മലപ്പുറം: പരിസ്ഥിതി ദിനാഘോഷ പരിപാടിയിൽ ആർഎസ്എസ് ഉപയോഗിക്കുന്ന കാവിക്കൊടിയുമായി ഉള്ള ഭാരതാംബയുടെ ചിത്രത്തിന് മുന്നിൽ പുഷ്പാർച്ചന നടത്തണമെന്നും നിലവിളക്ക് തെളിയിക്കണമെന്നുമുള്ള ഗവർണറുടെ നിർദേശത്തിനെതിരെ പ്രതിപക്ഷ നേതാവ്. രാജ്ഭവൻ അത്തരം നിബന്ധന വെക്കുന്നത് ശരിയല്ലെന്നും രാജ്ഭവൻ ആർഎസ്എസ് ആസ്ഥാനം ആക്കാൻ പാടില്ലെന്നും പ്രതിപക്ഷ നേതാവ് വി.ഡി സതീശൻ വ്യക്തമാക്കി. ഗവർണറെ കുറിച്ച് പറയാൻ പേടിയാണെന്നും കോൺഗ്രസ്‌ എതിർപ്പ് പറഞ്ഞപ്പോൾ പിണറായി മിണ്ടിയില്ലെന്നും പ്രതിപക്ഷ നേതാവ് കുറ്റപ്പെടുത്തി. ഗവർണർക്കെതിരെ ചുണ്ടനക്കാൻ പേടിയാണെന്നും സതീശൻ ചൂണ്ടിക്കാണിച്ചു.

ലോക പരിസ്ഥിതി ദിനത്തോട് അനുബന്ധിച്ചുള്ള സർക്കാർ പരിപാടിയിൽ ആർഎസ്എസ് കൊടിയ്‌ക്ക് പുഷ്പാർച്ചന നടത്തണമെന്ന് ഗവർണറുടെ വസതിയായ രാജ്ഭവൻ നിർദേശം നൽകിയിരുന്നു. ഗവർണർ രാജേന്ദ്ര വിശ്വനാഥ് ആർലേക്കറുടെ ആവശ്യത്തിനെതിരെ സംസ്ഥാന സർക്കാർ രംഗത്തെത്തി. സംഭവം അനുവദിക്കാതിരുന്ന സർക്കാർ ഇതോടെ രാജ്ഭവനിൽ നടത്താനിരുന്ന കൃഷിവകുപ്പിന്റെ പരിപാടി സെക്രട്ടറിയേറ്റിലേക്ക് മാറ്റി. 

ALSO READ: കാവിക്കൊടി പിടിച്ച ഭാരതാംബയുടെ ചിത്രത്തിൽ പുഷ്പാർച്ചന നടത്തണമെന്ന് ഗവർണർ; സാധ്യമല്ലെന്ന് നിലപാടെടുത്ത് കേരള സർക്കാർ, പരിപാടി മാറ്റി

ആർഎസ്എസിന്റെ കാവിക്കൊടി പിടിച്ച ഭാരതാംബയുടെ ചിത്രത്തിൽ പുഷ്പാർച്ചന നടത്തണമെന്നായിരുന്നു കേരള ഗവർണർ രാജേന്ദ്ര വിശ്വനാഥ് ആർലേക്കറുടെ ആവശ്യം. ഇത് നടത്തിയതിന് ശേഷം മറ്റ് പരിപാടിയിലേക്ക് കടക്കാൻ കഴിയൂവെന്നും രാജ്ഭവൻ നിർബന്ധം പിടിച്ചു. എന്നാൽ സർക്കാർ പരിപാടിയിൽ ഇത് അംഗീകരിക്കാൻ കഴിയിലെന്നും കൃഷിവകുപ്പ് അറിയിച്ചു. ഭാരതാംബയുടെ ചിത്രത്തിൽ പുഷ്പാർച്ചന നടത്തുക സാധ്യമല്ലെന്ന് കൃഷിമന്ത്രി പി.പ്രസാദ് രാജ്ഭവനെ അറിയിച്ചു. സംഭവത്തിന് പിന്നാലെ രാജ്ഭവനിൽ നടത്താൻ നിശ്ചയിച്ച പരിപാടി അവസാന നിമിഷം സെക്രട്ടറിയിലേക്ക് മാറ്റി. ഉദ്‌ഘാടകനായിരുന്ന ഗവർണറെയും മാറ്റി.

അതേസമയം, ദേശീയപാത നിർമ്മാണത്തിൽ കോടികളുടെ അഴിമതി നടന്നെന്ന ആരോപണവുമായി പ്രതിപക്ഷ നേതാവ് വി.ഡി സതീശൻ. സംഭവം കെ.സി വേണുഗോപാൽ അധ്യക്ഷനായ സമിതി അന്വേഷിക്കുന്നതിൽ സർക്കാരിന് എന്താണ് പ്രശ്നമെന്നും വി.ഡി സതീശൻ ചോദിച്ചു. കേന്ദ്ര സർക്കാരിനെയും ബിജെപിയെയും കേരള സർക്കാരിന് ഭയമാണെന്നും പ്രതിപക്ഷ നേതാവ് കുറ്റപ്പെടുത്തി. പാലാരിവട്ടം പാലം ഇടിഞ്ഞു വീഴാതിരുന്നിട്ടും അന്നത്തെ മന്ത്രിയെ വിജിലൻസ് കേസിൽപെടുത്തിയിരുന്നെന്നും അദ്ദേഹം ഓർമപ്പെടുത്തി. 

നാഷണൽ ഹൈവേ നിർമാണത്തിലെ തകരാർ സിബിഐ അന്വേഷിക്കണമെന്നും വി.ഡി സതീശൻ ആവശ്യപ്പെട്ടു. മലപ്പുറം കൂരിയാട് തകർന്ന ദേശീയപാതയുടെ ഭാഗം പുനർനിർമ്മിക്കാൻ ഒരു വർഷം വേണ്ടി വരും എന്നാണ് ദേശീയപാത അതോറിറ്റി പറയുന്നതെന്നും പ്രതിപക്ഷ നേതാവ് ചൂണ്ടിക്കാണിച്ചു.