കൊണ്ടോട്ടി: സംസ്ഥാന ഹജ്ജ് കമ്മിറ്റിക്ക് കീഴിൽ പരിശുദ്ധ ഹജ്ജിന് പോയ തീർഥാടകരുടെ മടക്കയാത്ര 25 മുതൽ ആരംഭിക്കും. മദീനയിൽ നിന്നുള്ള ആദ്യ ഹജ്ജ് സംഘം 25ന് വൈകീട്ട് 3.30ന് കരിപ്പൂരിലെത്തും. 25 മുതൽ ജൂലൈ ഏഴ് വരെ 31 വിമാനങ്ങളിലായാണ് ഹാജിമാരെ കരിപ്പൂരിൽ തിരിച്ചെത്തിക്കുന്നത്. കരിപ്പൂർ വഴി 5339 പേരാണ് ഹജ്ജിന് പോയത്.
കൊച്ചിയിൽ നിന്നുള്ളവരുടെ മടക്കയാത്ര 26 മുതലാണ് ആരംഭിക്കുക. ജൂലൈ 10ന് സർവിസുകൾ സമാപിക്കും. 23 വിമാനങ്ങളാണ് സഉൗദി എയർലൈൻസ് ഹാജിമാരെ തിരിച്ചെത്തിക്കാനായി ഷെഡ്യൂൾ ചെയ്തത്. 6388 ഹാജിമാരാണ് കൊച്ചി വഴി ഹജ്ജിന് പോയത്. കണ്ണൂരിലേക്കുള്ള ഹജ്ജ് മടക്ക സർവിസുകൾ ഈ മാസം 30 മുതൽ ജൂലൈ 11 വരെയാണ് ക്രമീകരിച്ചിരിക്കുന്നത്. 4755 പേരാണ് കണ്ണൂരിൽനിന്ന് തീർഥാടനത്തിന് പോയത്. 28 വിമാനങ്ങളാണ് ഷെഡ്യൂൾ ചെയ്തത്. 16,482 ഹാജിമാരാണ്  കേരളത്തിൽ നിന്ന് സംസ്ഥാന ഹജ്ജ് കമ്മിറ്റി വഴി തീർഥാടനത്തിന് പോയത്.

ഹജ്ജ് തീർഥാടകർക്കുള്ള അഞ്ച് ലിറ്റർ സംസം തീർഥജലം ഇതിനകം തന്നെ വിമാനത്താവളങ്ങളിൽ എത്തിച്ചിട്ടുണ്ട്. തിരിച്ചെത്തുന്ന ദിവസം ഓരോ ഹാജിക്കും ഇത് വിമാനത്താവളത്തിൽ വച്ച് ഹജ്ജ് കമ്മിറ്റി വിതരണം ചെയ്യും. ഹജ്ജ് കർമം പൂർത്തിയാക്കിയ ഹാജിമാർ മദീന സന്ദർശനത്തിനുള്ള ഒരുക്കത്തിലാണ്.