സിന്റിയാഗോ: ലോകകപ്പ് യോഗ്യതാ മത്സരത്തിൽ ജയം തുടരാൻ ലോക ചാംപ്യൻമാരായ അർജന്റീന ഇറങ്ങുന്നു. നാളെ രാവിലെ 6.30ന് എവേ മത്സരത്തിൽ ചിലിയാണ് അർജന്റീനയുടെ എതിരാളി. 

ലോകകപ്പ് യോഗ്യതാ മത്സരത്തിലെ 14 മത്സരം പൂർത്തിയാക്കിയ അർജന്റീന 31 പോയിന്റുമായി പട്ടികയിൽ ഒന്നാം സ്ഥാനത്താണ്. എന്നാൽ ഇത്രയും മത്സരത്തിൽനിന്ന് 10 പോയിന്റുള്ള ചിലി പട്ടികയിൽ ഏറ്റവും അവസാന സ്ഥാനത്താണ്. അതിനാൽ നാളത്തെ മത്സരത്തിൽ അനായാസം എതിരാളിയെ വീഴ്ത്താൻ കഴിയുമെന്ന പ്രതീക്ഷയിലാണ് ലയണൽ മെസ്സിയും സംഘവും. 

ചെറിയ ഇടവേളക്ക് ശേഷം മെസ്സി ദേശീയ ടീമിലേക്ക് തിരിച്ചെത്തിയിട്ടുണ്ട്. നാളെ രാവിലെ നടക്കുന്ന മത്സരത്തിൽ മെസ്സി അർജന്റീനക്കായി കളത്തിലിറങ്ങുമെന്നാണ് റിപ്പോർട്ടുകൾ സൂചിപ്പിക്കുന്നത്. അർജന്റീനയുടെ മധ്യനിര താരം എൻസോ ഫെർണാണ്ടസ്, പ്രതിരോധ താരം നിക്കോളാസ് ഒട്ടമെൻഡി, ലിയനാർദോ പെരസ് എന്നിവർ ചിലിക്കെതിരേയുള്ള മത്സരത്തിൽ കളത്തിലിറങ്ങില്ലെന്നാണ് റിപ്പോർട്ടുകൾ വ്യക്തമാക്കുന്നത്. 

ഉറുഗ്വെക്കിതിരേയുള്ള മത്സരത്തിൽ ചുവപ്പ് കാർഡ് ലഭിച്ച നിക്കോളാസ് ഗോൺസാലസിനും ചിലിക്കെതിരേയുള്ള മത്സരം നഷ്ടമാകും. അവസാന മത്സരത്തിൽ ബ്രസീലിനെതിരേ 4-1ന്റ ജയം നേടിയാണ് അർജന്റീന എത്തുന്നത്. അന്ന് മെസ്സി ഇല്ലാതെ കളത്തിലിറങ്ങിയിട്ടും ലോക ചാംപ്യൻമാർക്ക് മികച്ച ജയം നേടാൻ സാധിച്ചു. 

ലോകകപ്പ് യോഗ്യത പ്രതീക്ഷ നഷ്ടപ്പെട്ട ചിലി ഇനിയുള്ള മത്സരങ്ങളിൽ ജയിച്ച് അഭിമാനം കാക്കാൻ വേണ്ടിയാണ് കളത്തിലിറങ്ങുന്നത്. നിലവിൽ പത്താം സ്ഥാനത്തുള്ള ചിലി 2018, 2022 ലോകകപ്പുകളിലും യോഗ്യത നേടിയിരുന്നില്ല. പരുക്കേറ്റതിനാൽ ചിലി താരങ്ങളായ പൗലോ ഡയസ്, ലൂസിയാനോ കാബ്രൽ, ഇഗോർ ലിച്ച്‌നോവ്‌സ്‌കി എന്നിവർ പരുക്കേറ്റ് പുറത്താണ്. ഇവരുടെ അഭാവം ചിലിക്ക് കനത്ത തിരിച്ചടിയാകും.