അലിയൻസ് അറീന: യുവേഫ നേഷൻസ് ലീഗിന്റെ ഫൈനലിലേക്ക് മുന്നേറി പോർച്ചുഗൽ. സെമിഫൈനലിൽ ജർമ്മനിയെ ഒന്നിനെതിരെ രണ്ട് ഗോളുകൾക്ക് കീഴടക്കിയാണ് പോർച്ചുഗൽ ഫൈനലിലേക്ക് യോഗ്യത നേടിയത്. നീണ്ട 25 വർഷങ്ങൾക്കുശേഷമാണ് പോർച്ചുഗൽ ജർമ്മനിക്കെതിരെ ഇന്റർനാഷണൽ ഫുട്ബോളിൽ ഒരു വിജയം സ്വന്തമാക്കുന്നത്.

ജർമ്മനിയുടെ തട്ടകമായ അലിയൻസ് അറീനയിൽ നടന്ന മത്സരത്തിൽ ആദ്യപകുതിയിൽ ഇരു ടീമുകൾക്കും ഗോളുകൾ സ്കോർ ചെയ്യാൻ സാധിച്ചിരുന്നില്ല. രണ്ടാം പകുതിയിൽ ഫ്ളോറിയൻ വിറ്റ്സിലൂടെ ജർമ്മനിയാണ് ആദ്യം ഗോൾ നേടിയത്.

എന്നാൽ പിന്നീട് രണ്ടു ഗോളുകൾ ജർമനിയുടെ പോസ്റ്റിലേക്ക് അടിച്ചുകയറ്റി പറങ്കിപ്പട ജയം സ്വന്തമാക്കുകയായിരുന്നു. ഫ്രാൻസിസ്കോ കോൺസീസ്കാവോയിലൂടെ ജർമനി സമനില ഗോൾ നേടിയപ്പോൾ സൂപ്പർതാരം ക്രിസ്റ്റ്യാനോ റൊണാൾഡോ ആയിരുന്നു പോർച്ചുഗലിന്റെ വിജയഗോൾ സ്വന്തമാക്കിയത്. 

മത്സരത്തിൽ ബോൾ പൊസഷനിൽ മുന്നിലെത്തിയ ജർമ്മനിക്ക് ഷോട്ടുകളുടെ എണ്ണത്തിൽ ആധിപത്യം പുലർത്താൻ സാധിക്കാതെ പോയി. 9 ഷോട്ടുകളാണ് ജർമ്മനി പറങ്കിപ്പടയുടെ പോസ്റ്റിലേക്ക് ഉതിർത്തത് ഇതിൽ അഞ്ചു ഷോട്ടുകളും ലക്ഷ്യത്തിലേക്ക് ആയിരുന്നു. മറുഭാഗത്ത് 17 ഷോട്ടുകൾ ജർമ്മനിയുടെ പോസ്റ്റിലേക്ക് അടിച്ചുകയറ്റിയ പോർച്ചുഗൽ ആറ്  ഷോട്ടുകൾ ഓൺ ടാർഗറ്റിലേക്ക് എത്തിച്ചു.

ഇന്ന് നടക്കുന്ന രണ്ടാം സെമി ഫൈനൽ പോരാട്ടത്തിൽ നിലവിലെ യൂറോ കപ്പ് ചാമ്പ്യന്മാരായ സ്പെയ്നും കരുത്തരായ ഫ്രാൻസുമാണ് നേർക്കുനേർ എത്തുന്നത്. ഈ മത്സരത്തിലെ വിജയികളെ ആയിരിക്കും പോർച്ചുഗൽ കലാശ പോരാട്ടത്തിൽ നേരിടുക. ജൂൺ 9നാണ് ടൂർണമെന്റിന്റെ ഫൈനൽ മത്സരം നടക്കുന്നത്. അലിയൻസ് അറീനയിലാണ് പോരാട്ടം നടക്കുന്നത്.

Portugal beat Germany 2-1 to reach UEFA Nations League final