയിൽ നിന്നും പിരിഞ്ഞുപോകാൻ ആവശ്യപ്പെട്ടപ്പോൾ ശ്യാമിലി കാരണം ചോദിച്ചപ്പോൾ ഉണ്ടായ പ്രകോപനമാണ് മർദ്ദനത്തിലേക്ക് നയിച്ചതെന്നാണ് മൊഴി. സ്ത്രീത്വത്തെ അപമാനിക്കൽ, തടഞ്ഞുവെക്കൽ, മറ്റുള്ളവരുടെ മുന്നിൽ വെച്ചുകൊണ്ട് മർദിച്ചു എന്നീ വകുപ്പുകളിലാണ് കേസ് രേഖപ്പെടുത്തിയിട്ടുള്ളത്. 

കേരള ബാർ കൗൺസിൽ നടപടികളാണ് ഇനി റിമാൻഡിൽ നിന്നും ജാമ്യത്തിൽ ഇറങ്ങുന്ന ബെയ്‌ലിൻ ദാസ് നേരിടുക. സംഭവത്തിൽ ട്രൈബൂണലുകളിലോ കോടതികളിലോ ബെയ്‌ലിൻ ദാസിനെ ഹാജരാകുന്നതിൽ ബാർ കൗൺസിൽ വിലക്ക് ഏർപ്പെടുത്തിയിരുന്നു. എന്നാൽ താത്ക്കാലികമായി നടപടികൾക്കപ്പുറം ഇനി എന്ത് എന്നതിലാണ് വിശദമായ അന്വേഷണം അച്ചടക്ക സമിതി നടത്തുക. 

Bar Council begins investigation into assault on junior lawyer