ചണ്ഡീഗഡ്: ലൈംഗിക ആരോപണ കേസില്‍ സന്ദീപ് കുമാറിനെ പുറത്താക്കിയതിനു പിന്നാലെ പാര്‍ട്ടിയിലെ പല നേതാക്കളെക്കുറിച്ചും ആക്ഷേപമുയര്‍ത്തിക്കൊണ്ട് എ.എ.പി നേതാവിന്റെ കത്ത്. പഞ്ചാബില്‍ പാര്‍ട്ടിയിലെ പല നേതാക്കളും സീറ്റ് ഉറപ്പിക്കാനായി സ്ത്രീകളെ ചൂഷണം ചെയ്യുന്നുണ്ടെന്നാണ് ഡല്‍ഹിയിലെ എ.എ.പി നേതാവായ ദേവീന്ദര്‍ ഷെറാവത്ത് അരവിന്ദ് കെജരിവാളിന് എഴുതിയ കത്തില്‍ പറയുന്നത്.

'സീറ്റിന്റെ പേരില്‍ പഞ്ചാബില്‍ പല നേതാക്കളും സ്ത്രീകളെ ചൂഷണം ചെയ്യുന്നതായി റിപ്പോര്‍ട്ട് ലഭിച്ചിട്ടുണ്ട്. ഇക്കാര്യം അറിയാനായി ചണ്ഡീഗഡില്‍ പലരേയും ഞാന്‍ കണ്ടിട്ടുണ്ട. ഡല്‍ഹിയില്‍ ദിലീപ് പാണ്ഡെയും ഇത് തന്നെയാണ് ചെയ്യുന്നത്. സീറ്റിനു വേണ്ടി സ്ത്രീകളെ ഇത്തരത്തില്‍ ചൂഷണം ചെയ്യുന്നതിനേക്കാള്‍ വലിയൊരു തെറ്റില്ല. ഇക്കാര്യത്തില്‍ നേതാക്കള്‍ വേണ്ടത് ചെയ്തില്ലെങ്കില്‍ അവരും അതില്‍ പെടും. ഇക്കാര്യത്തില്‍ പാര്‍ട്ടിയുടെ നിലപാട് വ്യക്തമാക്കണമെന്നും ഇത്തരത്തില്‍ ആരെങ്കിലും തെറ്റ് ചെയ്യുന്നുണ്ടെങ്കില്‍ അവരെ പാര്‍ട്ടിയില്‍ നിന്നും പുറത്താക്കുകയും വേണം.' ഷെറാവത്ത് തന്റെ കത്തിലൂടെ പറഞ്ഞു.

പഞ്ചാബിലെ പാര്‍ട്ടി നേതാക്കളായ അശുതോഷും സഞ്ജയ് സിങും പാര്‍ട്ടിയുടെ മുഖം വികൃതമാക്കുകയാണെന്നും അദ്ദേഹം ആരോപിക്കുന്നു.

ഡല്‍ഹി നിയമസഭാംഗമായിരുന്ന സന്ദീപ് കുമാറിന്റെ അശ്ശീല സിഡി വിവാദമായതിനു പിന്നാലെയാണ് കെജരിവാളിന് ഇത്തരത്തിലൊരു കത്തു കൂടി ലഭിച്ചിരിക്കുന്നത്.