ഷാര്‍ജ: ഷാര്‍ജ എക്‌സ്‌പോ സെന്ററില്‍ നടന്നു വരുന്ന ഷാര്‍ജ വാച്ച് ആന്‍ഡ് ജ്വല്ലറി മിഡില്‍ ഈസ്റ്റ് ഷോയുടെ 55ാമത് എഡിഷനില്‍ ഏകദേശം 3.67 മില്യണ്‍ ദിര്‍ഹം (10 ലക്ഷം ഡോളര്‍) വിലമതിക്കുന്ന സ്വര്‍ണം പൂശിയ കാര്‍ പ്രദര്‍ശിപ്പിച്ചു. 'ഗോള്‍ഡ് സില്ല' എന്ന പേരില്‍ വിളിക്കുന്ന 2014 നിസ്സാന്‍ ജിടിആര്‍ പൂര്‍ണ്ണമായും 24 കാരറ്റ് സ്വര്‍ണം പൂശിയ കൊത്തുപണികളാല്‍ അലംകൃതമാണ്.

 

 

ജപ്പാനിലെ കുല്‍ റേസിംഗും ജാപനീസ് കലാകാരനായ തകാഹിക്കോ ഇസാവയും ചേര്‍ന്നാണ് വാഹനം രൂപകല്‍പന ചെയ്തത്. കാര്‍ ബോഡി മുഴുവന്‍ സ്വര്‍ണം കര കൗശലമായി ഉപയോഗിച്ചിരിക്കുകയാണ്. 2,000 മണിക്കൂറിലധികം സമയമെടുത്താണ് ഇത് പൂര്‍ത്തീകരിച്ചത്.

 

 

500ലധികം പ്രദര്‍ശകരും പ്രമുഖ പ്രാദേശിക, അന്തര്‍ദേശീയ ബ്രാന്‍ഡുകളും ഉള്‍പ്പെടുന്ന ഷാര്‍ജ വാച്ച് ആന്‍ഡ് ജ്വല്ലറി മിഡില്‍ ഈസ്റ്റ് ഷോ അപൂര്‍വ സ്വര്‍ണ്ണ ശകലങ്ങള്‍, ആഡംബര വാച്ചുകള്‍, സിഗ്‌നേച്ചര്‍ വജ്ര ശേഖരങ്ങള്‍ എന്നിവ കണ്ടെത്താനുള്ള സുപ്രധാന വേദി യാണ്. പ്രദര്‍ശനം ജൂണ്‍ 1 വരെ തുടരും. മൊത്തം 708 ചതുരശ്ര മീറ്റര്‍ വിസ്തൃതിയിലാണ് ഷാര്‍ജ വാച്ച് ആന്‍ഡ് ജ്വല്ലറി മിഡില്‍ ഈസ്റ്റ് ഷോ 55ാമത് എഡിഷന്‍ നടക്കുന്നത്. ഇറ്റലിയിലെ ഏറ്റവും പ്രശസ്തമായ ചില കമ്പനികള്‍, ബ്രാന്‍ഡുകള്‍, സ്വര്‍ണ്ണ, ആഭരണ വ്യവസായത്തിലെ ഡിസൈനര്‍മാര്‍ എന്നിവരുള്‍പ്പെടെ ഏകദേശം 50 പ്രദര്‍ശകര്‍ ഏറ്റവും ശ്രദ്ധേയമായ ഇറ്റാലിയന്‍ പവലിയനിലുണ്ട്.

 

 

വജ്രം, സ്വര്‍ണ്ണ സൃഷ്ടികള്‍ മുതല്‍ അപൂര്‍വ രത്‌നക്കല്ലുകള്‍, അമൂല്യ ലോഹങ്ങള്‍ വരെയുള്ള നൂറുകണക്കിന് വസ്തുക്കളുടെ ക്യൂറേറ്റഡ് പ്രദര്‍ശനത്തോടെ പവലിയന്‍ സന്ദര്‍ശകരെ അതിശയിപ്പിക്കുന്നു. ഇറ്റാലിയന്‍ കലാ പാരമ്പര്യങ്ങളില്‍ നിന്നും പ്രചോദനം ഉള്‍ക്കൊണ്ട ഒരു ശേഖരം ഈ പ്രദര്‍ശനത്തിന് അനുബന്ധമായി ഒരുക്കിയിട്ടുണ്ട്. വെള്ളിയാഴ്ച വൈകുന്നേരം 3 മുതല്‍ രാത്രി 10 വരെയും; ശനിഞായര്‍ ദിവസങ്ങളില്‍ ഉച്ച 1 മുതല്‍ രാത്രി 10 വരെയുമാണ് സന്ദര്‍ശക സമയം.

 

 

യു.എ.ഇ, ഇന്ത്യ, ഇറ്റലി, യു.കെ, അമേരിക്ക, സിംഗപ്പൂര്‍, ചൈന, ജപ്പാന്‍, തുര്‍ക്കി, സഊദി അറേബ്യ, ബഹ്‌റൈന്‍, ലബനാന്‍ എന്നിവയുള്‍പ്പെടെ വിവിധ രാജ്യങ്ങളെ പ്രതിനിധീകരിക്കുന്ന പ്രമുഖ ബ്രാന്‍ഡുകളുടെയും ഡിസൈനര്‍മാരുടെയും അസാധാരണമായ കരകൗശല വൈദഗ്ധ്യവും നൂതനമായ ഡിസൈനുകളും ഇതില്‍ ഉള്‍പ്പെടുന്നു. റഷ്യ, മെക്‌സിക്കോ, താന്‍സാനിയ, ഈജിപ്ത് എന്നിവയുള്‍പ്പെടെ നിരവധി രാജ്യങ്ങളുടെ ആദ്യ പങ്കാളിത്തവും ഈ പതിപ്പില്‍ അടയാളപ്പെടുത്തുന്നു.

A gold-plated car worth around 3.67 million dirhams ($1 million) has been unveiled at the 55th edition of the Sharjah Watch and Jewellery Middle East Show, which is currently underway at the Sharjah Expo Centre.