അഹമ്മദാബാദ്: 2025 ഐപിഎൽ ജേതാക്കൾ ആരാണെന്നറിയാൻ ഇനി മണിക്കൂറുകൾ മാത്രമേ ബാക്കിയുള്ളൂ. ഗുജറാത്തിലെ അഹമ്മദാബാദ് നരേന്ദ്രമോദി സ്റ്റേഡിയത്തിൽ ഇന്ന് നടക്കുന്ന കലാശ പോരാട്ടത്തിൽ റോയൽ ചലഞ്ചേഴ്സ് ബെംഗളൂരുവും പഞ്ചാബ് കിങ്സുമാണ് ഏറ്റുമുട്ടുന്നത്. നീണ്ട 18 വർഷത്തെ കിരീടം വരച്ച അവസാനിപ്പിക്കാനാണ് ഇരു ടീമുകളും കളത്തിൽ ഇറങ്ങുന്നത്.

 ഇന്നത്തെ ഫൈനൽ പോരാട്ടത്തിൽ ഏത് ടീം വിജയിച്ചാലും പുതിയ ചാമ്പ്യന്മാരെ ആയിരിക്കും ഐപിഎല്ലിൽ ലഭിക്കുക. ക്വാളിഫയർ വണ്ണിൽ പഞ്ചാബിനെ വീഴ്ത്തിയാണ് ആർസിബി ഫൈനലിലേക്ക് യോഗ്യത നേടിയത്. മറുഭാഗത്ത് ക്വാളിഫയർ രണ്ടിൽ മുംബൈ ഇന്ത്യൻസിനെ തകർത്താണ് പഞ്ചാബ് ഫൈനൽ യോഗ്യത ഉറപ്പിച്ചത്.

കലാശ പോരാട്ടത്തിൽ ആർസിബി സൂപ്പർ താരം വിരാട് കോഹ്‌ലിയെ കാത്തിരിക്കുന്നത് ഒരു വമ്പൻ റെക്കോർഡ് ആണ്. പഞ്ചാബിനെതിരെ 86 റൺസ് കൂടി നേടാൻ കോഹ്‌ലിക്ക് സാധിച്ചാൽ ഈ സീസണിൽ 700 റൺസ് പൂർത്തിയാക്കാൻ കഴിയും. ഇതോടെ ഐപിഎല്ലിന്റെ ചരിത്രത്തിൽ മൂന്ന് സീസണുകളിൽ 700+ റൺസ് നേടുന്ന ആദ്യ താരമായി മാറാനും കോഹ്‌ലിക്ക് സാധിക്കും.

ഇതിനുമുമ്പ് 2016, 2024 സീസണുകളിൽ ആണ് കോഹ്‌ലി 700 റൺസ് പിന്നിട്ടിട്ടുള്ളത്. 2016ൽ 973 റൺസും 2024ൽ 741 റൺസുമാണ് കോഹ്‌ലി നേടിയത്. നിലവിൽ ഈ റെക്കോർഡിൽ മുൻ വെസ്റ്റ് ഇൻഡീസ് താരം ക്രിസ് ഗെയിലിനൊപ്പം ആണ് കോഹ്‌ലിയുള്ളത്. ഗെയ്ൽ 2012, 2013 സീസണുകളാണ് 700 നു മുകളിൽ റൺസ് നേടിയത്. അതുകൊണ്ടുതന്നെ ഇന്ന് ഫൈനൽ മത്സരത്തിൽ തിളങ്ങാൻ കോഹ്‌ലിക്ക് സാധിച്ചാൽ ഈ നേട്ടവും തന്റെ പേരിൽ എഴുതിച്ചേർക്കാം.

ഈ സീസണിൽ മികച്ച ഫോമിലാണ് കോഹ്‌ലി കളിക്കുന്നത്. 14 ഇന്നിംഗ്സുകളിൽ നിന്നും 614 റൺസ് ആണ് താരം നേടിയിട്ടുള്ളത്. ഈ സീസണിൽ എട്ട് അർദ്ധ സെഞ്ച്വറികളും കോഹ്‌ലി സ്വന്തമാക്കിയിട്ടുണ്ട്. താരത്തിന്റെ ഈ മികച്ച പ്രകടനം ഫൈനലിലും ആവർത്തിക്കുമെന്നാണ് ആരാധകർ പ്രതീക്ഷിക്കുന്നത്.