വാഷിംഗ്ടൺ: ഈയടുത്ത് വരെ അടുത്ത സുഹൃത്തുക്കൾ ആയിരുന്ന ടെസ്‌ല, സ്‌പേസ് എക്‌സ് സിഇഒയ എലോൺ മസ്‌കും യുഎസ് പ്രസിഡൻ്റ് ഡൊണാൾഡ് ട്രംപും അടിച്ചു പിരിഞ്ഞിരിക്കുക ആണ്. ഇരുവരുടെയും ബന്ധം പരസ്യ പൊട്ടിത്തെറിയിൽ എത്തി എന്ന് മാത്രമല്ല, രണ്ട് പേരും പരസ്പരം ആരോപണ, പ്രത്യാരോപണങ്ങൾ ഉന്നയിക്കുകയും ചെയ്തു. ഇതിനിടെയിതാ വിട്ടുകൊടുക്കാൻ തയാറല്ല എന്ന് പ്രഖ്യാപിച്ചു പുതിയ രാഷ്ട്രീയ പാർട്ടി രൂപീകരിക്കാനുള്ള നീക്കത്തിൽ ആണ് മസ്‌ക്. എക്സിൽ പങ്കുവച്ച കുറിപ്പിൽ ആണ് 'ദി അമേരിക്ക പാർട്ടി' എന്ന് പേരിട്ടിരിക്കുന്ന ഒരു പുതിയ രാഷ്ട്രീയ പാർട്ടിയുടെ രൂപീകരണത്തെക്കുറിച്ച് അദ്ദേഹം സൂചന നൽകിയത്. മസ്കിൻ്റെ പുതിയ കുറിപ്പ് അമേരിക്കൻ രാഷ്ട്രീയ രംഗത്ത് പുതിയ ഊഹാപോഹങ്ങൾക്ക് തിരികൊളുത്തിയിട്ടുണ്ട്. മസ്‌ക് നേരിട്ട് പ്രഖ്യാപനം നടത്തിയിട്ടില്ലെങ്കിലും, അദ്ദേഹത്തിന്റെ സോഷ്യൽ മീഡിയ പ്ലാറ്റ്‌ഫോമായ എക്‌സിലെ നിരവധി പോസ്റ്റുകൾ വ്യാപകമായ ചർച്ചകൾക്ക് തിരികൊളുത്തി. അമേരിക്കയിൽ ഒരു പുതിയ രാഷ്ട്രീയ പാർട്ടി ആവശ്യമുണ്ടോ എന്ന് ചോദിച്ച് മസ്‌ക് ഒരു പോൾ നടത്തി. പ്രതികരിച്ചവരിൽ 80 ശതമാനം പേരും ഈ ആശയത്തെ പിന്തുണച്ചതായി അദ്ദേഹം അവകാശപ്പെട്ടു. 

ഞാൻ യുഎസ് ജനതയുമായി സംസാരിച്ചെന്നും മധ്യവർഗത്തിൽപ്പെട്ട 80 ശതമാനത്തെയും പ്രതിനിധീകരിക്കാൻ അമേരിക്കയിൽ ഒരു പുതിയ രാഷ്ട്രീയ പാർട്ടി ആവശ്യമാണ് എന്നും എല്ലാവരും അഭിപ്രയപ്പെട്ടെന്നും അദ്ദേഹം പറഞ്ഞു. കൃത്യമായി പറഞ്ഞാൽ 80 ശതമാനം ആളുകളും ഇത് സമ്മതിക്കുന്നു. ഇതാണ് പോളിൻ്റെ ഫലം- അദ്ദേഹം ട്വീറ്റ് ചെയ്തു.

