അഹമ്മദാബാദ്: ഐപിഎല്ലിൽ പുതിയ റെക്കോർഡ് സ്വന്തമാക്കി ഇന്ത്യൻ ടി-20 നായകൻ സൂര്യകുമാർ യാദവ്. രണ്ടാം ക്വാളിഫയറിൽ പഞ്ചാബ് കിങ്സിനെതിരെയുള്ള മത്സരത്തിലാണ് സ്‌കൈ പുത്തൻ നേട്ടം കൈവരിച്ചത്. ഐപിഎല്ലിൽ ഒരു സീസണിൽ ഓപ്പണർ എന്ന നിലയിൽ അല്ലാതെ ഏറ്റവും കൂടുതൽ റൺസ് നേടുന്ന താരമായാണ് സൂര്യകുമാർ മാറിയത്.

മുൻ സൗത്ത് ആഫ്രിക്കൻ താരം എബി ഡിവില്ലിയേഴ്സിനെ മറികടന്നാണ് സ്‌കൈ ഈ റെക്കോർഡ് തന്റെ പേരിൽ എഴുതിച്ചേർത്തത്. 2016 സീസണിൽ റോയൽ ചലഞ്ചേഴ്‌സ് ബെംഗളൂരുവിന് വേണ്ടി 687 റൺസായിരുന്നു എബിഡി നേടിയിരുന്നത്. മത്സരത്തിൽ 26 പന്തിൽ 44 റൺസാണ് സ്‌കൈ അടിച്ചെടുത്തത്. നാല് ഫോറുകളും മൂന്ന് സിക്സുകളും ആണ് താരത്തിന്റെ ബാറ്റിൽ നിന്നും പിറന്നത്. 

ഈ സീസണിൽ തന്റെ പതിനാറാം മത്സരത്തിലും സ്‌കൈ 25+ റൺസ് നേടിയിരിക്കുകയാണ്. ടി-20 ചരിത്രത്തിൽ ആദ്യമായാണ് ഒരു താരം 16 തവണ തുടർച്ചയായി  25+ സ്കോറുകൾ നേടുന്നത്. 13 തവണ 25+ സ്കോറുകൾ തുടർച്ചയായി നേടിയ സൗത്ത് ആഫ്രിക്കൻ താരം ടെംബ ബവുമയാണ് സൂര്യക്ക് പുറകിലുള്ളത്. 2019-20 വർഷത്തിലാണ് ബാവുമ തുടർച്ചയായി 13 തവണ 25+ സ്‌കോറുകൾ നേടിയത്.  

മത്സരത്തിൽ ആദ്യം ബാറ്റ് ചെയ്ത മുംബൈ 20 ഓവറിൽ ആറ് വിക്കറ്റ് നഷ്ടത്തിൽ 203 റൺസാണ് നേടിയത്. മുംബൈക്കായി സൂര്യക്ക് പുറമെ തിലക് വർമ്മ 29 പന്തിൽ രണ്ട് വീതം ഫോറുകളും സിക്സുകളും ഉൾപ്പടെ 44 റൺസും നമൻ ധിർ 18 പന്തിൽ 37 റൺസും നേടി ടീമിന് മികച്ച സ്കോർ പടുത്തുയയർത്തുന്നതിൽ നിർണായകമായി. 

പഞ്ചാബ് ബൗളിങ്ങിൽ അസ്മത്തുള്ള ഒമർസായി രണ്ട് വിക്കറ്റുകളും  യുസ്‌വേന്ദ്ര ചഹൽ, വൈശാഖ് വിജയ്‌കുമാർ, മാർക്കസ് സ്റ്റോണിസ്, കൈൽ ജാമിസൺ എന്നിവർ ഓരോ വിക്കറ്റും സ്വന്തമാക്കി. 

പഞ്ചാബ് കിങ്‌സ് പ്ലെയിങ് ഇലവൻ

 പ്രിയാൻഷ് ആര്യ, ജോഷ് ഇംഗ്ലിസ് (വിക്കറ്റ് കീപ്പർ), ശ്രേയസ് അയ്യർ (ക്യാപ്റ്റൻ), നെഹാൽ വധേര, മാർക്കസ് സ്റ്റോണിസ്, ശശാങ്ക് സിംഗ്, അസ്മത്തുള്ള ഒമർസായി, കൈൽ ജാമിസൺ, വൈശാഖ് വിജയ്‌കുമാർ, അർഷ്ദീപ് സിംഗ്, യുസ്‌വേന്ദ്ര ചഹൽ.

മുംബൈ ഇന്ത്യൻസ് പ്ലെയിങ് ഇലവൻ

രോഹിത് ശർമ, ജോണി ബെയർസ്റ്റോ(വിക്കറ്റ് കീപ്പർ), സൂര്യകുമാർ യാദവ്, തിലക് വർമ്മ, ഹാർദിക് പാണ്ഡ്യ(ക്യാപ്റ്റൻ), നമൻ ധിർ, മിച്ചൽ സാൻ്റ്നർ, രാജ് ബാവ, ട്രെൻ്റ് ബോൾട്ട്, ജസ്പ്രീത് ബുംറ, റീസ് ടോപ്ലി. 

Suryakumar yadav break nine year old ab de villiers record in IPL