ദോഹ:ഖത്തറില്‍ നിന്ന് കെനിയയിലേക്കു ടൂര്‍ പോയ ഇന്ത്യക്കാരുടെ ബസ് അപകടത്തില്‍പ്പെട്ട് പരുക്കേറ്റവരില്‍ മലയാളികളും. പാലക്കാട് നിന്നുള്ള ജോയല്‍,മകന്‍ ട്രെവിസ്,ഭാര്യ റിയ,മകള്‍ ടൈര എന്നിവര്‍ക്കും തൃശൂര്‍ ജില്ലയില്‍ നിന്നുള്ള മുഹമ്മദ് ഹനീഫ്, ഭാര്യ ജസ്‌ന കുറ്റിക്കാട്ടുചാലില്‍, മകള്‍ റൂഹി മെഹ്‌റിന്‍ എന്നിവര്‍ക്കുമാണ് അപകടത്തില്‍ പരുക്കേറ്റത്.

കെനിയയിലെ ന്യാന്‍ഡറുവ പ്രവിശ്യയിലാണ് അപകടം നടന്നത്. പ്രദേശികസമയം തിങ്കളാഴ്ച വൈകുന്നേരം ആണ് സംഭവം. അപകടസമയത്ത് 28 വിനോദസഞ്ചാരികളും മൂന്ന് പ്രാദേശിക ഗൈഡുകളും ഒരു ഡ്രൈവറും ആണ് ബസിലുണ്ടായിരുന്നത്.

ന്യാന്‍ഡാരുവ കൗണ്ടിയിലെ ഓള്‍ ജോറോറോക്ക്-നകുരു റോഡില്‍ ഗിച്ചാക്കയില്‍ വെച്ച് ബസ് കുഴിയിലേക്ക് മറിയുകയായിരുന്നുവെന്നു പൊലിസ് വക്താവ് മൈക്കല്‍ മുചിരി പറഞ്ഞു. ന്യാഹുരുരുവിലെ പനാരി റിസോര്‍ട്ടിലേക്ക് പോകുകയായിരുന്നു സംഘം. മലകളും കുന്നുകളുമുള്ള ഈ ഭാഗത്ത് കുത്തനെയുള്ള റോഡില്‍ വളവ് തിരിയുന്നതിനിടെ ഡ്രൈവര്‍ക്ക് നിയന്ത്രണം നഷ്ടപ്പെട്ടതിനെ തുടര്‍ന്നാണ് അപകടം ഉണ്ടായത്.