പത്തനംതിട്ട: രാത്രിയില്‍ വീടിന്റെ പുറത്തേക്കിറങ്ങിയ വയോധിക കിണറ്റില്‍ വീണു. കിണറ്റില്‍ വീണ ഇവര്‍ മോട്ടോര്‍ പൈപ്പില്‍ പിടിച്ച് കിടന്നത് മണിക്കൂറുകള്‍. 4 മണിക്കൂറോളമാണ് കിണറ്റിലെ മോട്ടോര്‍ പൈപ്പില്‍ പിടിച്ചു കിടന്നത്. 87കാരിയായ  ഇവരെ ഫയര്‍ ഫോഴ്‌സ് എത്തിയാണ് രക്ഷപ്പെടുത്തിയത്.

പത്തനംതിട്ട തട്ട മാമ്മുട് കുടമുക്ക് വേലം പറമ്പിലെ  ശാന്തയാണ് കിണറ്റില്‍ വീണത്. ഇവരുടെ തന്നെ വീട്ടിലെ ആള്‍മറ ഇല്ലാത്ത കിണറ്റിലാണ് ശാന്ത വീണത്. രാത്രിയില്‍ വീടിന് പുറത്തിറങ്ങിയ ശാന്ത കാല്‍ തെറ്റി കിണറ്റില്‍ വീണതായാണ് സംശയം. രാത്രി ഇടയ്ക്കു ഉണര്‍ന്ന വീട്ടുകാര്‍ കതകു തുറന്നു കിടക്കുന്നതു കണ്ടു മുറി പരിശോധിച്ചപ്പോഴാണ് ശാന്തയെ കാണാനില്ലെന്ന് വ്യക്തമായത്.

തുടര്‍ന്നു നടത്തിയ തെരച്ചിലിലാണ് ഇവരെ കിണറിനുള്ളില്‍ കണ്ടെത്തിയത്. അടൂരില്‍ നിന്നു ഫയര്‍ഫോഴ്‌സ് എത്തിയാണ് ശാന്തയെ രക്ഷപ്പെടുത്തിയത്. ഏകദേശം 30 അടി താഴ്ചയും 15 അടി വെള്ളവും ഉള്ള കിണറ്റില്‍ മോട്ടോറിന്റെ പൈപ്പില്‍ പിടിച്ചു കിടക്കുന്ന അവസ്ഥയിലായിരുന്നു ഇവരുണ്ടായിരുന്നത്. ഇന്നലെ പുലര്‍ച്ചെ 4 മണിയോടെയാണ് സംഭവം.

അടൂര്‍ ഫയര്‍ ഫോഴ്‌സില്‍ നിന്നുള്ള സീനിയര്‍ റെസ്‌ക്യൂ ഓഫിസര്‍ അജിഖാന്‍ യൂസുഫിന്റെ നേതൃത്വത്തില്‍ എത്തിയ റെസ്‌ക്യൂ ടീം കിണറ്റില്‍ ഇറങ്ങി നെറ്റ് ഉപയോഗിച്ചാണ് വയോധികയെ പുറത്തെടുത്തത്.