കോഴിക്കോട്: വടകര പുതുപ്പണത്ത് സിപിഎം-ബിജെപി സംഘർഷം. കഴിഞ്ഞ രാത്രി വെളുത്തമല വായനശാലയ്ക്ക് മുന്നിൽ സംഘർഷത്തെ തുടർന്ന് ഉണ്ടായ ആക്രമണത്തിൽ മൂന്നു സിപിഎം പ്രവർത്തകർക്ക് കുത്തേറ്റതിനെ തുടർന്ന്, സിപിഎം ഇന്ന് പുതുപ്പണത്തിൽ ഹർത്താൽ പ്രഖ്യാപിച്ചു.

സംഭവം സംബന്ധിച്ച് ലഭിച്ച വിവരമനുസരിച്ച്, വായനശാലയുടെ മേൽക്കൂരയിലെ ഷീറ്റ് മാറ്റുന്നതിനെ ചൊല്ലിയുള്ള തർക്കം സംഘർഷത്തിലേക്ക് വഴിമാറുകയായിരുന്നു. സി.പി.എം പുതുപ്പണം സൗത്ത് ലോക്കൽ കമ്മിറ്റി അംഗം കെ.എം. ഹരിദാസൻ, വെളുത്തമല സൗത്ത് ബ്രാഞ്ച് സെക്രട്ടറി പ്രവീൺ, പാർട്ടി പ്രവർത്തകൻ ബിബേഷ് എന്നിവർക്കാണ് കുത്തേറ്റത്. പരിക്കേറ്റവരെ ആശുപത്രിയിൽ പ്രവേശിപ്പിച്ചു.

സംഘർഷത്തിന് കോൺഗ്രസ് പ്രവർത്തകരും പങ്കാളികളാണെന്ന ആരോപണം സിപിഎം ഉന്നയിച്ചിട്ടുണ്ട്. സംഭവസ്ഥലത്ത് പോലീസ് കാവൽ ശക്തമാക്കിയിരിക്കുകയാണ്.