ദുബൈ: ഈ വര്‍ഷം ആദ്യം ദുബൈയിലെ സ്‌കൂളുകളിലെ ഫീസ് വര്‍ധനവിന് നിയന്ത്രണ ഏജന്‍സികള്‍ അനുമതി നല്‍കിയതിനെത്തുടര്‍ന്ന് രക്ഷിതാക്കള്‍ക്ക് സ്‌കൂള്‍ ഫീസ് വര്‍ധനവിനെക്കുറിച്ചുള്ള അറിയിപ്പുകള്‍ ലഭിച്ചുതുടങ്ങി. ചില സ്‌കൂളുകളില്‍ ഒരു കുട്ടിക്ക് പ്രതിവര്‍ഷം 200 ദിര്‍ഹം മാത്രം ഫീസ് വര്‍ധനവ് ഉണ്ടാകുമ്പോള്‍ മറ്റു പല പ്രീമിയം സ്‌കൂളുകളിലെ രക്ഷിതാക്കള്‍ക്ക് ഒരു കുട്ടിക്ക് പ്രതിവര്‍ഷം 5,000 ദിര്‍ഹത്തോളം ഫീസ് വര്‍ധനവ് ഉണ്ടാകുമെന്ന മുന്നറിയിപ്പാണ് ലഭിച്ചുകൊണ്ടിരിക്കുന്നത്.

ALSO READ: പ്രവാസികളുടെ പ്രത്യേക ശ്രദ്ധയ്ക്ക്, വിദേശത്ത് പോകുന്നത് നാട്ടുകാരെ അറിയിക്കാൻ ബോർഡിംഗ് പാസ് ഫോട്ടോ എടുത്ത് സോഷ്യൽ മീഡിയയിൽ ഇടേണ്ട; മുന്നറിയിപ്പ് നൽകി വിദഗ്ധർ

ചെലവ് നികത്താന്‍, ചില മാതാപിതാക്കള്‍ ഒരു വര്‍ഷത്തെ മുഴുവന്‍ ഫീസ് ഒറ്റയടിക്ക് അടയ്ക്കാന്‍ തീരുമാനിക്കുമ്പോള്‍ മറ്റു ചിലര്‍ തങ്ങളുടെ കുട്ടികളെ ഫീസ് കുറഞ്ഞ സ്‌കൂളുകളിലേക്ക് മാറ്റാനുള്ള ശ്രമത്തിലാണ്. മറുവശത്ത്, ചില മാതാപിതാക്കള്‍ തങ്ങളുടെ കുട്ടിയുടെ സ്‌കൂള്‍ ഫീസ് വര്‍ധനവ് വളരെ കുറവും താങ്ങാനാവുന്നതുമാണെന്നതിന്റെ ആശ്വാസത്തിലാണ്.

അല്‍ ഖൂസിലെ ഇന്ത്യന്‍ സിലബസ് സ്‌കൂളില്‍ പഠിക്കുന്ന തന്റെ രണ്ട് കുട്ടികളുടെയും ഫീസ് വര്‍ധന പ്രതിവര്‍ഷം 400 ദിര്‍ഹമായിരിക്കുമെന്ന് ദുബൈയില്‍ താമസിക്കുന്ന മനാല്‍ പറയുന്നു. 

'ഈ വര്‍ധനവ് നിയന്ത്രിക്കാവുന്നതാണെന്നും വലിയ ഭാരമല്ലെന്നും അറിഞ്ഞതില്‍ എനിക്ക് വളരെ സന്തോഷമുണ്ട്, ഈ വര്‍ധനവ് ഞങ്ങള്‍ പ്രതീക്ഷിച്ചിരുന്നു' മനാല്‍ പറഞ്ഞു.

ഈ വര്‍ഷം മെയ് മാസത്തില്‍, ദുബൈയിലെ നോളജ് ആന്‍ഡ് ഹ്യൂമന്‍ ഡെവലപ്‌മെന്റ് അതോറിറ്റി (കെഎച്ച്ഡിഎ) 2025-2026 അധ്യയന വര്‍ഷത്തേക്ക് എമിറേറ്റില്‍ പ്രവര്‍ത്തിക്കുന്ന സ്വകാര്യ സ്‌കൂളുകള്‍ക്ക് 2.35 ശതമാനം ഫീസ് വര്‍ധിപ്പിക്കാന്‍ അനുമതി നല്‍കിയിരുന്നു. 

പ്രവാസിയായ വിവേകിന്റെ രണ്ട് മക്കള്‍ എമിറേറ്റിലെ ഒരു മികച്ച പ്രീമിയം സ്‌കൂളിലാണ് പഠിക്കുന്നത്. നിലവില്‍ അദ്ദേഹത്തിന്റെ കുട്ടികളുടെ വാര്‍ഷിക സ്‌കൂള്‍ ഫീസ് 87,000 ദിര്‍ഹം മുതല്‍ 92,000 ദിര്‍ഹം വരെയാണ്. ഫീസ് വര്‍ധനവോടെ രണ്ട് കുട്ടികള്‍ക്കും ഒരുമിച്ച് പ്രതിവര്‍ഷം 10,000 ദിര്‍ഹം കൂടി നല്‍കേണ്ടിവരുമെന്നാണ് അദ്ദേഹം പറയുന്നത്.

