തിരുവനന്തപുരം: 2025-26 അധ്യയന വര്‍ഷത്തേക്കുള്ള ഹയർ സെക്കൻഡറി പ്ലസ് വൺ പ്രവേശനത്തിന്‍റെ ആദ്യ അലോട്ട്മെന്റ് പട്ടിക ഇന്ന് പ്രസിദ്ധീകരിക്കും. ഇന്ന് (ജൂൺ 2, തിങ്കളാഴ്ച) വൈകിട്ട് 5 മണിക്ക് അലോട്ട്മെന്റ് വിവരങ്ങൾ ഔദ്യോഗികമായി പുറത്തിറക്കും. ഈ അലോട്ട്മെന്റിന്റെ അടിസ്ഥാനത്തിൽ, നാളെ (ജൂൺ 3, ചൊവ്വാഴ്ച) രാവിലെ 10 മണി മുതൽ ജൂൺ 5, വ്യാഴാഴ്ച, വൈകിട്ട് 5 മണി വരെ വിദ്യാര്‍ത്ഥികള്‍ക്ക് സ്‌കൂളുകളിൽ പ്രവേശനം നേടാം.

മൊഡല്‍ റെസിഡൻഷ്യൽ സ്‌കൂളുകൾ, സ്പോർട്സ് ക്വാട്ട

ഈ ഘട്ടത്തിൽ മോഡല്‍ റെസിഡൻഷ്യൽ സ്‌കൂളുകളിലേക്കും സ്പോർട്സ് ക്വാട്ട അടിസ്ഥാനത്തിലുമുള്ള പ്രവേശന അലോട്ട്മെന്റുകളും പുറത്ത് വിടും. ഓരോ വിദ്യാർത്ഥിയും hscap.kerala.gov.in എന്ന വെബ്‌സൈറ്റിലെ "Candidate Login" വഴി സ്വന്തം അലോട്ട്മെന്റ് സ്ഥിതി പരിശോധിക്കേണ്ടതാണ്. പ്രവേശനം നേടുന്നതിന് അലോട്ട്മെന്റ് ലെറ്ററും അസൽ സർട്ടിഫിക്കറ്റുകളും സ്‌കൂളിൽ ഹാജരാക്കണം.

പ്രവേശന നിർദേശങ്ങൾ:

ഒന്നാം ഓപ്ഷൻ പ്രകാരം അലോട്ട്മെന്റ് ലഭിച്ച വിദ്യാർത്ഥികൾ ഫീസ് അടച്ച് നിർദ്ദിഷ്ട സമയത്തിനുള്ളിൽ പ്രവേശനം ഉറപ്പാക്കണം.

ഫീസ് അടച്ചില്ലെങ്കിൽ സീറ്റ് ഒഴിവാക്കിയതായി കണക്കാക്കി, പിന്നീട് ആ വിദ്യാർത്ഥിക്ക് അത്തരം അവസരങ്ങൾ ലഭിക്കുകയില്ല.

യോഗ്യതാ സർട്ടിഫിക്കറ്റ് ഇനിയും ലഭിച്ചിട്ടില്ലാത്തവർക്ക് ഡിജിലോക്കർ വഴിയോ ബന്ധപ്പെട്ട ബോർഡിന്റെ ഔദ്യോഗിക വെബ്‌സൈറ്റ് വഴിയോ ലഭ്യമായ സ്വയം സാക്ഷ്യപ്പെടുത്തിയ പകർപ്പ് അനുവദിക്കും. എന്നാൽ പിന്നീട് അസൽ സർട്ടിഫിക്കറ്റ് ഹാജരാക്കേണ്ടതായിരിക്കും.

പ്രവേശന സമയത്ത് വിടുതൽ സർട്ടിഫിക്കറ്റ്, സ്വഭാവ സർട്ടിഫിക്കറ്റ് എന്നിവ നിർബന്ധമായും സമർപ്പിക്കണം.

അടുത്ത അലോട്ട്മെന്റ് തീയതികൾ:

രണ്ടാമത്തെ അലോട്ട്മെന്റ്: ജൂൺ 10

മൂന്നാമത്തെ അലോട്ട്മെന്റ്: ജൂൺ 16

ഈ അധ്യയന വര്‍ഷത്തിലേക്കായി ആകെ 4,62,768 അപേക്ഷകൾ ഓൺലൈൻ വഴി ലഭിച്ചിട്ടുണ്ട്. ഒപ്ഷൻ പരിഗണിച്ച് ട്രയൽ അലോട്ട്മെന്റ് മേയ് 24-ന് പ്രസിദ്ധീകരിച്ചിരുന്നു. പ്രധാന അലോട്ട്മെന്റ് ഘട്ടങ്ങൾ പൂർത്തിയായ ശേഷം, പ്ലസ് വൺ ക്ലാസുകൾ ജൂൺ 18-ന് ആരംഭിക്കുമെന്ന് പൊതുവിദ്യാഭ്യാസ മന്ത്രി വി. ശിവൻകുട്ടി അറിയിച്ചു.

The first allotment list for Plus One admissions in Kerala for the academic year 2025–26 will be released today at 5 PM. Students can check their allotment status by logging into the official website hscap.kerala.gov.in. Admission based on this list will be open from June 3 to June 5. Candidates must report to the allotted schools with the allotment letter and original documents. The second and third allotment lists will be published on June 10 and June 16, respectively. Classes are scheduled to begin on June 18.