കരുനാഗപ്പള്ളി: കൊല്ലത്ത് സ്വകാര്യ ധനകാര്യ സ്ഥാപനം ജപ്തി ചെയ്ത വീടിന്റെ പൂട്ട് തകര്‍ത്ത് കരുനാഗപ്പള്ളി എംഎല്‍എ സിആര്‍ മഹേഷ്. അഞ്ചംഗ കുടുംബത്തിന്റെ വസ്ത്രങ്ങളും രേഖകളും പുറത്തെടുക്കാനാണ് എംഎല്‍എയുടെ നേതൃത്വത്തില്‍ വീടിന്റെ പൂട്ട് തകര്‍ത്തത്. അഞ്ചംഗ കുടുംബത്തിന്റെ നിസ്സഹായാവസ്ഥ കണ്ടാണ് പ്രശ്‌നത്തില്‍ ഇടപെട്ടതെന്നും ഇവരെ വാടകവീട്ടിലേക്ക് മാറ്റുമെന്നും സിആര്‍ മഹേഷ് പറഞ്ഞു. 

വസ്ത്രങ്ങളും രേഖകളും എടുത്ത ശേഷം വീടുപൂട്ടി എംഎല്‍എ താക്കോല്‍ സ്വകാര്യ സ്ഥാപനത്തെ ഏല്‍പ്പിച്ചു. 

അഴീക്കല്‍ സ്വദേശി പനമൂട്ടില്‍ അനിമോന്റെ വീടാണ് സ്വകാര്യ സ്ഥാപനം ജപ്തി ചെയ്തത്. ഇതിനെതുടര്‍ന്ന് ഓച്ചിറ ക്ഷേത്ര ഭരണസമിതിയുടെ കീഴിലുള്ള അനാഥാലയത്തിലാണ് അനിമോനും കുടുംബവും. പത്താം ക്ലാസ് പാസ്സായ കുട്ടിയുടെ എസ്എസ്എല്‍സി സര്‍ട്ടിഫിക്കറ്റും നേത്രരോഗം ബാധിച്ച ആറു മാസം പ്രായമുള്ള കുഞ്ഞിന്റെ പാല്‍ക്കുപ്പിയും വസ്ത്രങ്ങള്‍ പോലും എടുക്കാന്‍ അനുവദിക്കാതെയാണ് വീട്ടില്‍ നിന്നും ഇറക്കിവിട്ടതെന്ന് കുടുംബം ആരോപിച്ചു. 

മകളുടെ പ്ലസ് വണ്‍ പ്രവേശനത്തിന് സര്‍ട്ടിഫിക്കറ്റ് ആവശ്യമായി വന്നപ്പോഴാണ് എംഎല്‍എ പ്രശ്‌നത്തില്‍ ഇടപെട്ടത്. പ്രശ്‌നത്തില്‍ ഇടപെടാന്‍ എംഎല്‍എയോട് കുടുംബം അഭ്യര്‍ത്ഥിച്ചിരുന്നു.

വിദേശത്ത് ജോലി ചെയ്യുകയായിരുന്ന അനിമോന്‍ സ്വകാര്യ ധനകാര്യ സ്ഥാപനത്തില്‍ നിന്ന് 17 ലക്ഷം രൂപ വായ്പ എടുത്തിരുന്നു. ഈ തുക ഉപയോഗിച്ചാണ് വീടു വാങ്ങിയത്. ഇതിലേക്ക് ആറര ലക്ഷം തിരിച്ചടച്ചതായി അനിമോന്‍ പറയുന്നു. ആറുമാസം പ്രായമുള്ള കുട്ടിയുടെ നേത്രരോഗത്തിനു ചികിത്സ ആരംഭിച്ചതോടെ ബാക്കി തുക അടയ്ക്കാനായില്ല. ഇതിനെതുടര്‍ന്ന് തിരിച്ചടവ് മുടങ്ങിയതോടെയാണ് സ്ഥാപനം വീട് ജപ്തി ചെയ്തത്.