'എന്നിരുന്നാലും, ഞങ്ങളുടെ സ്‌കൂള്‍ മുഴുവന്‍ വര്‍ഷത്തെ ഫീസ് ഒറ്റയടിക്ക് അടയ്ക്കാനുള്ള ഓപ്ഷന്‍ നല്‍കുന്നുണ്ട്, ഇതിനാല്‍ ഞങ്ങള്‍ക്ക് ഒരു ലംപ്‌സം കിഴിവ് ലഭിക്കുമെന്നതിനാല്‍ ആകെ ഫീസ് വര്‍ധനവ് രണ്ട് കുട്ടികള്‍ക്കും പ്രതിവര്‍ഷം ഏകദേശം 3,000 ദിര്‍ഹമായിരിക്കും.' വിവേക് പറഞ്ഞു. 

സ്‌കൂള്‍ ഫീസ് വര്‍ധനവിന്റെ പ്രയാസം അനുഭവപ്പെടും എന്ന് ജര്‍മ്മന്‍ സ്വദേശിയായ ഗ്രേറ്റ പറഞ്ഞു. പക്ഷേ എല്ലാ സ്‌കൂളുകളും അവരുടെ ഫീസ് വര്‍ധിപ്പിച്ചതിനാല്‍ മറ്റ് മാര്‍ഗമില്ലെന്നും അവര്‍ കൂട്ടിച്ചേര്‍ത്തു. 

'എന്റെ മൂന്ന് കുട്ടികള്‍ ജുമൈറയിലുള്ള ഒരു ബ്രിട്ടീഷ് സിലബസ് സ്‌കൂളിലാണ് പഠിക്കുന്നത്. ഒരു കുട്ടിയുടെ സ്‌കൂള്‍ ഫീസ് പ്രതിവര്‍ഷം 2,000 ദിര്‍ഹം വീതം വര്‍ധിപ്പിച്ചതായി ഇന്നലെ എനിക്ക് ഇമെയില്‍ ലഭിച്ചു,' ദുബൈയില്‍ താമസമാക്കിയ ഗ്രേറ്റ പറഞ്ഞു. 

'സ്‌കൂള്‍ ഫീസില്‍ മാത്രം പ്രതിവര്‍ഷം 6,000 ദിര്‍ഹത്തിന്റെ ആകെ വര്‍ധനവാണിതോടെ ഉണ്ടാവുക. പുസ്തകങ്ങള്‍, യൂണിഫോമുകള്‍, മറ്റ് പഠന സാമഗ്രികള്‍ എന്നിവ അതില്‍ ഉള്‍പ്പെടുത്തിയിട്ടില്ല. എന്നിരുന്നാലും, കുട്ടികളുടെ സ്‌കൂള്‍ മാറ്റുന്നത് ഞങ്ങള്‍ക്ക് ഒരു ഓപ്ഷനല്ല, കാരണം എന്റെ മൂത്ത മകന്‍ അടുത്ത അധ്യയന വര്‍ഷത്തില്‍ 11ാം ക്ലാസിലേക്കാണ്, ഇപ്പോള്‍ അവനെ മാറ്റുന്നത് ബുദ്ധിപരമാണെന്ന് ഞാന്‍ കരുതുന്നില്ല. അടുത്ത വര്‍ഷം, ഞാന്‍ അതിനെക്കുറിച്ച് പരിശോധിച്ചേക്കാം.' ഗ്രേറ്റ പറഞ്ഞു. 

ALSO READ: UAE Job Alert: ദുബൈയിൽ ആറു ലക്ഷം രൂപയ്ക്ക് മുകളിൽ ശമ്പളമുള്ള പ്രവാസികൾക്ക് അപേക്ഷിക്കാവുന്ന 10 സർക്കാർ ജോലികൾ; അപേക്ഷിക്കേണ്ട വിധം ഇങ്ങനെ

ദുബൈയില്‍ നിലവില്‍ 227 സ്വകാര്യ സ്‌കൂളുകളുണ്ട്. 185 രാജ്യങ്ങളില്‍ നിന്നുള്ള 387,441 വിദ്യാര്‍ത്ഥികളാണ് ഈ വിദ്യാലയങ്ങളില്‍ പഠിക്കുന്നത്. 2023-24 അധ്യയന വര്‍ഷത്തില്‍ സ്വകാര്യ സ്‌കൂളുകളിലെ വിദ്യാര്‍ത്ഥി പ്രവേശനത്തില്‍ 12 ശതമാനം വര്‍ധനവ് രേഖപ്പെടുത്തിയിരുന്നു.

Several schools in Dubai have increased their fees for the new academic year, with some raising charges by up to AED 5,000. Parents express concern over rising education costs amid economic pressures.