ന്യൂഡൽഹി: രാജ്യത്ത് പുതിയ ടോൾ പ്ലാൻ അവതരിപ്പിക്കാനൊരുങ്ങി കേന്ദ്ര സർക്കാർ. പദ്ധതി നടപ്പായാൽ സഞ്ചരിക്കുന്ന ദൂരത്തിന് മാത്രം ടോൾ നൽകിയാൽ മതിയാകും. ഇതിന്റെ ഭാഗമായി രാജ്യത്തെ മുഴുവൻ ടോൾ ബൂത്തുകളിലും ഫാസ്ടാഗ്, കാമറകൾ എന്നിവ സ്ഥാപിക്കുമെന്ന് അധികൃതർ അറിയിച്ചു.

വാഹന ഉടമകളുടെ ബാങ്ക് അക്കൗണ്ടിൽനിന്ന് നേരിട്ട് പണം ഈടാക്കുന്നതോടെ സഞ്ചരിക്കുന്ന കിലോമീറ്ററിന് മാത്രം പണം നൽകിയാൽ മതിയാകും. ഇത് രാജ്യത്തുടനീളമുള്ള എക്‌സ്പ്രസ് വേ, ദേശീയ പാതകളിലൂടെ സഞ്ചരിക്കുന്ന വാഹനങ്ങൾക്ക് വലിയ ആശ്വാസമാകും. നിലവിൽ സഞ്ചരിക്കുന്ന ഹൈവേയുടെ ആകെ ദൂരം കണക്കാക്കി നിശ്ചയിച്ച ടോളാണ് ഈടാക്കിവരുന്നത്.

ടോൾ ബൂത്തുകളിൽ സ്ഥാപിച്ച കാമറകൾ വഴി വാഹനത്തിന്റെ നമ്പർ പ്ലേറ്റ് സ്‌കാൻ ചെയ്യുകയും ബാങ്കിൽ നിന്ന് നേരിട്ട് പണം ഈടാക്കുകയും ചെയ്യുന്നതാണ് പുതിയ ടോൾ പ്ലാൻ. ഇതോടെ വാഹനം സഞ്ചരിക്കുന്ന ദൂരം കണക്കാക്കി മാത്രം ടോൾ നൽകിയാൽ മതിയാകും. 

എന്നാൽ ലിങ്ക് ചെയ്തിട്ടുള്ള ബാങ്ക് അക്കൗണ്ടിൽ മതിയായ ബാലൻസില്ലെങ്കിൽ വാഹനത്തിന് പിഴ ലഭിക്കാനും വാഹനം ബ്ലാക്ക് ലിസ്റ്റിൽ ഉൾപ്പെടാനും സാധ്യതയുണ്ട്. ഈ ടോൾ പ്ലാനിന്റെ ഗുണഭോക്താക്കളാകാൻ നിലവിലെ ടോൾ നയമനുസരിച്ച് യാത്രക്കാർ കുറഞ്ഞത് 60 കിലോമീറ്ററെങ്കിലും യാത്രചെയ്യണം.

പുതിയ ടോൾ പ്ലാൻ നിലവിൽവരുന്നതോടെ എക്‌സ്പ്രസ് വേയിലെയും ദേശീയപാതകളിലെയും ടോൾ ബൂത്തുകളിലെ തിരക്ക് കുറയുമെന്ന് സർക്കാർ പറയുന്നു. ഒറ്റത്തവണ പണമടച്ചാൽ ഒരു വർഷത്തേക്ക് ദേശീയപാതകളിൽ ടോൾ കൊടുക്കാതെ പരിധിയില്ലാതെ സഞ്ചരിക്കാമെന്ന മറ്റൊരു ടോൾ നയം മാസങ്ങൾക്ക് മുമ്പ് കേന്ദ്ര സർക്കാർ പ്രഖ്യാപിച്ചിരുന്നു.