തേഞ്ഞിപ്പലം: വേടനെ വിടാതെ ബി.ജെ.പി. റാപ്പ് ഗായകന്‍ വേടന്റെ (ഹിരണ്‍ ദാസ് മുരളി) പാട്ട് പാഠ്യപദ്ധതിയില്‍ ഉള്‍പെടുത്താനുള്ള നീക്കമാണ് ഇപ്പോള്‍ പാര്‍ട്ടിയെ ചൊടിപ്പിക്കുന്നത്. വേടന്റെ പാട്ട് കാലിക്കറ്റ് സര്‍വകലാശാല നാല് വര്‍ഷ പാഠ്യപദ്ധതിയില്‍ പഠന വിഷയമാക്കിയതിനെതിരെ സിന്‍ഡിക്കേറ്റിലെ ബി.ജെ.പി പ്രതിനിധി എ.കെ. അനുരാജ് വൈസ് ചാന്‍സലര്‍ ഡോ. പി. രവീന്ദ്രന് കത്ത് നല്‍കി.

 ലഹരിവസ്തുക്കള്‍ കൈവശം വെച്ചതിന് ഹിരണ്‍ദാസ് അറസ്റ്റിലായതും പുലിപ്പല്ല് കൈവശം വെച്ചതുമെല്ലാം എ.കെ. അനുരാജ് കത്തില്‍ ചൂണ്ടിക്കാട്ടുന്നു.

കഞ്ചാവ് പോലുള്ള ലഹരിവസ്തുക്കളും മദ്യവും ഉപയോഗിക്കുന്ന ആളാണ് താനെന്നും വരും തലമുറക്ക് തെറ്റായ മാതൃകയാണെന്നും സ്വയം സമ്മതിച്ച ആളാണ് വേടന്‍.  വേടന്റെ പല വിഡിയോകളിലും മദ്യം നിറച്ച ഗ്ലാസുകള്‍ ഉപയോഗിക്കുന്നുണ്ട്. വേടന്റെ രചന പാഠ്യപദ്ധതിയുടെ ഭാഗമാക്കുന്നത്, ഇയാള്‍ ജീവിതത്തില്‍ പിന്തുടരുന്ന അനുകരണീയമല്ലാത്ത വഴികള്‍ പകര്‍ത്താന്‍ വിദ്യാര്‍ഥികളെ പ്രേരിപ്പിക്കല്‍ കൂടിയാകുമെന്ന് ആശങ്കയുണ്ട്. വേടന്റെ രചനകള്‍ക്ക് പകരം മറ്റേതെങ്കിലും എഴുത്തുകാരുടെയോ സംഗീതജ്ഞരുടെയോ രചനകള്‍ ഉള്‍പെടുത്തണമെന്നും കത്തില്‍ ആവശ്യപ്പെടുന്നു. 

കഴിഞ്ഞ ദിവസമാണ് മൂന്നാം സെമസ്റ്റര്‍ മലയാളം പാഠഭാഗത്തിലാണ് വേടന്റെ ഭൂമി ഞാന്‍ വാഴുന്നിടം എന്ന പാട്ട് പഠന വിഷയമാക്കിയത്. മൈക്കില്‍ ജാക്‌സന്റെ 'ദേ ഡോണ്ട് കെയര്‍ എബൗട്ട് അസ്' ഗാനവും വേടന്റെ പാട്ടും തമ്മിലുള്ള താരതമ്യ പഠനമാണ് വിദ്യാര്‍ഥികള്‍ നടത്തേണ്ടിയിരുന്നത്.