ന്യൂഡൽഹി: ജനസംഖ്യ 146 കോടിയിലെത്തിയെങ്കിലും ഇന്ത്യയിൽ പ്രത്യുൽപാദന നിരക്ക് ആശങ്കയുണ്ടാക്കുംവിധം കുറയുന്നതായി യു.എൻ ജനസംഖ്യാ നിധി (യു.എൻ.എഫ്.പി.എ) വിലയിരുത്തൽ. പ്രത്യുൽപാദന നിരക്ക് (ടി.എഫ്.ആർ) 2.1 വേണ്ട സ്ഥാനത്ത് ഇന്ത്യയിൽ ഇപ്പോഴിത് 1.9 ആണെന്ന് യു.എൻ.എഫ്.പി.എയുടെ ജനസംഖ്യാസ്ഥിതി റിപ്പോർട്ടിൽ പറയുന്നു. 
തമിഴ്‌നാട്, ഡൽഹി (രണ്ടിടത്തും 1.4), കേരളം (1.5) എന്നിവയാണ് പ്രത്യുൽപാദന നിരക്ക് ഏറ്റവും കുറവുള്ള സംസ്ഥാനങ്ങൾ. ബിഹാർ (3), മേഘാലയ (2.9), യു.പി (2.7) എന്നിവയാണ് ഏറ്റവും കൂടുതലുള്ളവ. കുറഞ്ഞ പ്രത്യുൽപാദന നിരക്ക് നിലനിന്നാൽ തൊഴിൽശേഷിയുള്ളവരുടെ എണ്ണം കുറയും. ജനസംഖ്യയിലെ നല്ലൊരു ശതമാനവും മുതിർന്ന പൗരരായിരിക്കും.
ആരോഗ്യപ്രശ്‌നങ്ങൾ, സാമ്പത്തിക ബുദ്ധിമുട്ടുകൾ, ഭാവിയെക്കുറിച്ചുള്ള ആശങ്കകൾ, പങ്കാളിയുമായുള്ള പ്രശ്‌നങ്ങൾ തുടങ്ങിയവ പ്രത്യുൽപാദന നിരക്കിനെ സ്വാധീനിക്കുന്ന ഘടകങ്ങളാണ്. ഒരു സ്ത്രീ എത്ര കുഞ്ഞുങ്ങൾക്കു ജന്മം നൽകുന്നുവെന്നാണ് ടി.എഫ്.ആറിലൂടെ കണക്കാക്കുന്നത്.

ഇന്ത്യയിലെ ജനസംഖ്യ 43 കോടിയായിരുന്ന 1960ൽ ഒരു സ്ത്രീക്ക് ആറ് കുഞ്ഞുങ്ങൾ എന്നതായിരുന്നു പ്രത്യുൽപാദന നിരക്ക്. 1970ൽ നിരക്ക് അഞ്ച് ആയി. രണ്ടു കുട്ടികൾ മതിയെന്നാണ് 41% സ്ത്രീകളും 33% പുരുഷന്മാരും ഇപ്പോൾ ആഗ്രഹിക്കുന്നത്. മൂന്നോ അതിലധികമോ കുട്ടികൾ വേണമെന്ന് ആഗ്രഹിക്കുന്നവർ ആറു ശതമാനത്തിൽ താഴെയാണ്.അതേസമയം, രാജ്യത്തെ ജനസംഖ്യയിൽ 24% 14 വയസിനു താഴെയുള്ളവരാണ്.