മലപ്പുറം: നിലമ്പൂർ ഉപതെരഞ്ഞെടുപ്പിൽ  ജമാഅത്തെ ഇസ്‌ലാമി, പി.ഡി.പി, അഖില ഭാരത് ഹിന്ദു മഹാസഭ തുടങ്ങിയവരുടെ പിന്തുണയെച്ചൊല്ലി എൽ.ഡി.എഫും യു.ഡി എഫും പോർ മുഖത്ത്. പി.ഡി.പി, അഖില ഭാരത് ഹിന്ദു മഹാസഭ എന്നിവർ എൽ.ഡി. ഫിനും ജമാഅഅത്തെ ഇസ്‌ലാമിയുടെ വെൽഫെയർ പാർട്ടി യു.ഡി.എഫിനുമാണ് പിന്തുണ പ്രഖ്യാപിച്ചത്. പി.ഡി.പിക്ക് ക്ലീൻചിറ്റ് നൽകിയ സി.പി.എം സംസ്ഥാന സെക്രട്ടറി എം.വി ഗോവിന്ദൻ ജമാഅത്തെ ഇസ്‍ലാമിയെ വിമർശിച്ച് രംഗത്ത് വന്നതോടെയാണ് മറുപടിയുമായി പ്രതിപക്ഷവും തിരിച്ചടിച്ചത്. എല്ലാ മേഖലകളിലുമുള്ള വർഗീയവാദികളെയും കൂട്ടിച്ചേർത്താണ് യു.ഡി.എഫ് നിലകൊള്ളുന്നതെന്നായിരുന്നു എം.വി ഗോവിന്ദന്റെ പ്രസ്താവന. ഇത് ദൂരവ്യാപകമായ പ്രത്യാഘാതമുണ്ടാക്കുന്നതാണ്. 

മതരാഷ്ട്ര വാദികളായ ജമാഅത്തെ ഇസ്‌ലാമിയെ പോലോത്ത സംഘടനകളുമായി എൽ.ഡി.എഫിന് ഒരു ബന്ധവുമില്ലെന്നും സാർവദേശീയ തലത്തിൽ വർഗീയരാഷ്ട്രം ഉണ്ടാക്കണമെന്ന് ജമാഅത്തെ ഇസ്‌ലാമിയെപ്പോലെ പറയുന്നവരല്ല പി.ഡി.പി എന്നും അദ്ദേഹം പറഞ്ഞു. ഇതിനിടെയാണ് അഖില ഭാരത് ഹിന്ദു മഹാസഭ സംസ്ഥാന പ്രസിഡന്റ് സ്വാമി ദത്ത ത്രേയസ സായി സ്വരൂപ് നാഥ് നിലമ്പൂരിൽ എൽ.ഡി.എഫ് സ്ഥാനാർഥി എം. സ്വരാജിന് പിന്തുണ പ്രഖ്യാപിച്ചത്.

 മുൻകാലങ്ങളിൽ പി.ഡി.പിയോടും വെൽഫെയർ പാർട്ടിയോടും  സി.പി.എം സ്വീകരിച്ച നിലപാടുകൾ അക്കമിട്ട് നിരത്തിയാണ് പ്രതിപക്ഷ നേതാവ് വി.ഡി സതീശൻ രംഗത്തെത്തിയത്. ഓന്തിനെ പോലെ നിറംമാറി വർഗീയവിരുദ്ധത പറയുന്നതിലെ ഇരട്ടത്താപ്പ് ജനംതിരിച്ചറിയുമെന്ന് അദ്ദേഹം പറഞ്ഞു. ജമാഅത്തെ ഇസ്‌ലാമി പിന്തുണ എൽ.ഡി.എഫിന് സ്വീകരിക്കാം, യു.ഡി.എഫിന് പാടില്ലെന്നത് എവിടുത്തെ ന്യയമാണ്. വെൽഫെയർ പാർട്ടി പിന്തുണയിൽ പരിഭവിക്കുന്നവർക്ക് പി.ഡി.പി പിന്തുണയിൽ പരിഭവമില്ലേയെന്നും അദ്ദേഹം ചോദിച്ചു.

കോയമ്പത്തൂർ സ്‌ഫോടനത്തെ തുടർന്ന് അറസ്റ്റിലായ അബ്ദുൽ നാസർ മഅ്ദനി ഉൾപ്പടെയുള്ളവരെ തമിഴ്‌നാട് പൊലിസിന് കൈമാറിയത് ചാരിതാർഥ്യജനകമാണെന്നുള്ള ഇ.കെ നയനാരുടെ കാലത്തെ പി.ആർ.ഡി പുറത്തിറക്കിയ ലഘുലേഖ കാണിച്ചായിരുന്നു സതീശന്റെ മറുപടി. അന്ന് സർക്കാരിന്റെ നേട്ടമായി പറഞ്ഞിരിക്കുന്നത് ഇപ്പോൾ പി.ഡി.പിയുടെ പിന്തുണ സ്വീകരിക്കുന്നതിൽ ഒരു വിഷമവുമില്ലെയെന്നും സതീശൻ ചോദിച്ചു. അഖില ഭാരത് ഹിന്ദു മഹാസഭയുടെ എൽ.ഡി.എഫിനുള്ള പിന്തുണയും യു.ഡി.എഫ് ചർച്ചയാക്കി. സോഷ്യൽ മീഡിയയിലടക്കം ഇത് വിവാദമായി.

       നിലമ്പൂർ തെരഞ്ഞെടുപ്പിൽ മുഖ്യമന്ത്രിയുടെ മലപ്പുറം പ്രസ്താവന, സാമൂഹ്യസുരക്ഷ പെൻഷൻ, ബലിപ്പെരുന്നാൾ അവധി, ഷോക്കേറ്റ് വിദ്യാർഥിയുടെ മരണം, രാഷ്ട്രീയ ഗൂഡാലോചന തുടങ്ങി വിവിധ വിഷയങ്ങളിൽ ദിനേന മുന്നണികൾ കൊമ്പുകോർത്ത് പ്രചാരണ രംഗത്തുണ്ട്. ഇതിനിടയിലാണ് പുതിയ വിവാദം.