ന്യൂഡൽഹി: മണിപ്പൂരിൽ വീണ്ടും അക്രമസംഭവങ്ങൾ പൊട്ടിപ്പുറപ്പെട്ടതിനെ തുടർന്ന് കേന്ദ്രസർക്കാരിനെയും പ്രധാനമന്ത്രി നരേന്ദ്ര മോദിയെയും കോൺഗ്രസ് രൂക്ഷമായി വിമർശിച്ചു. രാഷ്ട്രപതി ഭരണം ഏർപ്പെടുത്തിയിട്ടും സമാധാനം പുനഃസ്ഥാപിക്കാൻ കഴിയാത്തതിന്റെ ഉത്തരവാദിത്തം പ്രധാനമന്ത്രിക്കാണെന്ന് കോൺഗ്രസ് എംപി പ്രിയങ്ക ഗാന്ധി ആരോപിച്ചു. മണിപ്പൂർ സന്ദർശിക്കാത്തതും സംസ്ഥാന പ്രതിനിധികളുമായി ചർച്ച നടത്താത്തതും പ്രധാനമന്ത്രിയുടെ നിസ്സംഗതയാണെന്ന് പ്രിയങ്ക ഗാന്ധി എക്സിൽ കുറിച്ചു. 

കഴിഞ്ഞ രണ്ട് വർഷമായി മണിപ്പൂർ അക്രമവും കൊലപാതകവും ബലാത്സംഗവും കുടിയേറ്റവും നേരിടുന്നുവെന്ന് പ്രിയങ്ക ഗാന്ധി ചൂണ്ടിക്കാട്ടി. നൂറുകണക്കിന് ആളുകൾ കൊല്ലപ്പെടുകയും ആയിരക്കണക്കിന് പേർ ഭവനരഹിതരാവുകയും ചെയ്തു. രാജ്യത്തെ ജനങ്ങൾക്ക് സുരക്ഷ ഉറപ്പാക്കേണ്ടത് പ്രധാനമന്ത്രിയുടെ കടമയാണെന്നും അതിൽ നിന്ന് ഒഴിഞ്ഞുമാറുന്നത് ഉത്തരവാദിത്ത വിമുഖതയാണെന്നും പ്രിയങ്ക വിമർശിച്ചു

ഇംഫാൽ വെസ്റ്റ്, ഇംഫാൽ ഈസ്റ്റ്, തൗബൽ, കാച്ചിംഗ്, ബിഷ്ണുപൂർ ജില്ലകളിൽ കഴിഞ്ഞ 24 മണിക്കൂറിനിടെ അക്രമസംഭവങ്ങൾ റിപ്പോർട്ട് ചെയ്തു. മെയ്തേയ് തീവ്രവാദ സംഘടനയായ ആംരംഭായ് തെങ്കോലിന്റെ നേതാവ് കനാൻ സിങിന്റെ അറസ്റ്റിനെ തുടർന്നാണ് സംഘർഷം ആരംഭിച്ചത്. പ്രതിഷേധക്കാർ തെരുവിലിറങ്ങി ടയറുകൾ കത്തിക്കുകയും അക്രമം അരങ്ങേറുകയും ചെയ്തു. ഇതേത്തുടർന്ന് സംസ്ഥാനത്ത് ഇന്റർനെറ്റ് സേവനങ്ങൾക്കും വിലക്കേർപ്പെടുത്തിയിരിക്കുകയാണ്.

കോൺഗ്രസ് ജനറൽ സെക്രട്ടറി ജയറാം രമേശും മണിപ്പൂരിലെ വിഷയത്തിൽ ബിജെപി സർക്കാരിനെതിരെ ആഞ്ഞടിച്ച് രം​ഗത്തെത്തി . 2023 മെയ് 3 മുതൽ മണിപ്പൂർ അക്രമത്തിന്റെ പിടിയിലാണെന്നും ബിജെപി ഭരണത്തിൽ സമാധാനം പുനഃസ്ഥാപിക്കാൻ കഴിഞ്ഞില്ലെന്നും അദ്ദേഹം ആരോപിച്ചു. 2023 ജൂൺ 4ന് കേന്ദ്രം നിയോഗിച്ച മൂന്നംഗ അന്വേഷണ കമ്മീഷന്റെ റിപ്പോർട്ട് 2025 നവംബർ 20 വരെ നീട്ടിയതിനെയും അദ്ദേഹം വിമർശിച്ചു.

2025 ഫെബ്രുവരി 13നാണ് മണിപ്പൂരിൽ രാഷ്ട്രപതി ഭരണം ഏർപ്പെടുത്തിയത്. എന്നാൽ, ഇത് സ്ഥിതിഗതികൾ മെച്ചപ്പെടുത്തിയില്ലെന്ന് രമേശ് വ്യക്തമാക്കി. ഗവർണർക്ക് പോലും ഇംഫാൽ വിമാനത്താവളത്തിൽ നിന്ന് ഹെലികോപ്റ്റർ ഉപയോഗിച്ച് യാത്ര ചെയ്യേണ്ട ഗതികേടുണ്ടായി. പ്രധാനമന്ത്രിയുടെ നിസ്സംഗത ഞെട്ടിക്കുന്നതാണെന്നും മണിപ്പൂരിന്റെ ദുരിതം രാജ്യത്തിന്റെ മുഴുവൻ ദുരവസ്ഥയാണെന്നും അദ്ദേഹം എക്സിൽ കുറിച്ചു.