പിന്നാലെ "ദി അമേരിക്ക പാർട്ടി" എന്ന പേര് നിർദ്ദേശിക്കുന്ന ഒരു ചിത്രം ഒരു ഉപയോക്തവ് പോസ്റ്റ് ചെയ്തു. ഇതിനോട്, 'അമേരിക്ക പാർട്ടി എന്ന പേര് നന്നായി തോന്നുന്നു. അമേരിക്കയെ യഥാർത്ഥത്തിൽ പ്രതിനിധീകരിക്കുന്ന പാർട്ടി!" - എന്ന് മസ്‌ക് പ്രതികരിക്കുകയും ചെയ്തു. "ദി അമേരിക്ക പാർട്ടി" എന്ന് ലളിതമായി എഴുതിയ മറ്റൊരു പോസ്റ്റ് അദ്ദേഹം ഇടുകയും ചെയ്തു. 

 മസ്‌കും പ്രസിഡന്റ് ഡൊണാൾഡ് ട്രംപും തമ്മിലുള്ള ഭിന്നത പൊട്ടിത്തെറിയിൽ എത്തിനിൽക്കെയുള്ള പുതിയ പോസ്റ്റുകൾക്ക് രാഷ്ട്രീയ നിരീക്ഷകർ വൻ പ്രാധാന്യം കാണുന്നുണ്ട്.

തെരഞ്ഞെടുപ്പ് സമയത്ത് അടുത്ത രാഷ്ട്രീയ പങ്കാളികളായിരുന്ന ഇരുവരുടെയും ബന്ധത്തിൽ അടുത്തിടെയാണ് നാടകീയമായ വഴിത്തിരിവുണ്ടായത്. മസ്‌ക് മുമ്പ് പ്രസിഡന്റ് ട്രംപിന്റെ കാബിനറ്റ് യോഗങ്ങളിൽ പങ്കെടുത്തിരുന്നു, പ്രസിഡന്റിന്റെ സ്ഥാനാരോഹണ വേളയിലും സജീവമായി പങ്കെടുത്തു. ഡോഗ് വകുപ്പിന്റെ തലവനായും അദ്ദേഹത്തെ നിയമിക്കുകയും ട്രംപിന് വേണ്ടി സജീവമായി പ്രചാരണം നടത്തുകയും ചെയ്തു. കഴിഞ്ഞദിവസം ഡോഗ് വകുപ്പിൽ നിന്ന് മസ്‌ക് രാജിവച്ചു. പിന്നാലെയാണ് ട്രംപിനെ പരസ്യമായി വിമർശിച്ചു രംഗത്ത് വന്നത്. ഞാനില്ലായിരുന്നെങ്കിൽ ട്രംപ് തിരഞ്ഞെടുപ്പിൽ തോൽക്കുമായിരുന്നു എന്നും അദ്ദേഹം പറയുകയുണ്ടായി. ട്രമ്പും വിട്ടുകൊടുത്തില്ല. മസ്‌കിന്റെ കമ്പനികൾക്ക് നൽകിയ സബ്‌സിഡികളും സർക്കാർ കരാറുകളും റദ്ദാക്കുമെന്ന് ഭീഷണിപ്പെടുത്തിയാണ് പ്രസിഡന്റ് ട്രംപ് തന്റെ ഭാഗത്തുനിന്ന് പ്രതികരിച്ചത്. ജർമ്മൻ ചാൻസലർ ഫ്രെഡറിക് മെർസുമായുള്ള ഓവൽ ഓഫീസ് കൂടിക്കാഴ്ചയിൽ പ്രസിഡന്റ് ട്രംപ് ഭിന്നത സ്ഥിരീകരിക്കുകയും ചെയ്തു. എലോണും ഞാനും തമ്മിൽ മികച്ച ബന്ധമായിരുന്നു. ഇനി ഉണ്ടാകുമോ എന്ന് എനിക്കറിയില്ല. എലോണിൽ ഞാൻ വളരെ നിരാശനാണ്. ഞാൻ എലോണിനെ വളരെയധികം സഹായിച്ചിട്ടുണ്ട് എന്നാണ് ട്രമ്പ് പറഞ്ഞത്.

Elon Musk hints at forming ‘The America Party’ amid fallout with Trump